കോഴിക്കോട്: മെഡിക്കൽ കോളേജ് ആശുപത്രിയുടെ അത്യാഹിത വിഭാഗത്തിന് സമീപമുള്ള യുപിഎസ് റൂമിൽ പുക ഉയർന്നതിനെ തുടർന്ന് രോഗികളെ അടിയന്തരമായി മാറ്റി. സംഭവത്തിൽ ആരോഗ്യ മന്ത്രി വീണ ജോർജ് അന്വേഷണത്തിന് ഉത്തരവിട്ടു. ഷോർട് സർക്യൂട്ട് എന്നാണ് പ്രാഥമിക നി​ഗമനം. ഇന്ന് രാത്രി 8 മണിയോടെയാണ് സംഭവം. പുകയുടെ ഉറവിടം സംബന്ധിച്ച് വ്യക്തതയില്ലെങ്കിലും, സ്ഥിതിഗതികൾ നിയന്ത്രണവിധേയമാണെന്ന് ആശുപത്രി സൂപ്രണ്ട് ഡോ. ശ്രീജയൻ അറിയിച്ചു. മെഡിക്കൽ കോളേജിലെ പുതുതായി നിർമ്മിച്ച അത്യാഹിത വിഭാഗത്തിലെ കെട്ടിടത്തിൽ നിന്നാണ് പുക ഉയർന്നത്. 

അത്യാഹിത വിഭാഗത്തിലെ ഉപകരണങ്ങൾ പുറത്തേക്ക് മാറ്റുകയും 200-ലധികം രോഗികളെ മെഡിക്കൽ കോളേജിന്റെ പ്രധാന കെട്ടിടത്തിലേക്ക് സുരക്ഷിതമായി മാറ്റുകയും ചെയ്തു. ഇവിടെ ആവശ്യമായ എല്ലാ സൗകര്യങ്ങളും ഒരുക്കിയിട്ടുണ്ട്. അത്യാഹിത വിഭാഗം ബ്ലോക്ക് പൂർണമായും ഒഴിപ്പിച്ചു. പുക വലിച്ചെടുക്കാനുള്ള നടപടികൾ തുടരുകയാണ്.

ഫയർ ഫോഴ്സ് സംഘം സ്ഥലത്തെത്തി പ്രവർത്തനങ്ങൾ ഏകോപിപ്പിക്കുന്നു. നഗരത്തിലെ എല്ലാ ആംബുലൻസുകളും മെഡിക്കൽ കോളേജിലേക്ക് തിരിച്ചിട്ടുണ്ട്. ആശങ്കപ്പെടേണ്ട സാഹചര്യമില്ലെന്നും രോഗികൾക്ക് തുടർ ചികിത്സ ഉറപ്പാക്കിയിട്ടുണ്ടെന്നും സൂപ്രണ്ട് വ്യക്തമാക്കി.