വാഷിങ്ടണ്‍: ദേശീയ സുരക്ഷയുമായി ബന്ധപ്പെട്ട വിവരങ്ങള്‍ ചോര്‍ത്തിയ സുരക്ഷാ ഉപദേഷ്ടാവിനെ സ്ഥാനത്തു നിന്ന് മാറ്റി യു.എന്‍ അംബാസഡറായി നാമനിര്‍ദ്ദേശം ചെയ്ത് യു.എസ് പ്രസിഡന്റ് ഡൊണാള്‍ഡ് ട്രംപ്. തന്റെ ദേശീയ സുരക്ഷാ ഉപദേഷ്ടാവ് മൈക്ക് വാള്‍ട്ട്‌സിനെയാണ് ഐക്യരാഷ്ട്രസഭയിലെ അംബാസഡറായി നാമനിര്‍ദേശം ചെയ്തിരിക്കുന്നത്. വിദേശകാര്യ സെക്രട്ടറി മാര്‍ക്കോ റൂബിയോ താല്‍ക്കാലിക ദേശീയ സുരക്ഷാ ഉപദേഷ്ടാവായി പ്രവര്‍ത്തിക്കുമെന്നും ട്രംപ് പ്രഖ്യാപിച്ചു.

യമനിലെ ഹൂതികള്‍ക്കെതിരായ ആക്രമണത്തിന്റെ വിരങ്ങള്‍ ചോര്‍ന്നതിനു പിന്നാലെയാണ് അഴിച്ചു പണി. സംഭവത്തിന് പിന്നാലെ നടക്കുന്ന ട്രംപിന്റെ രണ്ടാം ടേമിലെ ആദ്യത്തെ പ്രധാന ഉദ്യോഗസ്ഥരുടെ അഴിച്ചുപണിയാണിത്. ഫ്‌ളോറിഡയില്‍ നിന്നുള്ള കോണ്‍ഗ്രസ് അംഗമായ വാള്‍ട്ട്‌സ്, 'ദി അറ്റ്‌ലാന്റിക്ക്' പത്രത്തിന്റെ ജെഫ്രി ഗോള്‍ഡ്‌ബെര്‍ഗിനെ ദേശീയ സുരക്ഷാ ഉദ്യോഗസ്ഥരുടെ ഒരു സ്വകാര്യ ചാറ്റില്‍ ആഡ് ചെയ്തിരുന്നു. 

യമനിലെ ഹൂതികള്‍ക്കെതിരായ സൈനിക ആക്രമണം ഏകോപിപ്പിക്കുന്നതുമായി ബന്ധപ്പെട്ട അതീവ രഹസ്യങ്ങളാണ് ചാറ്റില്‍ ചര്‍ച്ച ചെയ്തിരുന്നത്. ആക്രമണത്തിനു ശേഷമുള്ള പ്രധാന പ്രവര്‍ത്തനങ്ങളുടെ വിശദാംശങ്ങള്‍, സമയം, ആയുധ പാക്കേജുകള്‍ തുടങ്ങിയ അതീവ സുരക്ഷാ രഹസ്യങ്ങള്‍ പ്രസിദ്ധീകരിക്കുന്നതിന് ഇത് കാരണമായിരുന്നു.

അതേസമം, ദേശീയ ഉപദേഷ്ടാവ് സ്ഥാനത്തുനിന്ന് നീക്കി, വാള്‍ട്ട്സിന്റെ പ്രവര്‍ത്തനങ്ങള്‍ക്ക് നന്ദി പറഞ്ഞ ട്രംപ്, യുദ്ധഭൂമിയില്‍ യൂണിഫോമിലും കോണ്‍ഗ്രസിലും തന്റെ ദേശീയ സുരക്ഷാ ഉപദേഷ്ടാവ് എന്ന നിലയിലും മൈക്ക് വാള്‍ട്ട്സ് രാഷ്ട്രത്തിന്റെ താത്പര്യങ്ങള്‍ക്കായി കഠിനമായി പരിശ്രമിച്ചതായും 'ട്രൂത്ത് സോഷ്യലില്‍' പങ്കുവെച്ച പോസ്റ്റില്‍ പറഞ്ഞു. 

ട്രംപിന്റെ പ്രഖ്യാപനത്തിന് പിന്നാലെ പ്രസിഡന്റിന് നന്ദി അറിയിച്ചുകൊണ്ട് മൈക്കല്‍ വാള്‍ട്സും സമൂഹമാധ്യമങ്ങളില്‍ ഒരു കുറിപ്പ് പങ്കുവെച്ചു.