ടികാംഗഢ്: മധ്യപ്രദേശിലെ ടികാംഗഢ് ജില്ലയിൽ ഞെട്ടിക്കുന്ന കൊലപാതകം. വിജയ്പൂർ ഗ്രാമത്തിൽ അഖിലേഷ് കുശ്വാഹ (32) എന്നയാളുടെ തലയറുത്ത മൃതദേഹം തേങ്ങ, നാരങ്ങ, ഉപ്പിലിട്ട ഭക്ഷണങ്ങൾ എന്നിവയോടൊപ്പം കണ്ടെത്തി. ഇത് നരബലിയാണെന്ന് സംശയിച്ച് പൊലീസ് അന്വേഷണം തുടങ്ങി. ചന്ദേല പൊലീസ് സ്റ്റേഷൻ പരിധിയിലെ വിജയ്പൂർ ഗ്രാമത്തിലാണ് സംഭവം. ജൂലൈ 6നാണ് സംഭവം പുറത്തറിയുന്നത്. സത്ഗുവാൻ ഗ്രാമത്തിൽ താമസിക്കുന്ന അഖിലേഷ്, തന്റെ കൃഷിയിടത്തിന് സമീപമുള്ള വീട്ടിലാണ് താമസിച്ചിരുന്നത്. മൃതദേഹം കണ്ടെത്തിയത് ഗോഡ്ബാബ എന്ന സ്ഥലത്തിന് അടുത്താണ്. ഇതും പല സംശയത്തിന് ഇടയാക്കുന്നതായും പൊലിസ് പറഞ്ഞു. നരബലി ഉൾപ്പെടെ എല്ലാ സാധ്യതകളും പരിശോധിക്കുന്നുണ്ട്, അഡീഷണൽ പൊലീസ് സൂപ്രണ്ട് സീതാറാം പറഞ്ഞു. ആദ്യ അന്വേഷണത്തിൽ നരബലിയുടെ സാധ്യത കാണുന്നുണ്ടെന്ന് ജതാര സബ് ഡിവിഷണൽ പൊലീസ് ഓഫീസർ അഭിഷേക് ഗൗതം പറഞ്ഞു.

ALSO READ: "ഒരു സാധാരണ കൊലപാതകി പോലും ഇത്രയധികം പരുക്കുകൾ വരുത്തില്ല,: ക്ഷേത്ര ജീവനക്കാരന്റെ കസ്റ്റഡി മരണത്തിൽ പൊലീസിനെ രൂക്ഷമായി വിമർശിച്ച് മദ്രാസ് ഹൈക്കോടതി; അന്വേഷണം സിബിഐയ്ക്ക്

അഖിലേഷ് ജോലിക്ക് പോയതിന് ശേഷം വീട്ടിൽ തിരിച്ചെത്തിയിരുന്നില്ല. ഗോഡ്ബാബ എന്ന സ്ഥലത്തെ ഗ്രാമവാസിയാണ് തലയറുത്ത നിലയിൽ മൃതദേഹം കണ്ടത്. പൊലീസ് ഉടൻ സ്ഥലത്തെത്തി തെളിവുകൾ ശേഖരിച്ചു. "കേസിന്റെ വിശദാംശങ്ങൾ ഉടൻ പുറത്തുവിടും," സീതാറാം അറിയിച്ചു.

ഗുജറാത്തിലും നരബലി സംശയം

ഗുജറാത്തിലെ ഛോട്ടാ ഉദയ്പൂർ ജില്ലയിൽ നാലുവയസ്സുകാരിയെ അയൽവാസി ലാലാ ഭായ് തദ്‌വി കൊലപ്പെടുത്തിയ സംഭവവും നരബലിയുമായി ബന്ധപ്പെട്ടാണ്. ക്ഷേത്രത്തിന്റെ പടികളിൽ കുട്ടിയുടെ രക്തം കണ്ടെത്തിയത് പൊലീസിന്റെ സംശയത്തിന് കാരണമായി. ഈ രണ്ട് സംഭവങ്ങളും നരബലിയുടെ പശ്ചാത്തലത്തിൽ പൊലീസ് അന്വേഷിക്കുന്നു.