അഗളി: അട്ടപ്പാടിയിൽ കാട്ടാന ആക്രമണത്തിൽ ആദിവാസി വയോധികൻ കൊല്ലപ്പെട്ടു. സ്വർണ്ണഗദ്ദ ഉന്നതിയിലെ കാളി (63) ആണ് മരിച്ചത്. പേരകുട്ടിയോടൊപ്പം ഇന്നലെ ചെമ്പുവെട്ടക്കാട് കാട്ടിലേക്ക് വിറക് ശേഖരിക്കാൻ പോയപ്പോൾ കാട്ടാനകൂട്ടത്തിന് മുന്നിൽ അകപ്പെടുകയായിരുന്നു.

ശബ്ദം കേട്ട് കൂടയുള്ളവർ വനം വകുപ്പിനെ വിവരം അറിയിച്ചു. തുടർന്ന് പരിക്കേറ്റ് കിടന്നിരുന്ന വയോധികനെ തുണിമഞ്ചലിൽ ചുമന്ന് ഫോറസ്റ്റ് വാഹനത്തിൽ കോട്ടത്തറ ട്രൈബൽ താലൂക്ക് ആശുപത്രിയിലും പിന്നീട് തൃശൂർ മെഡിക്കൽ കോളജിലേക്ക് കൊണ്ട് പോകുന്നതിനിടെ സ്ഥിതി ഗുരുതരമായതിനാൽ പാലക്കാട് ജില്ലാ ആശുപത്രിയിലേക്കും മാറ്റുകയായിരുന്നു. വൈകിട്ട് ആറോടെയാണ് മരണപ്പെടുകയായിരുന്നു. കാളിയുടെ കൈകാലുകൾക്കും നെഞ്ചിലും ഗുരുതര പരുക്കേറ്റിരുന്നു. ഒന്നരവർഷത്തിന് ശേഷമാണ് അട്ടപ്പാടിയിൽ കാട്ടാനാക്രമണത്തിൽ മരണം സംഭവിക്കുന്നത്.