തിരുവനന്തപുരം: കോട്ടയം മെഡിക്കൽ കോളേജ് കെട്ടിടം തകർന്ന് സ്ത്രീ മരിച്ച സംഭവത്തിന് പിന്നാലെ സംസ്ഥാനത്തെ ആശുപത്രികളില്‍ അടിയന്തരമായി സുരക്ഷാ പരിശോധന നടത്താന്‍ നിര്‍ദേശം. കെട്ടിടങ്ങൾ സുരക്ഷിതമാണോ എന്നുൾപ്പെടെയുള്ള കാര്യങ്ങൾ പരിശോധിച്ച് റിപ്പോർട്ട് സമർപ്പിക്കാനാണ് ഡിഎച്ച്എസ് വിളിച്ച അടിയന്തരയോഗത്തിൽ തീരുമാനമായത്. എല്ലാ സ്ഥാപന മേധാവികളും നാളെ തന്നെ റിപ്പോര്‍ട്ട് സമര്‍പ്പിക്കണമെന്നാണ് നിർദേശം. 

ഉദ്യോഗസ്ഥര്‍ നിര്‍ദേശങ്ങള്‍ പാലിക്കുന്നില്ലെന്ന കാര്യവും യോഗത്തിൽ ആരോഗ്യവകുപ്പ് കുറ്റപ്പെടുത്തി. ചോര്‍ച്ചയും മറ്റ് പ്രശ്‌നങ്ങളുള്ള ആശുപത്രികള്‍ കണ്ടെത്തി അറ്റകുറ്റപണികള്‍ നടത്തണമെന്ന നിർദേശം നല്‍കിയിരുന്നു. ഇനി ഇത്തരം വീഴ്ചകള്‍ സംഭവിക്കാതിരിക്കാന്‍ അടിയന്തര സുരക്ഷ പരിശോധന നടത്തി നാളെ തന്നെ റിപ്പോര്‍ട്ട് സമര്‍പ്പിക്കാനാണ് നിര്‍ദേശം നൽകിയത്.

നേരത്തെ ഡിഎച്ച്എസിന്റെ നേതൃത്വത്തില്‍ ഒരു ഓണ്‍ലൈന്‍ യോഗം ചേരുകയും ആശുപത്രികളുടെ ക്രമീകരണം സംബന്ധിച്ചുള്ള കാര്യങ്ങളെക്കുറിച്ച് വിലയിരുത്തൽ നടത്തുകയും ചെയ്തിരുന്നു. കോട്ടയം മെഡിക്കല്‍ കോളജിലെ കെട്ടിടം തകർന്ന് ബിന്ദു എന്ന സ്ത്രീ മരിക്കാന്‍ ഇടയായ സംഭവത്തിന് പിന്നാലെയാണ് റിപ്പോർട്ട് സമർപ്പിക്കാൻ നിര്‍ദേശം. 

അതേസമയം, മെഡിക്കൽ കോളേജ് കെട്ടിടം തകർന്ന് വീണ് മരിച്ച തലയോലപ്പറമ്പ് സ്വദേശി ബിന്ദുവിന്റെ സംസ്കാരം പൂർത്തിയായി.  സ്ഥലമില്ലാത്തതിനാൽ സഹോദരിയുടെ വീട്ടുവളപ്പിലാണ് ബിന്ദുവിന് ചിത ഒരുക്കിയത്. ബിന്ദുവിനെ അവസാനമായി കാണാൻ ബന്ധുക്കളും നാട്ടുകാരും ഉൾപ്പെടെ നൂറുകണക്കിന് ആളുകളാണ് ഒഴുകിയെത്തിയത്.  

Following the death of a woman in the Kottayam Medical College building collapse, the Kerala government has directed an urgent safety audit of all hospital buildings across the state. An emergency meeting convened by the Directorate of Health Services (DHS) decided that all aspects, including structural safety of hospital buildings, must be thoroughly inspected and a detailed report submitted.