മഴക്കാലം ആരംഭിക്കാറായി. ഇത്തവണ നേരത്തേയാണ് കാലവര്‍ഷം. അതിന് മുന്നോടിയായി തന്നെ ഇടിമിന്നലോടുകൂടിയ മഴയ്ക്ക് സാധ്യതയുള്ളതായി കാലാവസ്ഥ നിരീക്ഷണ കേന്ദ്രം പറയുന്നു. 

കരുതുന്നപോലെ അത്ര നിസാരമല്ല ഇടിമിന്നലോടുകൂടിയ മഴക്കാലം. സ്വയം ശ്രദ്ധിച്ചാല്‍ ഒരു പരിധിവരെ ഇടിമിന്നല്‍ മൂലമുണ്ടാകുന്ന അപകടങ്ങള്‍ ഒഴിവാക്കാം. തുറസായ സ്ഥലങ്ങളില്‍ കളികളിലോ ജോലിയിലോ ഏര്‍പ്പെടുന്നവര്‍ ജാഗ്രത പാലിക്കണം.

അതേസമയം പലര്‍ക്കും സംശയമുള്ള കാര്യമാണ് മിന്നലേറ്റവരെ തൊട്ടാല്‍ കറണ്ടടിക്കുമോ എന്ന്? എന്നാല്‍ ഈ സംശയത്തിന് കൃത്യമായ മറുപടി തന്നിരിക്കുകയാണ് കെഎസ്ഇബി. 

അതായത് മിന്നലിന്റെ ആഘാതത്താല്‍ പൊള്ളല്‍ ഏല്‍ക്കുകയോ കാഴ്ച്ചയോ കേള്‍വിയോ നഷ്ടമാവുകയോ ഹൃദയാഘാതം സംഭവിയ്ക്കുകയോ വരെ ചെയ്യാം. മിന്നലാഘാതം ഏറ്റ ആളിന്റെ ശരീരത്തില്‍ വൈദ്യുത പ്രവാഹം ഇല്ല എന്ന് മനസ്സിലാക്കണം. അതിനാല്‍ മിന്നലേറ്റ ആളിന് പ്രഥമ ശുശ്രൂഷ നല്‍കുവാന്‍ മടിക്കരുത്. മിന്നല്‍ ഏറ്റാല്‍ ആദ്യ മുപ്പത് സെക്കന്‍ഡ് ജീവന്‍ രക്ഷിക്കാനുള്ള സുവര്‍ണ നിമിഷങ്ങളാണ്. മിന്നലേറ്റ ആളിന് ഉടന്‍ വൈദ്യ സഹായം എത്തിക്കുക.