കോഴിക്കോട്: ലഹരി മാഫിയ സംഘത്തില്‍ നിന്ന് രക്ഷപ്പെട്ട യുവതിക്ക് വധഭീഷണി. കോഴിക്കോട് ഒളവണ്ണ സ്വദേശിയായ യുവതിയാണ് പരാതിയുമായി എത്തിയത്. ചക്കുകടവ് ചെന്നാലേരി സ്വദേശി സലിം എന്നയാള്‍ കഴിഞ്ഞ ദിവസം യുവതിയെ കുത്തിപ്പരിക്കേല്‍പിച്ചിരുന്നു. ഈ സംഭവത്തില്‍ ഇയാളെ പൊലിസ് പിടികൂടുകയും കോടതിയില്‍ ഹാജരാക്കി റിമാന്‍ഡും ചെയ്തിരുന്നു. സലിം പുറത്തിറങ്ങിയാല്‍ തന്നെ അപായപ്പെടുത്തുമെന്നാണ് ചികിത്സയിലുള്ള യുവതി പറയുന്നത്.

2016ലാണ് മൊബൈല്‍ ഫോണ്‍ വിളിയിലൂടെ ഇയാള്‍  യുവതിയെ പരിചയപ്പെടുന്നത്. പിന്നീട് ഇവളെ ഇയാള്‍ ലഹരിക്കടത്തിനായി ഉപയോഗിക്കുകയായിരുന്നു. 2018ല്‍ കോഴിക്കോട് റെയില്‍വേ സ്‌റ്റേഷന്‍ പരിസരത്ത് കഞ്ചാവുമായി യുവതിയെ പൊലിസ് പിടികൂടിയിരുന്നു. ശിക്ഷകഴിഞ്ഞു പുറത്തിറങ്ങിയ ശേഷം ഇയാളില്‍നിന്ന് അകലം പാലിക്കാന്‍ ശ്രമിച്ചെങ്കിലും കൂടെനിന്നില്ലെങ്കില്‍ കൊല്ലുമെന്ന് ഇയാള്‍ ഭീഷണിപ്പെടുത്തിയതായും യുവതി പറഞ്ഞു.

സഹോദരിയുടെ മകനെ കള്ളക്കേസില്‍  കുടുക്കുമെന്ന ഭീഷണിയുണ്ടെന്നും പറഞ്ഞു. കോഴിക്കോട്  സിറ്റി പൊലിസ് കമ്മീഷണര്‍ക്ക് ഇതുസംബന്ധിച്ച് പരാതി നല്‍കിയിരുന്നു. പരാതി കൊടുത്ത പിറ്റേദിവസം തന്നെ ബസ് കാത്തു നില്‍ക്കുകയായിരുന്ന യുവതിയെ പ്രതി കുത്തിപ്പരിക്കേല്‍പിക്കുകയായിരുന്നു.