മലപ്പുറം: ഭാരതാംഭ വിവാദം കത്തിനിൽക്കുന്നതിനിടെ സേവാഭാരതിയുടെ പരിപാടിയിൽ പങ്കെടുത്ത് കോഴിക്കോട് സർവകലാശാല വൈസ് ചാൻസലർ. ഇന്നലെ പരപ്പനങ്ങാടി കെ.കെ ഓഡിറ്റോറിയത്തിൽ നടന്ന ദേശീയ സേവാഭാരതി മലപ്പുറം ജില്ലാ പ്രതിനിധി സമ്മേളനം ഉദ്ഘാടനം ചെയ്യാനാണ് കോഴിക്കോട് സർവകലാശാല വൈസ് ചാൻസലർ ഡോ.പി രവീന്ദ്രൻ എത്തിയത്. സേവാഭാരതിയെ പുകഴ്ത്തിയ അദ്ദേഹം ഗാന്ധിജി പറഞ്ഞ 'മാനവ സേവ മാധവ സേവ' എന്ന വാക്യം അന്വർഥമാക്കുന്നതാണ് സേവാഭാരതിയുടെ പ്രവർത്തനമെന്ന പ്രസ്താവനയും നടത്തി. സേവാഭാരതിയുടെ പ്രവർത്തനം ഭാരത സംസ്‌കാരത്തിന്റെ ഭാഗമായ 'വസുധൈവ കുടുംബകം' എന്ന ആശയത്തോട് ചേർന്ന് നിൽക്കുന്ന ഒന്നാണെന്നും വി.സി പറഞ്ഞു. ഗവർണറും സർക്കാറും തമ്മിലുള്ള പോര് മുറുകുന്നതിനിടെ സേവാ ഭാരതിയുടെ രാഷ്ട്രീയ പരിപാടിയിൽ അഥിതിയായെത്തിയ വൈസ് ചാലസലറുടെ നടപടിയും ചർച്ചയാവുകയാണ്.