റിയാദ്: സഊദി അറേബ്യയിലെ ഹഫര്‍ അല്‍ ബാത്തില്‍ ടാങ്കര്‍ ലോറിയുടെ ടയര്‍ നന്നാക്കുന്നതിനിടെ വാഹനം ദേഹത്തേക്ക് മറിഞ്ഞ് തമിഴ്‌നാട് സ്വദേശിക്ക് ദാരുണാന്ത്യം. നാമക്കല്‍ സ്വദേശിയായ പ്രവാസി തൊഴിലാളി സുന്ദരം രാമസ്വാമി (59)യാണ് അപകടത്തില്‍പ്പെട്ട് മരിച്ചത്. കിഴക്കന്‍ പ്രവിശ്യയിലെ ഹഫര്‍ അല്‍ ബാത്തില്‍ വെച്ചാണ് അപകടം സംഭവിച്ചത്.

ALSO READ: ഉഭയകക്ഷി ബന്ധം ശക്തമാകുന്നതിനിടെ സഊദി പൗരന്മാര്‍ക്ക് വിസ രഹിത പ്രവേശനം അനുവദിക്കുന്നത് പരിഗണനയിലെന്ന് റഷ്യ

ടാങ്കര്‍ ലോറിയുടെ പഞ്ചര്‍ ടയര്‍ പരിശോധിക്കുന്നതിനിടെ ജാക്കി തെന്നിമാറി വാഹനം സുന്ദരം രാമസ്വാമിയുടെ ദേഹത്തേക്ക് മറിയുകയായിരുന്നു. ഗുരുതരമായി പരുക്കേറ്റ അദ്ദേഹത്തെ സമീപവാസികള്‍ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഹഫര്‍ അല്‍ ബത്തീന്‍ സനയ്യയില്‍ കഴിഞ്ഞ 30 വര്‍ഷത്തിലേറെയായി പഞ്ചര്‍ വര്‍ക്ക്‌ഷോപ്പ് നടത്തിവരികയായിരുന്നു സുന്ദരം.

ALSO READ: നാട്ടിലേക്ക് പണം അയക്കുകയാണോ? മൂല്യം അറിയുക; ഇന്ത്യന്‍ രൂപയും ഡോളറും യൂറോയും അടക്കമുള്ള കറന്‍സികളും തമ്മിലെ ഇന്നത്തെ വിനിമയ നിരക്ക്| India Rupee Value

പൊലിസ് അന്വേഷണത്തിനും ഫൊറന്‍സിക് പരിശോധനയ്ക്കും ശേഷം ഇന്ത്യന്‍ എംബസിയുടെ സഹായത്തോടെ ഒഐസിസി പ്രസിഡന്റ് വിബിന്‍ മറ്റത്ത് മൃതദേഹം നാട്ടിലെത്തിക്കുന്നതിനുള്ള നടപടികള്‍ പൂര്‍ത്തിയാക്കി. സുഹൃത്തുക്കളായ ഗോപാല്‍, ചെല്ലപ്പന്‍ എന്നിവര്‍ ചേര്‍ന്ന് മൃതദേഹം ഏറ്റുവാങ്ങി ഇന്‍ഡിഗോ വിമാനത്തില്‍ ചെന്നൈ വഴി നാട്ടിലെത്തിച്ച് സംസ്‌കാരം നടത്തി.

ഭാര്യ: ഗോമതി സുന്ദരം. മക്കള്‍: മാലതി, അരുണ്‍കുമാര്‍.