കോഴിക്കോട്: നിപ സ്ഥിരീകരിച്ച് കോഴിക്കോട് മെഡിക്കല്‍ കോളജില്‍ ചികിത്സയില്‍ കഴിയുന്ന തച്ചനാട്ടുകര സ്വദേശിയുടെ ആരോഗ്യനില ഗുരുതരമായി തുടരുകയാണെന്ന് ആരോഗ്യമന്ത്രി വീണ ജോര്‍ജ്. രോഗിക്ക് രണ്ടാമത്തെ ഡോസ് ആന്റി ബോഡി നല്‍കിയിരിക്കുകയാണ്. 12 മണിവരെ ആന്റി ബോഡി മെഡിസിന്‍ നല്‍കും. അണുബാധ നിയന്ത്രിക്കാന്‍ ആവശ്യമായ നടപടികള്‍ സ്വീകരിക്കുന്നുണ്ടെന്നും മന്ത്രി പറഞ്ഞു.

അതേസമയം 173 പേരാണ് സമ്പര്‍ക്കപ്പട്ടികയിലുള്ളത്. ഇതില്‍ നൂറു പേര്‍ പ്രാഥമിക പട്ടികയില്‍ ഉള്‍പ്പെടുന്നവരാണ്. ഹൈറിസ്‌ക് കൊണ്ടാക്റ്റുകളില്‍ ഉള്ളത് 52 പേരാണ്. പാലക്കാട് മാത്രമായി 7 പേര്‍ ചകിത്സയില്‍ കഴിയുകയാണ്. 4 സാമ്പിളുകളുടെ പരിശോധന ഫലം ഇന്ന് വരും. നിപ ബാധിത മേഖലയിലെ അസ്വാഭാവിക മരണങ്ങള്‍ കൂടി പരിശോധിക്കുമെന്ന് ആരോഗ്യമന്ത്രി കൂട്ടിച്ചേര്‍ത്തു. 

രോഗിയുടെ മൊബൈല്‍ ടവര്‍ ലൊക്കേഷന്‍ പൊലീസ് പരിശോധിച്ചപ്പോള്‍ യുവതിയുമായി സമ്പര്‍ക്ക പട്ടികയിലുള്ള ഒരു വ്യക്തിയെ ഇതുവരെ കണ്ടെത്താനായിട്ടില്ല. ഇയാളുടെ അവസാന ടവര്‍ ലൊക്കേഷന്‍ മലപ്പുറം ജില്ലയാണെന്നാണ് മനസിലാക്കാന്‍ സാധിച്ചത്. ഇയാള്‍ മണ്ണാര്‍ക്കാട് ക്‌ളീനിക്കിലേക്ക് വന്ന ഇതര സംസ്ഥാനക്കാരനാണെന്നാണ് നിഗമനം. സ്ഥലത്തെ സിസിടിവി ദൃശ്യങ്ങള്‍കൂടി പരിശോധിച്ച് പൊലീസിന്റെ നേത്യത്വത്തില്‍ അയാളെ കണ്ടെത്താനാണ് തീരുമാനം. പ്രതിരോധ പ്രവര്‍ത്തനങ്ങള്‍ക്കായി 26 കമ്മിറ്റികള്‍ രൂപീകരിച്ചു. സംശയ നിവാരണത്തിന് കോള്‍ സെന്റര്‍ സജ്ജമാണെന്നും മന്ത്രി പറഞ്ഞു.