ദുബൈ: വ്യോമാതിർത്തി നിയന്ത്രണങ്ങൾ നീക്കിയതിനെത്തുടർന്ന് ഇന്നലെ മുതൽ ദുബൈക്കും ഇറാനിലെ മൂന്ന് നഗരങ്ങൾക്കുമിടയിലുള്ള ഫ്ലൈ ദുബൈ വിമാന സർവിസുകൾ പൂർണ പ്രവർത്തനത്തിലായി. ഇറാനിലെ ബന്ദർ അബ്ബാസ്, മഷ്ഹദ്, തെഹ്‌റാൻ എന്നിവിടങ്ങളിലേക്കുള്ള സർവിസുകളാണ് പുനരാരംഭിച്ചതെന്ന് ഫ്ലൈ ദുബൈ വക്താവ് അറിയിച്ചു.

സ്ഥിതിഗതികൾ സൂക്ഷ്മമായി നിരീക്ഷിക്കുകയും, ആവശ്യാനുസരണം ഷെഡ്യൂൾ ഭേദഗതി ചെയ്യുകയും, കൂടുതൽ ശേഷിയോ പരിഷ്കരണങ്ങളോ ആവശ്യമെങ്കിൽ ചേർക്കുകയും ചെയ്യുന്നുവെന്നും വക്താവ് കൂട്ടിച്ചേർത്തു.

 

 

യാത്രക്കാർ അവരുടെ കോൺടാക്റ്റ് വിശദാംശങ്ങൾ കാലികമാണെന്ന് ഉറപ്പാക്കാനും, യാത്ര ചെയ്യുന്നതിന് മുൻപായി വിമാനങ്ങളുടെ നില പരിശോധിക്കുകയും ചെയ്യാൻ അധികൃതർ അഭ്യർഥിച്ചു.

ഇസ്രാഈലുമായുള്ള സംഘർഷത്തെത്തുടർന്ന് ജൂൺ 13ന് അടച്ചിട്ട തെഹ്‌റാൻ ഉൾപ്പെടെയുള്ള വ്യോമാതിർത്തി വീണ്ടും തുറന്നതായി ഇറാൻ ഇക്കഴിഞ്ഞ വ്യാഴാഴ്ചയാണ് പ്രഖ്യാപിച്ചത്.

തെഹ്‌റാന്റെ മെഹ്‌റാബാദ്, ഇമാം ഖുമൈനി അന്താരാഷ്ട്ര വിമാനത്താവളങ്ങളും മറ്റു വിമാനത്താവളങ്ങളും വീണ്ടും തുറന്നതായും ബന്ധപ്പെട്ടവർ പറഞ്ഞു.

ഷാർജ ആസ്ഥാനമായ എയർ അറേബ്യ തെഹ്‌റാൻ, ഷിറാസ്, ലാർ എന്നിവിടങ്ങളിലേക്ക് നേരത്തെ നിർത്തിവച്ച വിമാനങ്ങൾ ഈ മാസം 6 മുതൽ പുനരാരംഭിക്കുന്നതാണ്. വെബ്‌സൈറ്റ് വഴിയോ കോൺടാക്റ്റ് സെന്ററിൽ വിളിച്ചോ ബുക് ചെയ്യാൻ യാത്രക്കാരോട് എയർ അറേബ്യ വെബ്‌സൈറ്റിൽ അറിയിച്ചു.

അതേസമയം, ജൂലൈ 9 വരെ തെഹ്‌റാനിലേക്കും പുറത്തേക്കുമുള്ള വിമാനങ്ങൾ റദ്ദാക്കുമെന്ന മുൻ പ്രഖ്യാപനം എമിറേറ്റ്‌സ് ഇതു വരെ പരിഷ്കരിച്ചിട്ടില്ല.

ഇറാനിലെ അവസാന ലക്ഷ്യ സ്ഥാനങ്ങളിലേക്ക് ദുബൈ വഴി (എമിറേറ്റ്‌സ്) ബന്ധിപ്പിക്കുന്ന യാത്രക്കാരെ ഇനി ഒരറിയിപ്പുണ്ടാകുന്നതു വരെ യാത്ര ചെയ്യാൻ അനുവദിക്കില്ലെന്ന് എമിറേറ്റ്‌സ് പറഞ്ഞു. വിമാന റദ്ദാക്കൽ ബാധിച്ച യാത്രക്കാർ റീബുക്കിംഗിനായി ട്രാവൽ ഏജൻസിയുമായി ബന്ധപ്പെടണമെന്നും അധികൃതർ വ്യക്തമാക്കി.

Airlines in the UAE are resuming flights to Iran after the country announced the reopening of its airspace on Thursday. Iran, Iraq and Jordan closed their airspace after Israel launched a wave of strikes across Iran on June 13.