തിരുവനന്തപുരം: മെയ് 1 തൊഴിലാളി ദിനത്തിലും സമരപന്തലിൽ ആശാപ്രവർത്തകർ. സമരം കൂടുതൽ ശക്തിപ്പെടുത്താനൊരുങ്ങിയിരിക്കുകയാണ് പ്രവർത്തകർ. സമരത്തിന്റെ ഭാഗമായി ഇന്ന് രാവിലെ പത്തുമണിക്ക് മെയ് ദിന റാലിയും, വൈകിട്ട് രാപ്പകൽ സമരയാത്രയുടെ ഫ്‌ളാഗ് ഓഫ് ചടങ്ങും നടക്കും. സമരയാത്രയുടെ ക്യാപ്റ്റനായ എം.എ. ബിന്ദുവിന് പ്രമുഖ ഗാന്ധിയൻ ഡോ. എം.പി. മത്തായി പതാക കൈമാറും.

മെയ് 5 മുതൽ കാസർകോട് ആരംഭിച്ച് മെയ് 17ന് തിരുവനന്തപുരം മാർച്ച് അവസാനിക്കും. വിവിധ ജില്ലകളിൽ ഉൾപ്പെട്ടു മുന്നേറുന്ന സമരയാത്ര, ആശാ പ്രവർത്തകർ അനുഭവിക്കുന്ന അവഗണനയും ആവശ്യങ്ങളും മുൻനിർത്തിയാണ്. അതേസമയം, ആശാ പ്രവർത്തകർ നടത്തുന്ന റിലേ നിരാഹാര സമരം ഇന്നേക്ക് 42 ദിവസമായി. എൻ. ശോഭനകുമാരി, ലേഖ സുരേഷ്, പി. ലാര്യ എന്നിവർ ഇപ്പോഴും നിരാഹാരത്തിലാണ്.