റിയാദ്: കഴിഞ്ഞയാഴ്ചയാണ് ഒരു സഊദി കുടുംബം 24 മണിക്കൂറിലധികം മരുഭൂമിയില്‍ കുടുങ്ങിപ്പോയത്. സഊദി അറേബ്യയിലെ അല്‍-ദവാദ്മി എന്ന പ്രദേശത്തിന് തെക്കുള്ള ഒരു വിദൂര പ്രദേശത്തിലൂടെ യാത്ര ചെയ്യവെ, കുടുംബം യാത്ര ചെയ്തുകൊണ്ടിരുന്ന കാര്‍ മണലില്‍ കുടുങ്ങിപ്പോവുകയായിരുന്നു. സഹായത്തിനായി ആരെയെങ്കിലംു വിളിക്കണമെന്നു വിചാരിച്ചാല്‍ തന്നെ സിഗ്നല്‍ ഇല്ലാത്ത ഒരിടത്തായിരുന്നു അവര്‍ കുടുങ്ങിയത്. ഇതിന്റെ അടിസ്ഥാനത്തില്‍ ശരിയായ തയ്യാറെടുപ്പുകളില്ലാതെ സാഹസിക യാത്ര ഒഴിവാക്കണമെന്ന് സോഷ്യല്‍ മീഡിയയില്‍ നെറ്റിസണ്‍സിന്റെ കമന്റുകള്‍ നിറയുകയാണ്.

സംഭവത്തിന്റെ വിശദാംശങ്ങള്‍ 'കെഎസ്എ എക്‌സ്പാറ്റ്‌സ്' ഫേസ്ബുക്കില്‍ പങ്കുവച്ചു. ആരെയും ബന്ധപ്പെടാന്‍ മാര്‍ഗമില്ലാതെ, ഭക്ഷണ സാധനങ്ങളൊന്നുമില്ലാതെ, ആസന്നമായ പ്രശ്‌നത്തെ മറികടക്കാന്‍ കുടുംബം വളരെയധികം കഷ്ടപ്പെടേണ്ടി വന്നു. ജലാംശം നിലനിര്‍ത്താന്‍ അവര്‍ കാറിന്റെ റേഡിയേറ്ററില്‍ നിന്ന് വെള്ളം കുടിക്കുകയും വിശപ്പകറ്റാന്‍ മരുഭൂമിയിലെ സസ്യങ്ങളുടെ ഇലകള്‍ കഴിക്കുകയും ചെയ്തു. മരുഭൂമിയിലെ ചൂടുള്ള താപനിലയും തണലിന്റെ അഭാവവും സ്ഥിതി കൂടുതല്‍ അപകടകരമാക്കി.

കുടുംബത്തെ കാണാതായതായി റിപ്പോര്‍ട്ട് ചെയ്തതോടെ സഊദി വളണ്ടിയര്‍ റെസ്‌ക്യൂ ടീമായ 'എന്‍ജാദ്' വലിയ തോതിലുള്ള തിരച്ചില്‍ പ്രവര്‍ത്തനം ആരംഭിച്ചു. കാണാതായവരെ കണ്ടെത്താന്‍ സഹായിക്കുന്നതില്‍ വളരെ പ്രസിദ്ധിയാര്‍ജ്ജിച്ച സംഘടനയാണ് എന്‍ജാദ്. മുമ്പ് മരുഭൂമികളിലും പര്‍വതങ്ങളിലും കുടുങ്ങിയ പലരെയും എന്‍ജാദ് രക്ഷപ്പെടുത്തിയിട്ടുണ്ട്.

വിശാലമായ മരുഭൂമിയില്‍ പെട്ടുപോയ കുടുംബത്തെ കണ്ടെത്താന്‍ രക്ഷാസംഘം ഡ്രോണുകള്‍ ഉപയോഗിച്ചു. കൂടാതെ കാല്‍നടയായും വാഹനങ്ങളിലും  തിരച്ചിലിനായി സംഘങ്ങളെ അയച്ചു. മരുഭൂമിയില്‍ കൂടുതല്‍ നേരം കഴിയുന്നത് കടുത്ത നിര്‍ജ്ജലീകരണം, ഹീറ്റ് സ്‌ട്രോക്കിനും കാരണമാകുമെന്നതിനാല്‍, സമയത്തിനെതിരായ ഒരു ഓട്ടമായിരുന്നു അത്.

24 മണിക്കൂറിലധികം നീണ്ട പരിശ്രമത്തിനൊടുവില്‍, കുടുംബത്തെ ഹാല്‍ബന്‍ മരുഭൂമിക്ക് സമീപം കണ്ടെത്തി. സഹായം തേടി അവര്‍ വളരെ ദൂരം നടന്നിരുന്നു. ഇത് രക്ഷാപ്രവര്‍ത്തകര്‍ക്ക് അവരെ കൂടുതല്‍ എളുപ്പത്തില്‍ കണ്ടെത്താന്‍ സഹായിച്ചു.

ചില കുടുംബാംഗങ്ങള്‍ക്ക് നിര്‍ജ്ജലീകരണം സംഭവിച്ചിരുന്നു. എന്‍ജാദ് ടീം ഉടന്‍ തന്നെ അവര്‍ക്ക് വെള്ളവും ഭക്ഷണവും വൈദ്യസഹായവും നല്‍കി. 

സഊദി അറേബ്യയിലെ നിരവധി ആളുകള്‍ എന്‍ജാദ് വളണ്ടിയര്‍ ടീമിന്റെ സമര്‍പ്പണത്തെയും ധൈര്യത്തെയും പ്രശംസിച്ചു രംഗത്തുവന്നു. വിദൂര മരുഭൂമികളിലൂടെ സഞ്ചരിക്കുമ്പോള്‍ തയ്യാറെടുപ്പുകളുടെ പ്രാധാന്യം ഈ സംഭവം എടുത്തുകാണിക്കുന്നു.

An adventure trip turned into an ordeal as a family's car got stuck in the Saudi desert, leaving them without food or water for 24 hours before a volunteer rescue team intervened.