റാഞ്ചി: ജാര്‍ഖണ്ഡില്‍ സ്ലിപ്പറിട്ട് ക്ലാസിലെത്തിയതിന്റെ പേരില്‍ പ്രിന്‍സിപ്പല്‍ മര്‍ദ്ദിച്ച വിദ്യാര്‍ഥിനി മരിച്ചു. പ്ലസ് ടു വിദ്യാര്‍ഥിനി ദിവ്യ കുമാരിയാണ് കഴിഞ്ഞ ദിവസം മരിച്ചത്. സെപ്റ്റംബര്‍ 15നാണ് കുട്ടിക്ക് മര്‍ദ്ദനമേറ്റത്. ജാര്‍ഖണ്ഡിലെ ഗര്‍വ ജില്ലയിലാണ് സംഭവം. 

സ്ലിപ്പര്‍ ധരിച്ചെത്തിയ കുട്ടി അസംബ്ലിയില്‍ പങ്കെടുത്തതാണ് പ്രധാനധ്യാപികയെ പ്രകോപിപ്പിച്ചത്. സ്‌കൂളിന്റെ ഡ്രസ് കോഡിന് വിരുദ്ധമെന്ന് ആരോപിച്ച് പ്രിന്‍സിപ്പലിന്റെ ചുമതലയുണ്ടായിരുന്ന ദ്രൗപതി മിന്‍സ് കുട്ടിയെ ശകാരിക്കുകയും അടിക്കുകയും ചെയ്തു. മര്‍ദ്ദനത്തെ തുടര്‍ന്ന് ആശുപത്രിയില്‍ ചികിത്സ തേടിയ കുട്ടി പിന്നീട് വിഷാദാവസ്ഥയിലേക്ക് എത്തിപ്പെട്ടതായി ഡോക്ടര്‍മാര്‍ പറഞ്ഞു. 

ഡാല്‍ട്ടന്‍ഗഞ്ചിലെ ആശുപത്രിയില്‍ ചികിത്സ തേടിയ കുട്ടിയെ പിന്നീട് റാഞ്ചിയിലെ രാജേന്ദ്ര ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സിലേക്ക് മാറ്റി. ഇവിടെ വെച്ചാണ് കുട്ടി മരിച്ചത്.

ALSO READ: യൂത്ത്‌ഫെസ്റ്റിവലിന് എത്തിയ പെൺകുട്ടികൾ വസ്ത്രം മാറുന്ന ദൃശ്യങ്ങൾ പകർത്തി; സെക്രട്ടറി ഉൾപ്പെടെ മൂന്ന് എബിവിപി നേതാക്കൾ അറസ്റ്റിൽ 

സംഭവത്തില്‍ പ്രിന്‍സിപ്പലിനെതിരെ കുട്ടിയുടെ മാതാപിതാക്കള്‍ പൊലിസില്‍ പരാതി നല്‍കി. കുട്ടിയെ മര്‍ദ്ദിച്ച അധ്യാപികയെ അറസ്റ്റ് ചെയ്യണമെന്ന് ആവശ്യപ്പെട്ട് പ്രദേശത്ത് നാട്ടുകാര്‍ പ്രതിഷേധിക്കുകയാണ്. മരണം സ്ഥിരീകരിച്ചതോടെ കുട്ടിയുടെ മൃതദേഹവുമായി കുടുംബവും നാട്ടുകാരും റോഡ് ഉപരോധിച്ചു. സംഭവത്തില്‍ പ്രിന്‍സിപ്പലിന്റെ ഭാഗത്ത് നിന്ന് ഇതുവരെ പ്രതികരണമൊന്നും ലഭിച്ചിട്ടില്ല.