തൃശൂർ: തങ്ങളുടെ ആവശ്യങ്ങൾ അംഗീകരിച്ചില്ലെങ്കിൽ ജൂലൈ 22 മുതൽ അനിശ്ചിതകാലത്തേക്ക് ബസ് സർവീസുകൾ നിർത്തിവെക്കുമെന്ന് ബസ്സുടമകളുടെ സംയുക്ത സമിതി. ഇതിന്റെ ഭാഗമായി ജൂലൈ എട്ടിന് വിവിധ ആവശ്യങ്ങൾ ഉന്നയിച്ചുകൊണ്ട് ബസ് ഉടമകൾ ജൂലൈ എട്ടിന് സൂചന പണിമുടക്ക് നടത്തും. 

അഞ്ച് ആവശ്യങ്ങളാണ് പ്രധാനമായും ബസ് ഉടമകൾ സർക്കാറിന് മുന്നിൽ വെക്കുന്നത്. 140 കിലോമീറ്ററിൽ കൂടുതൽ ദൂരം സർവീസ് നടത്തുന്ന സ്വകാര്യ ബസ്സുകളുടെ പെർമിറ്റുകൾ പുതുക്കി നൽകുക എന്നതാണ് ഇതിലെ പ്രധാനപ്പെട്ട ആവശ്യം.

ഇതിന് പുറമെ വിദ്യാർത്ഥികളുടെ യാത്രാ നിരക്കുകളിൽ കാലാനുസൃതമായി വർദ്ധനവ് നടപ്പാക്കുക, കെഎസ്ആർടിസിയിൽ നടപ്പിലാക്കിയത് പോലെ അർഹരായ വിദ്യാർത്ഥികൾക്ക് മാത്രം കൺസഷൻ ലഭിക്കുന്ന തരത്തിൽ ആപ്പ് മുഖേന കാർഡ് വിതരണം ചെയ്യുന്നതിനുള്ള നടപടി സ്വീകരിക്കുക, ബസ് ജീവനക്കാർക്ക് പൊലിസ് ക്ലിയറൻസ് സർട്ടിഫിക്കറ്റ് വേണമെന്ന തീരുമാനം പിൻവലിക്കുക, ബസ് ഉടമകളിൽ നിന്ന് അമിതമായ പിഴ ഈടാക്കുന്ന നടപടി അവസാനിപ്പിക്കുക തുടങ്ങിയവയാണ് ഇവരുടെ മറ്റ് ആവശ്യങ്ങൾ. 

സർക്കാറിന്റെ ഭാഗത്ത് നിന്നും ഈ ആവശ്യങ്ങൾക്ക് അനുകൂലമായ നടപടി ലഭിച്ചില്ലെങ്കിൽ ജൂലൈ എട്ടിന് സൂചന സമരം നടത്തുമെന്നും ഇതിനുശേഷവും തീരുമാനം നടന്നില്ലെങ്കിൽ ജൂലൈ 22 മുതൽ അനിശ്ചിതകാലത്തേക്ക് ബസ് സർവീസ് പൂർണ്ണമായി നിർത്തിവയ്ക്കുമെന്നാണ് ബസ്സുടമ സംയുക്ത സമിതി അറിയിച്ചത്.