ഐപിഎല്ലിൽ ഈ സീസണിൽ നിരാശാജനകമായ പ്രകടനമാണ് രാജസ്ഥാൻ റോയൽസ് നടത്തിക്കൊണ്ടിരിക്കുന്നത്. ക്യാപ്റ്റൻ സഞ്ജു സാംസണിന്റെ പരുക്കും ഫിനിഷർമാരുടെ ഫോമില്ലായ്മയുമാണ് രാജസ്ഥാൻ നേരിടുന്ന പ്രധാന വെല്ലുവിളി. ഇപ്പോൾ സഞ്ജു സാംസണിന്റെ അഭാവത്തെക്കുറിച്ച് സംസാരിക്കുകയാണ് രാജസ്ഥാൻ പേസർ സന്ദീപ് ശർമ്മ. സഞ്ജു വളരെ പരിചയസമ്പന്നനായ ക്യാപ്റ്റനും താരവും ആണെന്നും സഞ്ജുവിന്റെ അഭാവം ടീമിനെ ബാധിച്ചുവെന്നുമാണ് സന്ദീപ് പറഞ്ഞത്. 

''അദ്ദേഹത്തിന്റെ അഭാവം തീർച്ചയായും അനുഭവപ്പെടുന്നുണ്ട്. അദ്ദേഹം വളരെ പരിചയ സമ്പന്നനായ ക്യാപ്റ്റനും കളിക്കാരനുമാണ്‌. ഒരു ബാറ്റർ എന്ന നിലയിൽ അദ്ദേഹം മികച്ചതാണ്. അതുകൊണ്ട് തന്നെ അദ്ദേഹത്തിന്റെ അഭാവം തീർച്ചയായും അനുഭവപ്പെട്ടു. ആദ്യ മൂന്ന് മത്സരങ്ങളിൽ അദ്ദേഹം ക്യാപ്റ്റൻ ആയിരുന്നില്ല. ഇതിനു ശേഷം അദ്ദേഹത്തിന് ഒരു സൈഡ് ലൈൻ ഇഞ്ചുറിയും ഉണ്ടായി. ഇതെല്ലം ഞങ്ങൾക്ക് നഷ്ടമുണ്ടാക്കി. ഈ കാര്യങ്ങൾ എല്ലാം ഒത്തുചേർന്നു പോവുന്ന ഒരു ടീമിനെ പിന്നോട്ട് വലിക്കുന്ന ഘടകമാണ്'' സന്ദീപ് ശർമ്മ പറഞ്ഞു. 

ഡൽഹി ക്യാപ്പിറ്റൽസിനെതിരായ മത്സരത്തിൽ ആണ് സഞ്ജു പരുക്കേറ്റ് പുറത്തായത്. മത്സരത്തിൽ മികച്ച തുടക്കമായിരുന്നു രാജസ്ഥനായി സഞ്ജു നൽകിയത്. മത്സരത്തിൽ 19 പന്തിൽ 31 റൺസായിരുന്നു സഞ്ജു നേടിയിരുന്നത്. രണ്ട് ഫോറുകളും ഒരു സിക്‌സും നേടിക്കൊണ്ട് മിന്നും ഫോമിൽ തുടരവെയാണ് സഞ്ജുവിനു ഈ തിരിച്ചടി നേരിടേണ്ടി വന്നത്. 

അവസാന മത്സരത്തിൽ റോയൽ ചലഞ്ചേഴ്സ് ബെംഗളൂരുവിനെതിരെ 11 റൺസിനായിരുന്നു രാജസ്ഥാൻ പരാജയപ്പെട്ടത്. ബെംഗളൂരുവിന്റെ തട്ടകമായ ചിന്നസ്വാമി സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ആർസിബി 20 ഓവറിൽ അഞ്ചു വിക്കറ്റ് നഷ്ടത്തിൽ 205 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ രാജസ്ഥാന്റെ ഇന്നിംഗ്സ് 20 ഓവറിൽ ഒമ്പത് വിക്കറ്റ് നഷ്ടത്തിൽ 194 റൺസിൽ അവസാനിക്കുകയായിരുന്നു.

നിലവിൽ ഐപിഎൽ പോയിന്റ് പട്ടികയിൽ ഒമ്പതാം സ്ഥാനത്താണ് രാജസ്ഥാൻ. ഒമ്പത് മത്സരങ്ങളിൽ നിന്നും രണ്ട് ജയവും ഏഴ് തോൽവിയും അടക്കം നാല് പോയിന്റാണ് രാജസ്ഥാനുള്ളത്. ഏപ്രിൽ 28ന് ഗുജറാത്ത് ടൈറ്റൻസിനെതിരെയാണ് രാജസ്ഥാന്റെ അടുത്ത മത്സരം. 

Sandeep Sharma talks about Sanju Samson Absence of Rajasthan Royals in IPL 2025