കൊല്ലം: സര്‍ക്കാര്‍ മുന്‍ പ്ലീഡറും എറണാകുളം പിറവം സ്വദേശിയുമായ അഡ്വ. പിജി മനു ജീവനൊടുക്കി. കൊല്ലത്തെ വാടകവീട്ടില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു. കേരളാ സര്‍ക്കാരില്‍ സീനിയര്‍ ഗവണ്‍മെന്റ് പ്ലീഡറായി പ്രവര്‍ത്തിച്ച ഇദ്ദേഹം കേസിന്റെ ആവശ്യങ്ങള്‍ക്കായി കൊല്ലത്ത് എത്തിയതായിരുന്നു. നിയമസഹായം തേടിയെത്തിയ യുവതിയെ ലൈംഗികമായി പീഡിപ്പിച്ച കേസില്‍ പ്രതിയായ മനു, ഇതിന്റെ വിചാരണ നടന്നുകൊണ്ടിരിക്കെയാണ് ജീവനൊടുക്കിയത്.

സര്‍ക്കാര്‍ അഭിഭാഷകനായിരിക്കെ നിയമസഹായം തേടിയെത്തിയ യുവതിയെ വശീകരിച്ച് ലൈംഗികമായി പീഡിപ്പിക്കുകയും അശ്ലീല ദൃശ്യങ്ങള്‍ മൊബൈല്‍ ഫോണില്‍ പകര്‍ത്തുകയും ചെയ്തുവെന്നാണ് മനുവിനെതിരായ പരാതി. 2018ല്‍ നടന്ന പീഡന കേസില്‍ ഇരയായ യുവതി പൊലീസ് ഉദ്യോഗസ്ഥന്‍ പറഞ്ഞതിന്റെ അടിസ്ഥാനത്തിലാണ് നിയമോപദേശത്തിനായി മനുവിനെ സമീപിച്ചത്. കേസില്‍ മനുവിന്റെ മുന്‍കൂര്‍ ജാമ്യം ഹൈക്കോടതി തള്ളിയിരുന്നു. 10 ദിവസത്തിനകം ചോറ്റാനിക്കര പൊലീസിന് മുന്നില്‍ കീഴടങ്ങാനും കോടതി നിര്‍ദേശിച്ചു. കോടതി അനുവദിച്ച സമയപരിധി അവസാനിച്ചിട്ടും മനു കീഴടങ്ങിയിരുന്നില്ല. ഇതോടെ പൊലിസ് തിരച്ചില്‍ നോട്ടീസ് പുറത്തിറക്കിയതിന് പിന്നാലെ അദ്ദേഹം കീഴടങ്ങി ജാമ്യത്തിലിറങ്ങി. ഇതിനിടെ കേസുമായി ബന്ധപ്പെട്ട വിഡിയോ ദൃശ്യങ്ങള്‍ സമൂഹമാധ്യമങ്ങള്‍ പ്രചരിക്കുകയും ചെയ്തു. ഇതിന് പിന്നാലെയയാണ് മവുവിനെ മരിച്ച നിലയില്‍ കണ്ടെത്തുന്നത്.

പാനായിക്കുളം ഉള്‍പ്പെടെയുള്ള കേസുകളില്‍ എന്‍ഐഎയെ പ്രതിനിധീകരിച്ചത് മനുവായിരുന്നു.

Former government pleader and Ernakulam Piravom native Adv. PG Manu committed suicide