തിരുവനന്തപുരം: സംസ്ഥാനത്ത് ഇന്ന് ഒറ്റപ്പെട്ട ഇടങ്ങളിൽ മഴയ്ക്ക് സാധ്യതയുള്ളതായി കാലാവസ്ഥ വകുപ്പ് അറിയിച്ചു. നാല് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. കാസർകോട്, കണ്ണൂർ, കോഴിക്കോട്, വയനാട് ജില്ലകളിലാണ് യെല്ലോ അലർട്ട്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കാനാണ് സാധ്യത കാണുന്നത്. കാസർകോട് മുതൽ തൃശൂർ വരെയുള്ള ജില്ലകളിൽ തീരദേശങ്ങളിൽ ഉൾപ്പെടെ മഴ പെയ്യാൻ സാധ്യതയുണ്ട്. ഇന്ന് പുലർച്ചെ മലപ്പുറം, കോഴിക്കോട് ജില്ലകളിലെ വിവിധ പ്രദേശങ്ങളിൽ കാറ്റോടു കൂടി ശക്തമായ മഴ ലഭിച്ചു.

എന്നാൽ, കേരളത്തിൽ മഴ ശക്തമാക്കുന്ന പ്രത്യേക അന്തരീക്ഷ സാഹചര്യങ്ങൾ ഇല്ലെങ്കിലും ഇന്ത്യൻ മഹാസമുദത്തിൽ കാറ്റിൻ്റെ ഒരു സർക്കുലേഷൻ രൂപപ്പെട്ടത് കാലവർഷ കാറ്റിനെ അനുകൂലമാക്കിയതായാണ് സൂചന. ഇത് കേരള തീരത്ത് മഴ മേഘങ്ങൾ രൂപപ്പെടാൻ കാരണമായേക്കും. ഇതിന്റെ സ്വാധീനഫലമായി മധ്യ, വടക്കൻ കേരളത്തിൽ മഴ ലഭിക്കാം. 

ALSO READ: ട്രെയിന്‍ സമയം കൃത്യമായി അറിയാന്‍ സ്വകാര്യ ആപ്പുകളല്ല, എന്‍.ടി.ഇ.എസ് ഉപയോഗിക്കണം നിർേശവുമായി റെയിൽവേ

ഇന്ന് കർണാടക തീരങ്ങളിൽ മത്സ്യബന്ധനത്തിന് വിലക്കേർപ്പെടുത്തിയിട്ടുള്ളതിനാണ് മൽസ്യത്തൊഴിലാളികൾ ജാഗ്രത പാലിക്കണം. കർണാടക തീരങ്ങളിൽ മണിക്കൂറിൽ 35 മുതൽ 55 കിലോമീറ്റർ വരെ വേഗതയിൽ കാറ്റിന് സാധ്യതയുണ്ട്.