തിരുവനന്തപുരം: ഐബി ഉദ്യോഗസ്ഥ ജീവനൊടുക്കിയ സംഭവത്തില്‍ പ്രതിയായ സുകാന്തിന്റെ മാതാപിതാക്കള്‍ ചാവക്കാട് പൊലിസ് സ്റ്റേഷനില്‍ ഹാജരായി. സുരേഷ്, ഗീത എന്നിവരാണ് പൊലിസ് സ്റ്റേഷനില്‍ ഹാജരായത്. തിരുവനന്തപുരം പേട്ടയില്‍ നിന്നുള്ള പൊലിസ് സംഘം സുകാന്തിന്റെ മാതാപിതാക്കളുടെ മൊഴിയെടുക്കാനായി ചാവക്കാട്ടേക്ക് പുറപ്പെട്ട. നിലവില്‍ സുകാന്തിന്റെ മാതാപിതാക്കള്‍ കേസില്‍ പ്രതികളല്ല. സുകാന്തിനെതിരെ ഐബി ഉദ്യോഗസ്ഥയുടെ കുടുംബം പരാതി നല്‍കിയതോടെ ഇവര്‍ മലപ്പുറത്തെ വീടുവിട്ട് മാറിത്താമസിക്കുകയായിരുന്നു.

മാര്‍ച്ച് 24നാണ് പേട്ട റെയില്‍വേ പാലത്തിനടുത്തായി ഐബി ഉദ്യോഗസ്ഥയെ തീവണ്ടി തട്ടിമരിച്ച നിലയില്‍ കണ്ടെത്തിയത്. സംഭവത്തില്‍ ആദ്യം അസ്വാഭ്വാവിക മരണത്തിന് കേസെടുത്ത പൊലിസ് പിന്നീട് യുവതിയുടെ കുടുംബം പരാതി നല്‍കിയതോടെ സുകാന്തിനെതിരെ ബലാത്സംഗക്കുറ്റം ഉള്‍പ്പെടെ ചുമത്തി കേസെടുത്തിരുന്നു. 

ഐബി ഉദ്യോഗസ്ഥയെ സാമ്പത്തികമായി ചൂഷണം ചെയ്‌തെന്നായിരുന്നു സുകാന്തിനെതിരെ യുവതിയുടെ കുടുംബം ആദ്യമുന്നയിച്ച പരാതി. പിന്നീട് യുവതിയെ ലൈംഗികമായി പീഡിപ്പിച്ചതിന്റെ തെളിവുകളും കൈമാറിയിരുന്നു. 

യുവതിയുമായി സൗഹൃദം സ്ഥാപിച്ച ശേഷം സുകാന്ത് പലതവണകളായി പണം കൈക്കലാക്കിയെന്നായിരുന്നു കുടുംബത്തിന്റെ പരാതി.