തിരുവനന്തപുരം: ഓപ്പറേഷൻ സിന്ദൂർ വിഷയത്തിൽ സർവകക്ഷി പ്രതിനിധി സംഘത്തെ നയിക്കാൻ കേന്ദ്രസർക്കാർ ആവശ്യപ്പെട്ടത് അഭിമാനകരമായി കാണുന്നുവെന്ന് കോൺഗ്രസ് എംപി ശശി തരൂർ. രാഷ്ട്രീയത്തിന് പ്രസക്തി രാഷ്ട്രം നിലനിൽക്കുമ്പോൾ മാത്രമാണെന്നും ദേശസേവനം പൗരന്റെ കടമയാണെന്നും അദ്ദേഹം വ്യക്തമാക്കി. കേന്ദ്ര പാർലമെന്ററി കാര്യമന്ത്രി തന്നെ നേരിട്ട് വിളിച്ച് ക്ഷണിച്ചതായും താൻ ഇക്കാര്യം കോൺഗ്രസ് നേതൃത്വത്തെ അറിയിച്ചതായും തരൂർ പറഞ്ഞു.

എനിക്ക് എന്റേതായ മൂല്യമുണ്ട്, ആർക്കും എന്നെ എളുപ്പത്തിൽ അപമാനിക്കാനാവില്ല. 88 മണിക്കൂർ നീണ്ട യുദ്ധത്തിന്റെ പശ്ചാത്തലത്തിൽ രാഷ്ട്രീയം കാണുന്നില്ല. രാജ്യം പ്രതിസന്ധിയിലായിരിക്കുമ്പോൾ ഒരു പൗരന്റെ ഉത്തരവാദിത്തം നിറവേറ്റും,” തരൂർ കൂട്ടിച്ചേർത്തു.

കോൺഗ്രസ് നിർദേശിച്ച നാല് പേരുകളുടെ പട്ടികയിൽ തരൂരിന്റെ പേര് ഉൾപ്പെട്ടിരുന്നില്ല. മുൻ കേന്ദ്രമന്ത്രി ആനന്ദ് ശർമ, ഗൗരവ് ഗെഗോയി, സയ്ദ് നാസർ ഹുസൈൻ, രാജ് ബ്രാർ എന്നിവരുടെ പേര് കോൺഗ്രസ് നിർദേശിച്ചിരുന്നു. എന്നാൽ, കേന്ദ്രസർക്കാർ പുറത്തിറക്കിയ പട്ടികയിൽ ശശി തരൂരിനെ ഉൾപ്പെടുത്തി.

പാകിസ്ഥാന്റെ ഭീകര പ്രവർത്തനങ്ങൾ തുറന്നുകാട്ടാൻ വിവിധ രാജ്യങ്ങൾ സന്ദർശിക്കുന്ന പ്രതിനിധി സംഘങ്ങളെ ശശി തരൂർ ഉൾപ്പെടെയുള്ളവർ നയിക്കും. എൻഡിഎയിൽ നിന്ന് ബിജെപിയുടെ രവിശങ്കർ പ്രസാദ്, ബൈജയന്ത് പാണ്ഡ, ജെഡിയുവിന്റെ സഞ്ജയ് കുമാർ ഝാ, ശിവസേനയുടെ ശ്രീകാന്ത് ഷിൻഡെ, പ്രതിപക്ഷത്ത് നിന്ന് ഡിഎംകെയുടെ കനിമൊഴി, എൻസിപിയുടെ സുപ്രിയ സുലേ എന്നിവരും സംഘങ്ങളെ നയിക്കും.

കേന്ദ്രമന്ത്രി കിരൺ റിജിജു, കോൺഗ്രസ് അധ്യക്ഷൻ മല്ലികാർജുൻ ഖാർഗെയോട് പ്രതിനിധി സംഘത്തിലേക്ക് പേര് നിർദേശിക്കാൻ ആവശ്യപ്പെട്ടിരുന്നു. ഇതിന്റെ അടിസ്ഥാനത്തിൽ കോൺഗ്രസ് നാല് പേരുകൾ നിർദേശിച്ചു. എന്നാൽ, തരൂർ നേരത്തെ ഇന്ത്യ-പാക് വിഷയത്തിൽ പാർട്ടി നിലപാടിന് വിരുദ്ധമായി പ്രസ്താവന നടത്തിയതിന് താക്കീത് ലഭിച്ചിരുന്നുവെന്ന് റിപ്പോർട്ടുകൾ ഉണ്ടായിരുന്നു. ഇത് തരൂർ നിഷേധിച്ചിരുന്നു.

വിവാദങ്ങൾക്കിടയിലാണ് മോദി സർക്കാർ തരൂരിനെ പ്രതിനിധി സംഘത്തിൽ ഉൾപ്പെടുത്തിയത്. കോൺഗ്രസ് വക്താവ് ജയറാം രമേഷ്, പാർട്ടി നിർദേശിച്ച പേര് പട്ടിക എക്സിൽ പങ്കുവെച്ചിരുന്നു.