തിരുവനന്തപുരം: കേരള സര്‍വകലാശാലയില്‍ വിസി- രജിസ്ട്രാര്‍ തര്‍ക്കം തുടരുമ്പോള്‍ രജിസ്ട്രാര്‍ കെഎസ് അനില്‍ കുമാര്‍ ഇന്ന് ഓഫിസില്‍ എത്തിയാല്‍ ഇടപെടാന്‍ വൈസ് ചാന്‍സലറുടെ തീരുമാനം. രജിസ്ട്രാര്‍ ഓഫിസില്‍ എത്തിയാല്‍ തടയാന്‍ സുരക്ഷാ ഓഫിസര്‍ക്ക് നിര്‍ദേശവും നല്‍കി. 

സസ്‌പെന്‍ഷനിലുള്ള രജിസ്ട്രാര്‍ക്ക് അധികാരം ഇല്ലെന്ന് ആവര്‍ത്തിക്കുകയാണ് വിസി. എന്നാല്‍ രജിസ്ട്രാര്‍ക്ക് തുടരാമെന്നാണ് സിന്‍ഡിക്കേറ്റിന്റെ പ്രഖ്യാപനം. ഇനി വിസിയും രജിസ്ട്രാറും ഇന്ന് എത്തുമോ എന്നതാണ് അറിയേണ്ടത്. വിസി വന്നാല്‍ തടയുമെന്ന് എസ്എഫ്‌ഐയും അറിയിച്ചു. അവധി ചോദിച്ച രജിസ്റ്റാര്‍ അനില്‍ കുമാറിനോട്, സസ്‌പെന്‍ഷനിലായ രജിസ്റ്റാര്‍ക്ക് എന്തിനാണ് അവധി എന്നായിരുന്നു വിസി മോഹന്‍ കുന്നുമലിന്റെ തിരിച്ചുള്ള ചോദ്യം. 

തന്റെ സസ്‌പെന്‍ഷന്‍ സിന്‍ഡിക്കേറ്റ് റദ്ദാക്കി എന്നായിരുന്നു രജിസ്റ്റാറുടെ മറുപടി. അനില്‍കുമാര്‍ ഇന്ന് ഓഫിസില്‍ എത്തുമോ എന്ന കാര്യത്തില്‍ ആകാംക്ഷ നിലനില്‍ക്കുകയാണ്. ഇന്ന് ഗവര്‍ണര്‍ക്കും വിസിക്കും എതിരെ ഡിവൈഎഫ്‌ഐയുടെയും എസ്എഫ്‌ഐയുടെയും പ്രതിഷേധവുമുണ്ട്. 

എസ്എഫ്‌ഐ രാജ് ഭവനിലേക്കാണ് മാര്‍ച്ച് നടത്തുക. സംസ്ഥാന വ്യാപകമായി പഠിപ്പ് മുടക്കവും ഉണ്ട്. ഡിവൈഎഫ്‌ഐ സര്‍വകലാശാല ആസ്ഥാനത്തേക്കും മാര്‍ച്ച് നടത്തും. കഴിഞ്ഞ ദിവസം സര്‍വകലാശാലയിലെ പ്രതിഷേധത്തിനിടെ എസ്എഫ്‌ഐ സംസ്ഥാന സെക്രട്ടറി ഉള്‍പ്പടെയുള്ളവരെ അറസ്റ്റ് ചെയ്തതില്‍ പ്രതിഷേധിച്ചാണ് പഠിപ്പ് മുടക്ക് ആഹ്വാനം ചെയ്തിരിക്കുന്നത്.