കോഴിക്കോട്: കൊടുവള്ളിയിൽ യുവാവിനെ വീട്ടിൽനിന്ന് സിനിമാസ്റ്റൈലിൽ തട്ടിക്കൊണ്ടുപോയി. കിഴക്കോത്ത് പരപ്പാറ ആയിക്കോട്ടിൽ റഷീദിന്റെ മകൻ അനൂസ് റോഷനെ (21) ആണ് വൈകീട്ട് നാല് മണിയോടെ ആയുധങ്ങളുമായി കാറിൽ എത്തിയ സംഘം തട്ടിക്കൊണ്ടുപോയത്. പ്രതികൾ എത്തിയ കെ.എൽ 65 എൽ 8306 നമ്പർ കാറിന്റെ ദൃശ്യങ്ങൾ സമീപത്തെ സിസിടിവി കാമറയിൽ പതിഞ്ഞിട്ടുണ്ട്.

സംഘം കടന്നുകളയുന്നതിന്റെ ദൃശ്യങ്ങളും സിസിടിവിയിൽ റെക്കോർഡ് ചെയ്തിട്ടുണ്ട്. അനൂസ് റോഷന്റെ സഹോദരൻ അജ്മൽ റോഷൻ വിദേശത്താണ്. വിദേശത്ത് നടന്ന സാമ്പത്തിക ഇടപാടുകളുമായി ബന്ധപ്പെട്ട തർക്കങ്ങളാണ് തട്ടിക്കൊണ്ടുപോകലിന് കാരണമെന്നാണ് പ്രാഥമിക നിഗമനം. വിദ്യാർഥിയായ അനൂസ് റോഷനെ തട്ടിക്കൊണ്ടുപോയ സംഘത്തിന് സ്വർണകടത്ത് സംഘവുമായി ബന്ധമുണ്ടോ എന്നും പൊലീസ് അന്വേഷിക്കുന്നു.

കൊടുവള്ളി പൊലീസ് കേസെടുത്ത് അന്വേഷണം ആരംഭിച്ചു. സിസിടിവി ദൃശ്യങ്ങൾ കേന്ദ്രീകരിച്ച് പ്രതികളെ കണ്ടെത്താനുള്ള ശ്രമങ്ങൾ തുടങ്ങിയതായി പൊലീസ് അറിയിച്ചു.