ടോക്ക്യോ: ജൂലൈ അഞ്ചിന് പുലര്‍ച്ചെ 4.15ന് വിനാശകരമായ സൂനാമി വരുമെന്നും പ്രതീക്ഷിക്കുന്നതിനുമപ്പുറമുള്ള നാശനഷ്ടങ്ങളുണ്ടാകുമെന്നുമുള്ള കോമിക് എഴുത്തുകാരി റയോ തത്സുകി എന്ന കാര്‍ട്ടൂണിസ്റ്റിന്റെ 'പ്രവചനം' ജപ്പാനിലുണ്ടാക്കിയത് കോടികളുടെ നഷ്ടം. ഇല്ലസ്‌ട്രേറ്ററായ റയോ, 1999 ല്‍ പ്രസിദ്ധീകരിച്ച ദ് ഫ്യൂച്ചര്‍ ഐ സോ എന്ന കാര്‍ട്ടൂണ്‍ പുസ്തകമാണ് ജപ്പാന്‍കാരുടെ ഭീതിക്ക് കാരണമായത്. ജാപ്പനീസ് ബാബ വാന്‍കയെന്നാണ് റയോയെ ജനങ്ങള്‍ വിളിക്കുന്നത്. 1999ലെ പുസ്തകം 2021ല്‍ പുനപ്രസിദ്ധീകരിച്ചിരുന്നു. 2011 മാര്‍ച്ച് 11ലെ ഭൂകമ്പവും സുനാമിയും പുസ്തകത്തില്‍ പറഞ്ഞതു പോലെ സംഭവിച്ചതാണ് ജപ്പാന്‍കാരില്‍ ഭീതി വിതച്ചത്. ഇന്ന് സുനാമി ഉണ്ടാകുമെന്നായിരുന്നു  പ്രവചനം. പിന്നാലെ ചെറിയ ഭൂചലനങ്ങളുടെ എണ്ണം വര്‍ധിച്ചത് ജനങ്ങളില്‍ പരിഭ്രാന്തി പരത്തി. ഒരു വര്‍ഷം കൊണ്ട് ഉണ്ടാകുന്ന ഭൂചലനങ്ങളാണ് ഒരാഴ്ചകൊണ്ട് ഉണ്ടായത്. ഇന്നലെ മാത്രം 519 ഭൂചലനങ്ങളാണ് ജപ്പാനിലുണ്ടായത്. തൊകാര ദ്വീപിലാണ് ഏറ്റവും കൂടുതല്‍ അനുഭവപ്പെട്ടത്. ഇവിടെ ഇന്നലെ 200 ലധികം ഭൂചലനങ്ങളുണ്ടായി. ഒരു ദിവസം നാല് മുതല്‍ അഞ്ച് വരെ ഭൂചലനങ്ങളാണ് ഇവിടെ ഉണ്ടാകാറുള്ളത്. ജൂണ്‍ 21 മുതലാണ് ഭൂചലനങ്ങളുടെ എണ്ണം കൂടിയത്. തൊകാര ദ്വീപിലെ ജനവാസമുള്ള രണ്ടു ഗ്രാമങ്ങളിലുള്ളവരെ ഒഴിപ്പിച്ചു. അതേസമയം ഇതുവരെ ഉണ്ടായ ഭൂചലനങ്ങള്‍ മൂലം കാര്യമായ നാശനഷ്ടങ്ങളൊന്നും രേഖപ്പെടുത്തിയില്ല.

 

 

എടുത്തത് വൻ മുൻകരുതൽ

 എഴുത്തുകാരിയായ തത്സുകിയുടെ പ്രവചനത്തില്‍ ജൂലൈ പുലര്‍ച്ചെ നാലരയോടെ 2011ലേതിനേക്കാള്‍ വലിയ സുനാമി ഉണ്ടാകുമെന്നാണ് പ്രവചനം. നേരത്തെ സുനാമിയും കൊവിഡും അവര്‍ പ്രവചിച്ചത് ശരിയായിരുന്നു. ഇതിനു പിന്നാലെയാണ് ഭൂചലനങ്ങളുടെ എണ്ണവും വര്‍ധിച്ചത്.

 

 

ഈ പശ്ചാത്തലത്തിൽ സുനാമി പ്രവചനം ആളുകളിൽ ഭീതി കൂടാൻ കാരണമായി. ഇതോടെ വൻ മുൻകരുതൽ നടപടികൾ ആണ് ജപ്പാൻ കൈക്കൊണ്ടത്. ജാഗ്രത നിർദേശം ഉണ്ടായതോടെ ടൂറിസ്റ്റുകൾ യാത്ര റദാക്കി. വിമാനങ്ങൾ സർവീസ് നിർത്തിവച്ചു. പലരും പുറത്തിറങ്ങാതെ വീടുകളിൽ തന്നെ കഴിയുകയോ സുരക്ഷിത ഇടങ്ങളിലേക്ക് മാറുകയോ ചെയ്തു. 

എപ്പോഴും കുലുങ്ങിക്കൊണ്ടിരിക്കുന്നത് പോലെയാണ് തോന്നുന്നതെന്ന് ജനങ്ങള്‍ പറഞ്ഞതായി ജാപ്പനീസ് മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ട്. ഉറങ്ങാന്‍ പോലും ഭയമാണെന്ന് ടോകര ദ്വീപ് നിവാസികള്‍ പറയുന്നു.

 

 

പുന പ്രസിദ്ധീകരിച്ച പുസ്തകം

2021ല്‍ പുനപ്രസിദ്ധീകരിച്ച പുസ്തകത്തില്‍ കുറേക്കൂടി ഭീതിതമായ വിവരങ്ങളാണ് റയോ വരച്ചുവച്ചത്. 2025 ജൂലൈ 5ന നടക്കുന്ന ദുരന്തത്തില്‍ ജപ്പാനും ഫിലിപ്പീന്‍സിനും ഇടയിലുള്ള സമുദ്രാന്തര്‍ ഫലകം വിണ്ടുകീറുമെന്നും നാലുദിക്കിലേക്കും മാനം മുട്ടുന്ന തിരമാലകള്‍ ആഞ്ഞടിക്കുമെന്നും ഉൾപ്പെടെ പ്രവചിച്ചു. 2011 ലെ  തെക്കുപടിഞ്ഞാറന്‍ തീരത്തുണ്ടായതിന്റെ മൂന്നിരട്ടി വലിപ്പത്തില്‍ സൂനാമിത്തിരകള്‍ ആഞ്ഞടിക്കു എന്നാണ് പ്രവചനത്തില്‍ പറയുന്നത്.

കഫെകളിലും ബാറുകളിലും സമൂഹമാധ്യമങ്ങളിലുമെല്ലാം ജപ്പാന്‍ ചര്‍ച്ച ചെയ്യുന്നത് റയോയെ കുറിച്ചു മാത്രമായതോടെ ആശങ്കപ്പെടേണ്ടതില്ലെന്നും ഇത്തരം പ്രവചനങ്ങള്‍ക്ക് ശാസ്ത്രീയ അടിത്തറയില്ലെന്നും സര്‍ക്കാര്‍ വ്യക്തമാക്കിയിട്ടുണ്ട്.

Japan’s doomsday prediction: July 5 comic book prophecy sparks panic, tourists flee, flights cancelled