തിരുവനന്തപുരം: തൊഴിലാളി സംഘടനകളുടെ ആഹ്വാനപ്രകാരം 2025 ജൂലൈ 9-ന് നടക്കുന്ന ദേശീയ പണിമുടക്കിന്റെ പശ്ചാത്തലത്തിൽ കേരളത്തിലെ പ്രമുഖ സർവകലാശാലകൾ പരീക്ഷകൾ മാറ്റിവച്ചു. മഹാത്മാ ഗാന്ധി സർവകലാശാല നാളെ നടത്താനിരുന്ന പ്രാക്ടിക്കൽ ഉൾപ്പെടെയുള്ള എല്ലാ പരീക്ഷകളും മാറ്റിവച്ചതായി പരീക്ഷാ കൺട്രോളർ അറിയിച്ചു. കേരള സർവകലാശാലയും കാലിക്കറ്റ് സർവകലാശാലയും നാളത്തെ എല്ലാ പരീക്ഷകൾ മാറ്റിവച്ചു. പുതുക്കിയ പരീക്ഷാ തീയതികൾ പിന്നീട് പ്രഖ്യാപിക്കും.

പണിമുടക്കിനെ നേരിടാൻ കെഎസ്ആർടിസി ഡയസ്നോൺ പ്രഖ്യാപിച്ചു. ജോലിക്ക് ഹാജരാകാത്തവരുടെ ജൂലൈ മാസത്തെ ശമ്പളത്തിൽ നിന്ന് തുക പിടിക്കുമെന്ന് ഉത്തരവിൽ വ്യക്തമാക്കി. 10 ഇന നിർദേശങ്ങളടങ്ങിയ മെമ്മോറാണ്ടവും കെഎസ്ആർടിസി പുറപ്പെടുവിച്ചു. സർക്കാരും ഡയസ്നോൺ പ്രഖ്യാപിച്ചിട്ടുണ്ട്.

കേന്ദ്ര സർക്കാരിന്റെ തൊഴിലാളി വിരുദ്ധ നയങ്ങൾക്കെതിരെ പ്രതിഷേധിക്കാനാണ് പണിമുടക്ക്. സിഐടിയു, ഐഎൻടിയുസി, എഐടിയുസി, എച്ച്എംഎസ്, എഐയുടിയുസി, ടിയുസിസി, എസ്ഇഡബ്യുഎ, എഐസിസിടിയു, എൽപിഎഫ്, യുടിയുസി എന്നീ 10 ദേശീയ ട്രേഡ് യൂണിയനുകൾ പണിമുടക്കിന് നേതൃത്വം നൽകുന്നു. സംയുക്ത കിസാൻ മോർച്ചയും പിന്തുണ പ്രഖ്യാപിച്ചിട്ടുണ്ട്.

17 ആവശ്യങ്ങൾ ഉന്നയിച്ചാണ് പണിമുടക്ക്. ഇതിൽ പ്രധാനം, തൊഴിലാളി വിരുദ്ധമായ നാല് ലേബർ കോഡുകൾ കേന്ദ്ര സർക്കാർ ഉപേക്ഷിക്കണമെന്നാണ്. ഈ കോഡുകൾ നടപ്പാകുന്നത് ട്രേഡ് യൂണിയനുകളുടെ തൊഴിൽ മേഖലയിലെ ഇടപെടലിനെ ദുർബലപ്പെടുത്തുമെന്ന് സംഘടനകൾ ചൂണ്ടിക്കാട്ടുന്നു.

Due to a national strike called by labor unions on July 9, 2025, universities in Kerala, including Mahatma Gandhi, Kerala, and Calicut, have postponed all exams scheduled for the day. New dates will be announced later. KSRTC and the government declared a "dies non," with salary deductions for absent employees. The strike, led by 10 trade unions and supported by Samyukta Kisan Morcha, protests four anti-labor codes among 17 demands.