കോഴിക്കോട്: മെഡിക്കൽ കോളേജ് ആശുപത്രിയിൽ പുക പരിഭ്രാന്തി ഉയർന്നതിനെ തുടർന്ന് രോഗികൾ മരിച്ച സംഭവത്തിൽ കോഴിക്കോട് മെഡിക്കൽ കോളേജ് പൊലീസ് അസ്വാഭാവിക മരണത്തിന് കേസെടുത്തു. ഗോപാലൻ, ഗംഗാധരൻ, സുരേന്ദ്രൻ, ഗംഗ, നസീറ എന്നിവരാണ് മരിച്ചത്. പുക ശ്വസിച്ചതിനെ തുടർന്നും ശ്വാസംമുട്ടലുമാണ് മരണകാരണമെന്ന ആരോപണത്തിന്റെ പശ്ചാത്തലത്തിലാണ് നടപടി. സംഭവത്തെക്കുറിച്ച് വിശദമായ അന്വേഷണത്തിനായി ഉന്നതതല മെഡിക്കൽ ബോർഡ് യോഗവും ഇന്ന് രാവിലെ 11 മണിക്ക് ചേരും. മുഖ്യമന്ത്രി പിണറായി വിജയനും ആരോ​ഗ്യ മന്ത്രി വീണ ജോർജ്ജും യോ​ഗത്തിൽ എത്തിച്ചേരും.

മരിച്ചവരുടെ മൃതദേഹങ്ങൾ പോസ്റ്റ്‌മോർട്ടം നടത്താൻ തീരുമാനിച്ചതായി മെഡിക്കൽ കോളേജ് പ്രിൻസിപ്പൽ അറിയിച്ചു. മരണകാരണത്തെക്കുറിച്ചുള്ള സംശയങ്ങൾ പോസ്റ്റ്‌മോർട്ടത്തിലൂടെ മാത്രമേ ദൂരീകരിക്കാനാകൂ എന്നും അദ്ദേഹം വ്യക്തമാക്കി. അപകടം നടന്ന കെട്ടിടം പൊലീസ് ഇതിനോടകം സീൽ ചെയ്തിട്ടുണ്ട്. കെട്ടിടത്തിലെ മരുന്നുകൾ മാറ്റുന്നതിന് പ്രിൻസിപ്പൽ പൊലീസിന്റെ സഹായം തേടി. ഇതിനായി അത്യാഹിത വിഭാഗം പഴയ കെട്ടിടത്തിലേക്ക് താത്കാലികമായി മാറ്റാനാണ് തീരുമാനം. 

അതിനിടെ, അപകടത്തെ തുടർന്ന് നിർധനരായ രോഗികൾ പ്രതിസന്ധിയിലായി. സ്വകാര്യ ആശുപത്രികളിൽ പ്രവേശിപ്പിക്കപ്പെട്ടവർക്ക് ചികിത്സാ ചെലവ് താങ്ങാനാകാത്ത സ്ഥിതിയാണ്. കൊയിലാണ്ടി സ്വദേശിനി തങ്കയുടെ കുടുംബം ഇതുസംബന്ധിച്ച് പരാതിയുമായി രംഗത്തെത്തി. കഴിഞ്ഞ ദിവസം കാറ്റിലും മഴയിലും കടയിലെ ബോർഡ് ഇളകി വീണാണ് തങ്കയ്ക്ക് പരുക്കേറ്റത്. ഓപ്പറേഷന് വേണ്ട പണം കണ്ടെത്താനാകാതെ വിഷമിക്കുന്ന കുടുംബം, തങ്കയുടെ ചികിത്സാ ചെലവ് സർക്കാർ ഏറ്റെടുക്കണമെന്ന് ആവശ്യപ്പെട്ടു.