ദുബൈ: ദുബൈയില്‍ വിസിറ്റ് വിസയില്‍ ജോലി ചെയ്യുന്ന വ്യക്തികള്‍ക്കെതിരെ കര്‍ശന നടപടി സ്വീകരിക്കാന്‍ ദുബൈ അധികൃതര്‍ ശ്രമങ്ങള്‍ ശക്തമാക്കിയതായി ട്രാവല്‍ ഏജന്റുമാര്‍. അധികൃതരുടെ നിരന്തര ശ്രമങ്ങള്‍ കാരണമായി വിസാ കാലാവധി കഴിഞ്ഞും രാജ്യത്ത് തങ്ങുന്നവരുടെ എണ്ണത്തില്‍ ഗണ്യമായ കുറവുണ്ടാക്കിയതായി ട്രാവല്‍ ഏജന്റുമാര്‍ വ്യക്തമാക്കി.

'അടുത്തിടെ സര്‍ക്കാര്‍ അധികൃതര്‍ ഒന്നിലധികം കമ്പനികള്‍ പരിശോധിച്ചതായി ഞങ്ങള്‍ അറിഞ്ഞു, കഴിഞ്ഞ കുറച്ച് മാസങ്ങളായി പരിശോധനാ സംഘങ്ങള്‍ ഞങ്ങളുടെ ഓഫീസും നിരവധി തവണ സന്ദര്‍ശിച്ചിട്ടുണ്ട്. വിസിറ്റ് വിസയില്‍ ജോലി ചെയ്യുന്നത് എല്ലായ്‌പ്പോഴും നിയമവിരുദ്ധമാണ്. എല്ലാവരും നിയമങ്ങള്‍ കര്‍ശനമായി പാലിക്കുന്നുണ്ടെന്ന് ഉറപ്പാക്കുന്നതില്‍ സര്‍ക്കാര്‍ ഇപ്പോള്‍ ശ്രദ്ധാലുക്കളാണ്.' സ്മാര്‍ട്ട് ട്രാവല്‍സിന്റെ ജനറല്‍ മാനേജര്‍ സഫീര്‍ മുഹമ്മദ് പറഞ്ഞു.

രാജ്യത്തെ ഏറ്റവും കാരുണ്യകരമായ ഒരു പൊതുമാപ്പ് പദ്ധതി അവസാനിച്ചതിനെ തുടര്‍ന്നാണ് ട്രാവല്‍ ഏജന്റുമാരുടെ മുന്നറിയിപ്പ്. പൊതുമാപ്പ് പദ്ധതി പ്രഖ്യാപിക്കപ്പെട്ടിരുന്ന കാലത്ത് വിസിറ്റ് വിസ കാലാവധി കഴിഞ്ഞും രാജ്യത്ത് തങ്ങുന്നവര്‍ക്ക് അവരുടെ വിസ നിയമവിധേയമാക്കാനോ പിഴകള്‍ അടക്കാതെ രാജ്യം വിടാനോ ഉള്ള ഓപ്ഷന്‍ ഉണ്ടായിരുന്നു.  

2024 സെപ്റ്റംബര്‍ മുതല്‍ ഡിസംബര്‍ വരെ നീണ്ടുനിന്ന പൊതുമാപ്പ് പദ്ധതിയിലൂടെ ആയിരക്കണക്കിന് ആളുകളുടെ വിസ സംബന്ധമായ പ്രശ്‌നങ്ങള്‍ പരിഹരിക്കാന്‍ കഴിഞ്ഞിരുന്നു. വിസ പൊതുമാപ്പ് അവസാനിച്ചതിനെത്തുടര്‍ന്ന് ജനുവരിയില്‍ ആരംഭിച്ച പരിശോധനാ കാമ്പെയ്‌നുകളില്‍ 6,000ത്തിലധികം പേരെയാണ് നിയമലംഘനത്തിന്റെ പേരില്‍ അറസ്റ്റ് ചെയ്തത്. 

വിസിറ്റ് വിസ കാലാവധി കഴിഞ്ഞും യുഎഇയില്‍ താമസക്കാരുടെ എണ്ണം പകുതിയിലധികം കുറയ്ക്കുന്നതില്‍ ഈ നടപടികള്‍ പ്രധാന പങ്ക് വഹിച്ചിട്ടുണ്ടെന്ന് സഫീര്‍ പറഞ്ഞു. ജനുവരി മുതല്‍ വിസിറ്റ് വിസ കാലാവധി കഴിഞ്ഞും രാജ്യത്തു താമസക്കാരുടെ എണ്ണം 10 ശതമാനത്തില്‍ താഴെയായി കുറഞ്ഞിട്ടുണ്ട്.   

ടൂറിസ്റ്റ് വിസയില്‍ യുഎഇയിലേക്ക് വരുന്ന ആളുകള്‍ക്ക് സ്ഥിരീകരിച്ച വിമാന ടിക്കറ്റുകള്‍, ഹോട്ടല്‍ റിസര്‍വേഷനുകള്‍, പണമായോ ബാങ്ക് അക്കൗണ്ടുകളിലോ ഒരു നിശ്ചിത തുക എന്നിവ ഉണ്ടായിരിക്കണമെന്ന് വ്യവസ്ഥ ചെയ്തുകൊണ്ട് അടുത്തിടെ നിയമങ്ങള്‍ ഭേദഗതി ചെയ്തിരുന്നു. ഇത്തരം പുതിയ നിയമങ്ങളും വര്‍ധിച്ച പരിശോധനകളും നിലവില്‍ ഉള്ളതിനാല്‍ കമ്പനികള്‍ക്ക് തൊഴിലാളികളെ മുതലെടുക്കാന്‍ പ്രയാസമായിരിക്കുമെന്നാണ് അല്‍ഹിന്ദ് ട്രാവല്‍സ് ബിസിനസ് സെന്ററിലെ നൗഷാദ് ഹസ്സന്‍ പറയുന്നത്.

UAE warns against working on a visit visa; violators will face strict penalties, emphasizing the importance of adhering to visa regulations and employment laws.