ചെന്നൈ: ഡിഎംകെ സര്‍ക്കാരിന് പിന്നാലെ വഖഫ് ഭേദഗതി നിയമത്തിനെതിരെ സുപ്രീം കോടതിയെ സമീപിച്ച് ടിവികെയും. 
ബില്ല് ഭരണഘടനാ വിരുദ്ധമെന്ന് ചൂണ്ടിക്കാട്ടിയാണ് ടിവികെ അധ്യക്ഷനും, തമിഴ് സൂപ്പര്‍താരവുമായ വിജയ് സുപ്രീം കോടതിയില്‍ ഹരജി നല്‍കിയത്. വഖഫ് ബില്ല് പാര്‍ലമെന്റില്‍ പാസായതിന് പിന്നാലെ ടിവികെ സംസ്ഥാന വ്യാപകയായി പ്രതിഷേധങ്ങള്‍ സംഘടിപ്പിച്ചിരുന്നു. ഇതിന് പിന്നാലെയാണ് സുപ്രീം കോടതിയെ സമീപിച്ചത്.

നേരത്തെ തമിഴ്‌നാട് സര്‍ക്കാരും, ഡിഎംകെയും വഖഫ് ബില്ലിനെതിരെ സുപ്രീം കോടതിയില്‍ ഹരജി നല്‍കിയിരുന്നു. 

ബിജെപി സര്‍ക്കാര്‍ കൊണ്ടുവന്ന വിവാദ വഖഫ് ബില്ലിനെതിരെ രാജ്യവ്യാപകമായ ശക്തമായ പ്രതിഷേധങ്ങളാണ് നടക്കുന്നത്. പാര്‍ലമെന്റിലെ ഇരുസഭകളിലും വോട്ടിനിട്ട് പാസാക്കിയ നിയമം, രാഷ്ട്രപതിയും ഒപ്പുവെച്ചതോടെ പ്രാബല്യത്തില്‍ വന്നു. ഏപ്രില്‍ എട്ടോടെ കേന്ദ്ര ന്യൂനപക്ഷ മന്ത്രാലയം ഇതുസംബന്ധിച്ച വിജ്ഞാപനം പുറത്തിറക്കി. 

നിയമത്തിനെതിരെ ബംഗാളില്‍ നടന്ന പ്രതിഷേധ മാര്‍ച്ചില്‍ സംഘര്‍ഷമുണ്ടാവുകയും മൂന്നുപേര്‍ കൊല്ലപ്പെടുകയും ചെയ്തിരുന്നു. നിരവധി പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. അതിനിടെ വഖഫ് നിയമം ബംഗാളില്‍ നടപ്പാക്കില്ലെന്ന് ആവര്‍ത്തിച്ച് മുഖ്യമന്ത്രി മമത ബാനര്‍ജി രംഗത്തെത്തി. തൃണമൂല്‍ കോണ്‍ഗ്രസ് അധികാരത്തില്‍ തുടരുന്നവരെ നിയമം പാസാക്കില്ലെന്നാണ് മമത അടിവരയിട്ട് പറഞ്ഞത്. 

ന്യൂനപക്ഷങ്ങളുടെ സംരക്ഷണമാണ് സര്‍ക്കാര്‍ ലക്ഷ്യമെന്നും, സംസ്ഥാനത്തെ മുസ് ലിം സമൂഹത്തിന് അവരുടെ സ്വത്തുക്കളുടെ സംരക്ഷണം തന്റെ സര്‍ക്കാര്‍ ഉറപ്പാക്കുമെന്നും മമത കൂട്ടിച്ചേര്‍ത്തു.

tvk president actor vijay filed petition in supreme court against waqf amendment bill