കോട്ടയം: കെട്ടിടത്തിനുള്ളില്‍ ആരും കുടുങ്ങിയിട്ടില്ലെന്നും തെരച്ചില്‍ നടത്തേണ്ട ആവശ്യമില്ലെന്നുമുള്ള തീരുമാനത്തില്‍ അധികാരികളെത്തുമ്പോള്‍ ആ അവശിഷ്ടങ്ങള്‍ക്കിടയില്‍ ഒരിറ്റു ശ്വാസത്തിനായ പിടയുകയായിരുന്നു ബിന്ദു. തലയോലപറമ്പ് സ്വദേശിയായ ബിന്ദുവിനെ സംഭവം നടന്ന് രണ്ടര മണിക്കൂറിന് ശേഷമാണ് കോട്ടയം മെഡിക്കല്‍ കോളജ് ആശുപത്രിയിലെ തകര്‍ന്ന കെട്ടിടത്തിന്റെ അവശിഷ്ടങ്ങള്‍ക്കുള്ളില്‍ നിന്ന് പുറത്തെടുക്കുന്നത്.  കെട്ടിടത്തിനുള്ളില്‍ ആരുമില്ലെന്നും ഇനി തെരച്ചില്‍ വേണ്ടെന്നും മന്ത്രിമാരായ വീണ ജോര്‍ജും വി.എന്‍ വാസവനും പറഞ്ഞതിന് പിന്നാലെ എല്ലാം അവസാനിപ്പിച്ചിരുന്നു. പിന്നീട് ചാണ്ടി ഉമ്മന്‍ എം.എല്‍.എ അടക്കമുള്ളവര്‍ എത്തി കെട്ടിടത്തിനുള്ളില്‍ തെരച്ചില്‍ നടത്തണമെന്ന് ആവശ്യപ്പെട്ടതിനെ തുടര്‍ന്ന് നടത്തിയ പരിശോധനയിലാണ് അവശിഷ്ടങ്ങള്‍ക്കിടയില്‍ നിന്നും ബിന്ദുവിനെ കണ്ടെത്തിയത്.

 കെട്ടിടം ഉപയോഗത്തിലില്ലാത്തതാണെന്നാണ് മന്ത്രിമാര്‍ പറഞ്ഞിരുന്നത്. എന്നാല്‍ കെട്ടിടത്തിലെ ശുചിമുറി ഉപയോഗിച്ചിരുന്നുവെന്ന് രോഗികളും മെഡിക്കല്‍ കോളജിലെ കൂട്ടിരിപ്പുകാരും പറയുന്നു. രണ്ടര മണിക്കൂറിന് ശേഷമാണ് ബിന്ദുവിനെ പുറത്തെടുക്കുന്നത്. ചാണ്ടി ഉമ്മന്‍ എം.എല്‍എ ഉള്‍പെടെയുള്ളവരുടെ നിര്‍ബന്ധപ്രകാരം തകര്‍ന്ന അവിശിഷ്ടങ്ങള്‍ നീക്കുന്നതിനിടെയായിരുന്നു പരിക്കുകളോടെ ബിന്ദുവിനെ കണ്ടെത്തിയത്. 

ആശുപത്രി കെട്ടിടം തകര്‍ന്ന് വീണതിന് പിന്നാലെ മന്ത്രിമാരായ വി.എന്‍ വാസവനും വീണാജോര്‍ജും സംഭവസ്ഥലം സന്ദര്‍ശിച്ചിരുന്നു. ആശുപത്രിയുടെ പഴയ കെട്ടിടമാണ് ഇതെന്നും ഉപയോഗിക്കാത്ത ഇവിടെപഴയ സാധനങ്ങള്‍ ഇടുകയാണെന്നുമാണ് മന്ത്രി വി.എന്‍. വാസവന്‍ പറഞ്ഞത്. അടച്ചിട്ടിരുന്ന കെട്ടിടത്തിന്റെ ഭാഗമാണിതെന്ന് സ്ഥലത്തെത്തിയ ആരോഗ്യ മന്ത്രി വീണ ജോര്‍ജും പറഞ്ഞു. 

ട്രോമാ കെയറില്‍ ചികിത്സയിലുള്ള മകള്‍ക്ക് കൂട്ടിരിക്കാന്‍ വന്നതായിരുന്നു ബിന്ദു. ബിന്ദുവിനെ കാണാതായതായി കെട്ടിടം തകര്‍ന്നതിന് പിന്നാലെ തന്നെ ഭര്‍ത്താവ് വിശ്രുതന്‍ പറഞ്ഞിരുന്നു. പതിനാലാം വാര്‍ഡിലെ ശുചിമുറിയില്‍ കുളിക്കാനായി ബിന്ദു പോയതായും അദ്ദേഹം സംശയം പ്രകടിപ്പിച്ചിരുന്നു. എന്നാല്‍ ആ സമയത്ത് ആരും അത് ചെവികൊണ്ടില്ല. 

Kottayam Medical College Building  collapse news