കല്യാണത്തിന് എന്നുപറഞ്ഞ് വാടക സ്റ്റോറില്‍നിന്ന് എടുത്ത പാത്രങ്ങള്‍ ആക്രിക്കടയില്‍ മറിച്ചുവിറ്റ് യുവാവ്. കഴിഞ്ഞ ശനിയാഴ്ച രാവിലെ 11 മണിയോടെ താമരശ്ശേരി പരപ്പൻപൊയിലിലെ ഒകെ സൗണ്ട്സ് എന്ന വാടക സ്റ്റോറിൽനിന്ന് കല്യാണ ആവശ്യത്തിന് എന്ന വ്യാജേനയാണ് യുവാവ് പാത്രങ്ങൾ വാടകയ്ക്ക് എടുത്തത്. ബിരിയാണി ചെമ്പുകൾ ഉൾപ്പെടെയുള്ള ഈ പാത്രങ്ങൾ പിന്നീട് പൂനൂരിലെ ഒരു ആക്രിക്കടയിൽ വിറ്റു.

രണ്ട് വലിയ ബിരിയാണി ചെമ്പുകൾ, രണ്ട് ഉരുളി, ചട്ടുകം, കോരി എന്നിവയാണ് യുവാവ് വാടകയ്ക്ക് എടുത്തത്. പിന്നീട്, പാത്രങ്ങൾ കൊണ്ടുപോകാൻ പരപ്പൻപൊയിലിൽനിന്ന് ഒരു ഗുഡ്‌സ് ഓട്ടോ വിളിച്ചു. അണ്ടോണയിലെ വീട്ടിലേക്കാണ് പാത്രങ്ങൾ കൊണ്ടുപോകുന്നതെന്നാണ് യുവാവ് അറിയിച്ചത്.

ALSO READ: വീരപ്പന് തമിഴ്‌നാട്ടിൽ സ്മാരകം നിർമിക്കണം; സർക്കാരിനോട് ആവശ്യം ഉന്നയിച്ച് ഭാര്യ മുത്തുലക്ഷ്മി

പാത്രങ്ങൾ എടുക്കുന്ന സമയത്ത് യുവാവ് തന്റെ ഫോൺ നമ്പറും വിലാസവും നൽകിയിരുന്നു. സൽമാൻ എന്നായിരുന്നു യുവാവ് പറഞ്ഞ പേര്. എന്നാൽ, ചടങ്ങ് കഴിഞ്ഞ് തിങ്കളാഴ്ചയായിട്ടും പാത്രങ്ങൾ തിരികെ ലഭിക്കാത്തതിനാൽ സ്റ്റോർ ഉടമ അന്വേഷിച്ചപ്പോൾ, നൽകിയ വിലാസം വ്യാജമാണെന്ന് വ്യക്തമായി. ഫോൺ വിളിച്ചപ്പോൾ അത് സ്വിച്ച് ഓഫ് ആയിരുന്നു. പിന്നീട്, ഓട്ടോ ഡ്രൈവറോട് അന്വേഷിച്ചപ്പോൾ, പാത്രങ്ങൾ അണ്ടോണയിലേക്കല്ല, പൂനൂരിലെ ഒരു ആക്രിക്കടയ്ക്ക് സമീപം ഇറക്കിയെന്ന് മനസ്സിലായി.

വീടിനടുത്തേക്ക് വണ്ടി പോകില്ലെന്നും പാത്രങ്ങൾ ഇവിടെ ഇറക്കിയാൽ മതിയെന്നുമായിരുന്നു യുവാവ് ഓട്ടോ ഡ്രൈവറോട് പറഞ്ഞത്. ഈ വിവരത്തെ തുടർന്ന്, തിങ്കളാഴ്ച സ്റ്റോർ ഉടമയായ റഫീഖ് പൂനൂരിലെ ആക്രിക്കടയിൽ എത്തി പാത്രങ്ങൾ കണ്ടെത്തി. ആക്രിക്കട ഉടമയെ കാര്യങ്ങൾ പറഞ്ഞ് മനസിലാക്കിയ അദ്ദേഹം താമരശ്ശേരി പൊലിസിൽ പരാതി നൽകി. മോഷണം നടത്തിയ യുവാവിനെ കണ്ടെത്താൻ പൊലിസ് അന്വേഷണം ആരംഭിച്ചു.

A young man in Kozhikode's Thamarassery duped a rental store, "OK Sounds" in Parappanpoyil, by claiming he needed wedding vessels, including biryani containers, for a ceremony. Instead of returning the items, he sold them to a scrap dealer in Poonur. The incident occurred on a Saturday morning, and the authorities are likely to take action against the accused [1].