കൊച്ചി: മലയാള സിനിമയിലെ സ്ത്രീകൾ നേരിടുന്ന പ്രശ്നങ്ങൾ പഠിക്കാൻ സർക്കാർ നിയോഗിച്ച ഹേമ കമ്മിറ്റി റിപ്പോർട്ടിൻ്റെ അടിസ്ഥാനത്തിൽ രജിസ്റ്റർ ചെയ്ത എല്ലാ കേസുകളും അവസാനിപ്പിക്കാൻ പൊലിസ്. കമ്മിറ്റി മുൻപാകെ മൊഴി നൽകിയവർക്ക് കേസുമായി മുന്നോട്ടുപോകാൻ താൽപര്യമില്ലാത്ത സാഹചര്യത്തിലാണ് എല്ലാ കേസുകളും അവസാനിപ്പിക്കാൻ തീരുമാനിച്ചത്. ഇതിൽ ആദ്യഘട്ടത്തിൽ 21 കേസുകൾ അവസാനിപ്പിച്ചതായി പ്രത്യേക അന്വേഷണസംഘം കോടതിയിൽ റിപ്പോർട്ട് നൽകിയിരുന്നു.

14 കേസുകൾ കൂടി ഈ മാസം അവസാനിപ്പിക്കും. ഇതു സംബന്ധിച്ച റിപ്പോർട്ട് ഈ മാസം കോടതിയിൽ നൽകുന്നതോടെ ഹേമ കമ്മിറ്റി റിപ്പോർട്ടുമായി ബന്ധപ്പെട്ട് രജിസ്റ്റർ ചെയ്ത എല്ലാ കേസ് നടപടികളും അവസാനിക്കും. 

ഹൈക്കോടതിയുടെ നിർദേശപ്രകാരം, ഇരകളുടെ മൊഴികളുടെ അടിസ്ഥാനത്തിലാണ് 35 കേസുകൾ പൊലിസ് രജിസ്റ്റർ ചെയ്തിരുന്നത്. മുൻപ് മൊഴി നൽകിയവർ കേസുമായി മുന്നോട്ടുപോകാൻ താൽപര്യമില്ലെന്നാണ് പിന്നീട് അറിയിച്ചത്. ഹേമാകമ്മിറ്റിക്ക് മൊഴി നല്‍കിയതിന്റെ പേരില്‍ താൽപര്യമില്ലാത്തവരെ കേസിനായി  നിര്‍ബന്ധിക്കരുതെന്ന് ഹൈക്കോടതി ഇതിനിടെ പറഞ്ഞിരുന്നു. മൊഴി നല്‍കാന്‍ പ്രത്യേക അന്വേഷണസംഘം നിര്‍ബന്ധിക്കുന്നുവെന്ന പരാതി പരിഗണിച്ചാണ് കോടതിയുടെ നിര്‍ദേശമുണ്ടായിരുന്നത്. ഹേമാ കമ്മിറ്റി റിപ്പോർട്ട് സമർപ്പിച്ച് വർഷങ്ങൾക്ക് ശേഷം അതിലെ വിവരങ്ങൾ പുറത്തുവന്നതിന് പിന്നാലെ തങ്ങൾക്കുണ്ടായ ദുരനുഭവങ്ങൾ വെളിപ്പെടുത്തി പരാതിയുമായി പലരും രംഗത്തു വന്നിരുന്നു. റിപ്പോർട്ടിലെ വിവരങ്ങൾ പുറത്തുവിടുന്നതിനെതിരേ ചിലർ കോടതിയെ സമീപിക്കുകയും ചെയ്തു. പരാതികൾ കൂടിയതോടെയാണ് അന്വേഷണത്തിനായി പ്രത്യേക സംഘത്തെ സർക്കാർ നിയോഗിച്ചിരുന്നത്.