തൃശൂര്‍: ഇരിങ്ങാലക്കുട കൂടല്‍മാണിക്യം ക്ഷേത്രത്തില്‍ ജാതിവിവേചനം നേരിട്ട കഴകക്കാരന്‍ തിരുവനന്തപുരം ആര്യനാട് സ്വദേശി ബി.എ ബാലു രാജിക്കത്ത് നല്‍കി. ഇന്നലെ ക്ഷേത്രത്തിലെ ദേവസ്വം ഓഫിസിലെത്തി അഡ്മിനിസ്‌ട്രേറ്റര്‍ക്ക് രാജിക്കത്ത് കൈമാറുകയായിരുന്നു. വ്യക്തിപരമായ കാരണങ്ങള്‍ കൊണ്ടാണ് രാജിയെന്നാണ് കത്തില്‍ പറയുന്നത്. ദേവസ്വം അഡ്മിനിസ്‌ട്രേറ്റര്‍ രാജി സ്വീകരിച്ചു. രാജിക്കാര്യം ദേവസ്വം റിക്രൂട്ട്‌മെന്റ് ബോര്‍ഡിനേയും സര്‍ക്കാറിനേയും അറിയിക്കും.

ഫെബ്രുവരി 24നാണ് തിരുവനന്തപുരം ആര്യനാട് സ്വദേശി ബാലു കൂടല്‍മാണിക്യം ക്ഷേത്രത്തില്‍ കഴകക്കാരനായി നിയമിക്കപ്പെട്ടത്. എന്നാല്‍ പിന്നീട്  തന്ത്രിമാരുടെ എതിര്‍പ്പിനെ തുടര്‍ന്ന് ബാലുവിനെ ഓഫിസ് ജോലിയിലേക്ക് മാറ്റി.അതിനുശേഷം അവധിയിലായിരുന്നു ബാലു. ദേവസ്വം റിക്രൂട്ട്‌മെന്റ് ബോര്‍ഡ് നടത്തിയ പരീക്ഷയില്‍ ഒന്നാം റാങ്കുകാരനായിരുന്നു ബാലു.

ബാലു രാജിവച്ചതിനാല്‍ സ്ഥാനത്തേക്ക് ഇനി ലിസ്റ്റിലെ അടുത്ത ആളെ നിയമിക്കും. ദേവസ്വം റിക്രൂട്ട്‌മെന്റ് ബോര്‍ഡ് വഴിയാണ് ബാലുവിന് നിയമനം നല്‍കിയിരുന്നത്. തന്ത്രി, വാര്യര്‍ സമാജം എതിര്‍പ്പിനെ തുടര്‍ന്നാണ് ബാലുവിനെ കഴകക്കാരന്‍ പോസ്റ്റില്‍ നിന്ന് മാറ്റിയത്.