ന്യൂഡല്‍ഹി: ഇന്ത്യന്‍ പ്രീമിയര്‍ ലീഗില്‍ പുതിയ റെക്കോഡ് സ്വന്തമാക്കി രോഹിത് ശര്‍മ. ടൂര്‍ണമെന്റില്‍ 7000 റണ്‍സ് സ്വന്തമാക്കുന്ന രണ്ടാമത്തെ താരമായി രോഹിത് മാറിയിരിക്കുകയാണ്. വിരാട് കോഹ്‌ലി മാത്രമാണ് രോഹിത്തിന് മുന്നില്‍ ഈ നേട്ടം കൈവരിച്ച താരം. 

ഗുജറാത്ത് ടൈറ്റന്‍സിനെതിരായ രണ്ടാം എലിമിനേറ്ററില്‍ 81 റണ്‍സെടുത്ത് രോഹിത്ത് മുംബൈ ഇന്ത്യന്‍സിന്റെ ടോപ് സ്‌കോറര്‍ ആയിരുന്നു. 50 പന്തിലാണ് താരം 81 റണ്‍സെടുത്തത്. വിരാടിന് 268 മത്സരങ്ങളില്‍ നിന്ന് 8618 ഐ.പി.എല്‍ റണ്‍സാണ് ഉള്ളത്. രോഹിത്തിന് ഇതുവരെ 7038 റണ്‍സാണ് നേടാനായിട്ടുള്ളത്. 

മറ്റൊരു റെക്കോഡും രോഹിത്തിനെ തേടിയെത്തി. 300 സിക്‌സറുകള്‍ എന്ന നേട്ടമാണ് രോഹിത് സ്വന്തമാക്കിയത്. ക്രിസ് ഗെയിലിന് ശേഷം ഇത്രയും സിക്‌സറുകള്‍ നേടുന്ന രണ്ടാമത്തെ താരമായും ഹിറ്റ്മാന്‍ മാറി.

അതേസമയം ഇന്നലെ നടന്ന ഐപിഎല്‍ എലിമിനേറ്റര്‍ പോരാട്ടത്തില്‍ മുംബൈ ഇന്ത്യന്‍സ് ഗുജറാത്ത് ടൈറ്റന്‍സിനെ പരാജയപ്പെടുത്തി. മത്സരത്തില്‍ 20 റണ്‍സിനായിരുന്നു മുംബൈയുടെ വിജയം.

ടോസ് നേടി ബാറ്റിങ്ങിനിറങ്ങിയ മുംബൈ 20 ഓവറില്‍ 228 റണ്‍സാണ് നേടിയത്. എന്നാൽ മറുപടി ബാറ്റിങ്ങിൽ ​ഗുജറാത്തിന്റെ ഇന്നിങ്സ് 208 റൺസിൽ അവസാനിച്ചു. 50 പന്തില്‍ 9 ഫോറും 4സിക്‌സും ഉള്‍പ്പെടെ 81 റണ്‍സ് നേടിയ രോഹിത് ശര്‍മയാണ് മുംബൈയുടെ ടോപ് സ്‌കോറര്‍. ജോണി ബെയര്‍സ്‌റ്റോ 47, സൂര്യകുമാര്‍ യാദവ് 33 എന്നിവരും മുംബൈക്കായി തിളങ്ങി. ഗുജറാത്തിനായി സായ് കിഷോര്‍, പ്രസിദ് കൃഷ്ണ എന്നിവര്‍ രണ്ട് വിക്കറ്റ് വീതം നേടിയപ്പോള്‍, മുഹമ്മദ് സിറാജ് ഒരു വിക്കറ്റ് നേടി. 

മറുപടി ബാറ്റിങ്ങില്‍ ഗുജറാത്തിന്റെ തുടക്കം തന്നെ പാളി മൂന്ന് റണ്‍സില്‍ നില്‍ക്കെ ക്യാപ്റ്റന്‍ ശുഭ്മാന്‍ ഗില്‍ പുറത്ത്. പിന്നീട് മികച്ച രീതിയില്‍ മുന്നോട്ടു പോകവെ കുശാല്‍ മെന്‍ഡിസ് ഹിറ്റ് വിക്കറ്റായതും ഗുജറാത്തിന് തിരിച്ചടിയായി. 49 പന്തില്‍ 10 ഫോറും ഒരു സിക്‌സും ഉള്‍പ്പെടെ 80 റണ്‍സ് നേടിയ സായ് സുദര്‍ശനും, 24 പന്തില്‍ 5 ഫോറും 3 സിക്‌സും ഉള്‍പ്പെടെ 48 റണ്‍സ് നേടിയ വാഷിങ്ടണ്‍ സുന്ദറുമാണ് ഗുജറാത്തിന്റെ തോല്‍വി ഭാരം കുറച്ചത്. മുംബൈക്കായി ട്രെന്റ് ബോള്‍ട്ട് 2 വിക്കറ്റ് നേടിയപ്പോള്‍, റിച്ചാര്‍ഡ് ഗ്ലീസണ്‍, ജസ്പ്രിത് ബുംമ്ര, അശ്വിനി കുമാര്‍, മിച്ചല്‍ സാന്റ്‌നര്‍ എന്നിവര്‍ ഓരോ വിക്കറ്റ് വീതം നേടി. ഞായറാഴ്ച നടക്കുന്ന രണ്ടാം ക്വാളിഫയറില്‍ പഞ്ചാബുമായാണ് മുംബൈ ഏറ്റുമുട്ടുക. ഈ മത്സരത്തിലെ വിജയികള്‍ ഫൈനലിലേക്ക് യോഗ്യത നേടും.

Rohit Sharma achieves a rare IPL milestone, joining Virat Kohli at the top of an elite list. Discover the latest cricket feat in the Indian Premier League!