വാഷിങ്ടൺ: ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തിന്റെ പശ്ചാത്തലത്തിൽ ഇന്ത്യയും പാകിസ്താനും തമ്മിലുള്ള സംഘർഷത്തിൽ ഇടപെടില്ലെന്ന് യുഎസ് പ്രസിഡന്റ് ഡൊണാൾഡ് ട്രംപ്. ഇരു രാജ്യങ്ങളും ചേർന്ന് പ്രശ്നം പരിഹരിക്കുമെന്നും, ഇന്ത്യയുമായും പാകിസ്താനുമായും തനിക്ക് അടുത്ത ബന്ധമുണ്ടെന്നും ട്രംപ് വ്യക്തമാക്കി.

റോമിലേക്കുള്ള യാത്രാമധ്യേ എയർഫോഴ്‌സ് വണ്ണിൽ മാധ്യമപ്രവർത്തകരോട് സംസാരിക്കവെയാണ് ട്രംപിന്റെ പ്രതികരണം. "ഇന്ത്യയുമായും പാകിസ്താനുമായും ഞാൻ വളരെ അടുത്ത ബന്ധം പുലർത്തുന്നു. കശ്മീരിൽ ഏകദേശം 1,500 വർഷമായി ഇരു രാജ്യങ്ങളും തമ്മിൽ സംഘർഷം നിലനിൽക്കുന്നു. പഹൽഗാമിലെ ഭീകരാക്രമണം ഞെട്ടിക്കുന്ന സംഭവമായിരുന്നു. എന്നാൽ, ഇരു രാജ്യങ്ങളും ഒരു വിധത്തിലല്ലെങ്കിൽ മറ്റൊരു വിധത്തിൽ ഈ പ്രശ്നം പരിഹരിക്കുമെന്ന് എനിക്ക് ഉറപ്പുണ്ട്," ട്രംപ് പറഞ്ഞതായി എഎൻഐ റിപ്പോർട്ട് ചെയ്തു.

ഭീകരാക്രമണത്തെ തുടർന്ന് പ്രധാനമന്ത്രി നരേന്ദ്ര മോദിയെ ഫോണിൽ വിളിച്ച ട്രംപ്, ആക്രമണത്തെ ശക്തമായി അപലപിക്കുകയും കുറ്റവാളികളെ നിയമത്തിന് മുന്നിൽ കൊണ്ടുവരുന്നതിന് ഇന്ത്യക്ക് പൂർണ പിന്തുണ വാഗ്ദാനം ചെയ്യുകയും ചെയ്തിരുന്നു. "ഇന്ത്യയും പാകിസ്താനും തമ്മിൽ എക്കാലത്തും സംഘർഷങ്ങൾ ഉണ്ടായിട്ടുണ്ട്. രണ്ട് രാജ്യങ്ങളിലെയും നേതാക്കളെ എനിക്ക് നേരിട്ട് അറിയാം. അവർ ഈ പ്രശ്നം പരിഹരിക്കുമെന്നാണ് എന്റെ വിശ്വാസം," ട്രംപ് കൂട്ടിച്ചേർത്തു.