കല്‍പ്പറ്റ: കര്‍ഷക സംഘം ജില്ലാ പ്രസിഡന്റിനെ ഏരിയ കമ്മിറ്റിയില്‍ നിന്ന് ലോക്കല്‍ കമ്മിറ്റിയിലേക്ക് തരംതാഴ്ത്തിയ വിഷയത്തില്‍ വിവാദങ്ങള്‍ അവസാനിക്കുന്നില്ല. കഴിഞ്ഞ ദിവസങ്ങളിലുണ്ടായ സംഭവങ്ങളുടെ തുടര്‍ച്ചയായി ഇന്നലെ ജില്ലാനേതൃത്വം വിളിച്ച് ചേര്‍ത്ത യോഗങ്ങളിലും പങ്കാളിത്തക്കുറവ്. തദ്ദേശ തെരഞ്ഞെടുപ്പുമായി ബന്ധപ്പെട്ട് സംഘടിപ്പിച്ച നാല് ലോക്കല്‍ കമ്മിറ്റികളുടെ ശില്‍പശാലയില്‍ പങ്കെടുത്തത് 25ല്‍ താഴെ ആളുകള്‍ മാത്രം. നാല് ലോക്കല്‍ കമ്മിറ്റികളില്‍ നിന്നുമായി 112 ആളുകളാണ് പങ്കെടുക്കേണ്ടിയിരുന്നത്. ലോക്കല്‍ കമ്മിറ്റി അംഗങ്ങളും ബ്രാഞ്ച് സെക്രട്ടറിമാരും ബൂത്ത്, വാര്‍ഡ് സെക്രട്ടറിമാരും ആയിരുന്നു ശില്‍പശാലയില്‍ പങ്കെടുക്കേണ്ടിയിരുന്നത്. എന്നാല്‍ ബഹുഭൂരിഭാഗം ആളുകളും യോഗത്തിന് എത്തിയില്ല. 

ഇതിന് ശേഷം പൂതാടി, കേണിച്ചിറ ലോക്കല്‍ കമ്മിറ്റിയിലെ പാര്‍ട്ടി അംഗങ്ങളുടെ ജനറല്‍ ബോഡിയും നടന്നു. ഇതിലും 50ല്‍ താഴെ ആയിരുന്നു ഹാജര്‍. എ.വി ജയനെതിരായ നടപടി റിപ്പോര്‍ട്ട് ചെയ്യാനായിരുന്നു ജനറല്‍ബോഡി വിളിച്ചുചേര്‍ത്തത്. ജില്ലാ സെക്രട്ടറി കെ. റഫീഖ്, സംസ്ഥാന കമ്മിയംഗം സി.കെ ശശീന്ദ്രന്‍ എന്നിവര്‍ യോഗത്തില്‍ പങ്കെടുത്തെങ്കിലും പങ്കാളിത്തം ഗണ്യമായി കുറഞ്ഞത് പാര്‍ട്ടിക്ക് ക്ഷീണമായി.