ഐപിഎല്ലിൽ തന്നെ ഏറ്റവും കൂടുതൽ സ്വാധീനിച്ച വ്യക്തി ആരാണെന്ന് തുറന്നു പറഞ്ഞിരിക്കുകയാണ് റോയൽ ചലഞ്ചേഴ്‌സ് ബെംഗളൂരു താരം വിരാട് കോഹ്‌ലി. സൗത്ത് ആഫ്രിക്കൻ ഇതിഹാസം മാർക്ക് ബൗച്ചറിനെകുറിച്ചാണ് വിരാട് സംസാരിച്ചത്. മാർക്ക് ബൗച്ചറുമായി പണ്ട് നടത്തിയ സംഭാഷണം തന്നിലുണ്ടാക്കിയ വലിയ മാറ്റത്തെക്കുറിച്ചും കോഹ്‌ലി സംസാരിച്ചു. ആർ‌സി‌ബി പോഡ്‌കാസ്റ്റിന്റെ എപ്പിസോഡിൽ സംസാരിക്കുകയായിരുന്നു കോഹ്‌ലി.

''ഐപിഎല്ലിന്റെ തുടക്കത്തിൽ ഞാൻ കളിച്ച എല്ലാ താരങ്ങളിലും എന്നെ ഏറ്റവും കൂടുതൽ സ്വാധീനിച്ചത് ബൗച്ചറാണ്. എന്റെ ബലഹീനതകൾ കണ്ടെത്തി അദ്ദേഹം എന്നെ അടുത്ത ഘട്ടത്തിലേക്ക് നയിച്ചു. അദ്ദേഹം എന്നോട് പറഞ്ഞു 'മൂന്നോ നാലോ വർഷങ്ങൾക്ക് ശേഷം ഞാൻ ഇന്ത്യയിൽ കമന്റേറ്ററായി വരുമ്പോൾ നിങ്ങൾ ടീമിനായി കളിക്കുന്നത് കണ്ടില്ലെങ്കിൽ അത് നിങ്ങളുടെ കഴിവിനോട് ചെയ്യുന്ന ഏറ്റവും വലിയ  ദ്രോഹമായിരിക്കും' അദ്ദേഹത്തിന്റെ ഈ വാക്കുകൾ എന്നെ അത്ഭുതപ്പെടുത്തി'' വിരാട് കോഹ്‌ലി പറഞ്ഞു. 

ഐപിഎല്ലിൽ ഈ സീസണിൽ മിന്നും ഫോമിലാണ് കോഹ്‌ലി കളിച്ചുകൊണ്ടിരിക്കുന്നത്. പത്തു മത്സരങ്ങളിൽ നിന്നും 443 റൺസ് ആണ് വിരാട് ഇതുവരെ നേടിയിട്ടുള്ളത്. ആറ് അർദ്ധ സെഞ്ച്വറികളാണ് താരം ഇതുവരെ നേടിയിട്ടുള്ളത്. 262 മത്സരങ്ങളിൽ നിന്നും 8447 റൺസ് ആണ് താരം ഇതുവരെ നേടിയിട്ടുള്ളത്. എട്ട് സെഞ്ച്വറികളും 61 അർദ്ധ സെഞ്ച്വറികളും കോഹ്‌ലി സ്വന്തമാക്കിയിട്ടുണ്ട്. 

ഐപിഎല്ലിൽ ഇന്ന് നടക്കുന്ന മത്സരത്തിൽ റോയൽ ചലഞ്ചേഴ്സ് ബെംഗളൂരുവും ചെന്നൈ സൂപ്പർ കിംഗ്സുമാണ്‌ ഏറ്റുമുട്ടുന്നത്. ആർസിബിയുടെ തട്ടകമായ ചിന്നസ്വാമി സ്റ്റേഡിയത്തിൽ നടക്കുന്ന മത്സരത്തിൽ വിജയം തുടരാൻ തന്നെയായിരിക്കും ബെംഗളൂരു ലക്ഷ്യം വെക്കുക. നിലവിൽ പോയിന്റ് പട്ടികയിൽ 14 പോയിന്റുമായി രണ്ടാം സ്ഥാനത്താണ് ആർസിബി. 

എന്നാൽ മറുഭാഗത്ത് ടൂർണമെന്റിൽ നിന്നും ചെന്നൈ പുറത്തായിരുന്നു. പഞ്ചാബ് കിങ്സിനോടേറ്റ പരാജയത്തിന് പിന്നാലെയാണ്  ചെന്നൈ ഐപിഎല്ലിൽ നിന്നും പുറത്തായത്. അതുകൊണ്ടുതന്നെ ഇനിയുള്ള മത്സരങ്ങൾ എല്ലാം വിജയിച്ചു കൊണ്ട് തലയുയർത്തി മടങ്ങാൻ തന്നെയായിരിക്കും ധോണിയും സംഘവും കളത്തിൽ ഇറങ്ങുക. 

Virat Kohli Talks About Mark Boucher