തിരുവനന്തപുരം: യാത്രക്കാരുമായി എത്തിയ എയർ ഇന്ത്യ വിമാനം  സാങ്കേതിക തകരാറിനിടയിലും തിരുവനന്തപുരം എയർപോർട്ടിൽ സുരക്ഷിതമായി ലാൻഡ് ചെയ്തു. ലാൻഡിങ് ഗിയറിൽ പ്രശ്നം ഉണ്ടായിരുന്നതായാണ് വിവരം. 72 യാത്രക്കാരായിരുന്നു വിമാനത്തിലുണ്ടായിരുന്നത്. യാത്രക്കാരെല്ലാം സുരക്ഷിതരാണ്.

കണ്ണൂരിൽ നിന്ന് തിരുവനന്തപുരത്തേക്ക് വന്ന വിമാനത്തിനാണ് പ്രശ്നമുണ്ടായത്. വിമാനം ലാൻഡ് ചെയ്യുന്നതിനിടെ ഗിയറിന് പ്രശ്നം അനുഭവപ്പെടുകയായിരുന്നു. എങ്കിലും അപകടം കൂടാതെ വിമാനം സുരക്ഷിതമായി തിരുവനന്തപുരത്ത് ഇറക്കി. എയർ ഇന്ത്യയുടെ ബോയിംഗ് 737 ഇനത്തിൽ പെട്ട വിമാനത്തിലാണ് തകരാർ കണ്ടെത്തിയത്.