കുവൈത്ത് സിറ്റി: രാജ്യത്തെ താമസ നിയമങ്ങള്‍ ലംഘിച്ച് കഴിയുന്നവരെ കണ്ടെത്തുന്നതിനായി കുവൈത്ത് ആഭ്യന്തര മന്ത്രാലയം സുരക്ഷാ പരിശോധനകള്‍ ശക്തമാക്കി. താമസസ്ഥലം മാറുന്ന പ്രവാസികള്‍ നിശ്ചിത സമയത്തിനുള്ളില്‍ വിലാസം പുതുക്കിയില്ലെങ്കില്‍ വന്‍തുക പിഴ ഈടാക്കുമെന്ന് അധികൃതര്‍ മുന്നറിയിപ്പ് നല്‍കി.
താമസസ്ഥലം മാറിയാല്‍ 30 ദിവസത്തിനുള്ളില്‍ പുതിയ വിലാസം സിവില്‍ ഐഡിയില്‍ രേഖപ്പെടുത്തണം. ഇതില്‍ വീഴ്ച വരുത്തുന്നവരില്‍ നിന്ന് 100 കുവൈത്ത് ദീനാര്‍ (ഏകദേശം 27,000 രൂപ) പിഴ ഈടാക്കുമെന്ന് പബ്ലിക് അതോറിറ്റി ഫോര്‍ സിവില്‍ ഇന്‍ഫര്‍മേഷന്‍ അറിയിച്ചു. അനധികൃതമായി താമസിക്കുന്നവരെയും നിയമലംഘകരെയും നിയമത്തിന് മുന്നില്‍ കൊണ്ടുവരുന്നതിന്റെ ഭാഗമായാണ് ഈ നടപടി.
ആഭ്യന്തര മന്ത്രി ശൈഖ് ഫഹദ് അല്‍ യൂസഫിന്റെ നേരിട്ടുള്ള നിര്‍ദ്ദേശപ്രകാരം വിവിധ ഗവര്‍ണറേറ്റുകളില്‍ സുരക്ഷാ ക്യാമ്പയിനുകള്‍ നടന്നുവരികയാണ്. ഇഖാമ കാലാവധി കഴിഞ്ഞിട്ടും രാജ്യം വിടാത്തവര്‍ക്കെതിരെ കര്‍ശന നടപടിയുണ്ടാകും. വിസ നിയമങ്ങള്‍ ലംഘിച്ച് മറ്റ് തൊഴിലുടമകളുടെ കീഴില്‍ ജോലി ചെയ്യുന്നവരെ കണ്ടെത്താന്‍ ലേബര്‍ ക്യാമ്പുകളിലും വ്യാവസായിക മേഖലകളിലും പരിശോധന നടക്കുന്നുണ്ട്.
നിയമലംഘനത്തിന് പിടിക്കപ്പെടുന്നവരെ ഉടന്‍ തന്നെ നാടുകടത്തല്‍ കേന്ദ്രത്തിലേക്ക് മാറ്റുകയും അവര്‍ക്ക് പിന്നീട് കുവൈത്തിലേക്ക് മടങ്ങിവരാന്‍ കഴിയാത്ത വിധം ആജീവനാന്ത വിലക്ക് ഏര്‍പ്പെടുത്തുകയും ചെയ്യും.

ഡിജിറ്റല്‍ പരിശോധന

സിവില്‍ ഐഡി കൈവശം വെക്കാത്തവര്‍ക്കും 'ഹോയ്തി' (കുവൈത്ത് മൊബൈല്‍ ഐ.ഡി) ആപ്പ് വഴി ഐഡി കാണിക്കാന്‍ കഴിയാത്തവര്‍ക്കും പിഴയുണ്ടാകും. പ്രവാസികള്‍ എപ്പോഴും സാധുവായ താമസ രേഖകള്‍ കൈവശം വെക്കണമെന്ന് മന്ത്രാലയം അഭ്യര്‍ത്ഥിച്ചു. താമസ നിയമം ലംഘിക്കുന്നവര്‍ക്ക് അഭയം നല്‍കുന്നവര്‍ക്കെതിരെയും നിയമനടപടി സ്വീകരിക്കും.
അടുത്തിടെ പ്രഖ്യാപിച്ച പൊതുമാപ്പ് ആനുകൂല്യങ്ങള്‍ ഉപയോഗിക്കാത്തവര്‍ക്ക് മേല്‍ ഒരു ഇളവും ഉണ്ടാകില്ലെന്ന് അധികൃതര്‍ വ്യക്തമാക്കിയിട്ടുണ്ട്. ഇത്തരക്കാരെ കണ്ടെത്തുന്നതിനായി 24 മണിക്കൂറും നിരീക്ഷണം ശക്തമാക്കി.

ALSO READ: റമദാനില്‍ ഗസ്സയിലേക്ക് യു.എ.ഇയുടെയും ബഹ്‌റൈന്റെയും കാരുണ്യം; 100 ടണ്‍ അടിയന്തര സഹായം

Summary: The Kuwait Ministry of Interior has intensified security inspections to identify residency law violators. Authorities have issued a stern warning that expatriates who fail to update their residential address within the stipulated time will face heavy fines.