​

സഫേദ്: ​ഗസ്സയിലും ലെബനനിലും യുദ്ധത്തിൽ പങ്കെടുത്ത ഇസ്റാഈലി സൈനികൻ ഡാനിയേൽ എഡ്രി (24) കടുത്ത മാനസിക സമ്മർദ്ദത്തെ തുടർന്ന് ആത്മഹത്യ ചെയ്തു. സഫേദിനടുത്തുള്ള വനപ്രദേശത്ത് കാറിനുള്ളിൽ തീകൊളുത്തിയാണ് അദ്ദേഹം ജീവനൊടുക്കിയതെന്ന് റിപ്പോർട്ട് സൂചിപ്പിക്കുന്നു.

യുദ്ധത്തിന്റെ ഭീകരതകൾ നേരിട്ട് കണ്ടിരുന്ന ഡാനിയേൽ, മൃതദേഹങ്ങളുടെ ഗന്ധവും ദൃശ്യങ്ങളും തന്നെ നിരന്തരം വേട്ടയാടുന്നതായി അമ്മ സിഗൽ എഡ്രിയോട് പറഞ്ഞിരുന്നു. യുദ്ധാനുഭവങ്ങൾ അവന്റെ മാനസികാരോഗ്യത്തെ ഗുരുതരമായി ബാധിച്ചിരുന്നു. ചിലപ്പോൾ അക്രമാസക്തമായ രീതിയിൽ പെരുമാറുകയും അപ്പാർട്ട്മെന്റിലെ വസ്തുക്കൾ നശിപ്പിക്കപ്പെടുകയും ചെയ്തിരുന്നതായി അമ്മ വെളിപ്പെടുത്തി. ഡാനിയേലിന്റെ കുടുംബം സൈനിക ബഹുമതിയോടുള്ള ശവസംസ്കാരം ആവശ്യപ്പെട്ടെങ്കിലും ഇസ്റാഈൽ സൈന്യം അത് നിരസിച്ചതായാണ് റിപ്പോർട്ട്. "അവന്റെ ത്യാഗത്തിന് അർഹമായ ആദരവ് ലഭിക്കണം. അവനൊരു സൈനിക ശവസംസ്കാരം അർഹിക്കുന്നു," അമ്മ ആവശ്യപ്പെട്ടു.

ALSO READ: വളർത്തുപൂച്ച മാന്തിയതിനെ തുടർന്ന് ചികിത്സയിലായിരുന്ന വിദ്യാർഥിനി മരിച്ചു 

അതേ സമയം ഗസ്സയിൽ ഇസ്റാഈൽ ഇന്ന് നടത്തിയ ആക്രമണങ്ങളിൽ 55 ഫലസ്തീനികൾ കൊല്ലപ്പെട്ടതായി മെഡിക്കൽ വൃത്തങ്ങൾ അറിയിച്ചു. ഗസ്സ സിറ്റിയുടെ വടക്കുപടിഞ്ഞാറൻ ഭാഗത്തുള്ള അൽ-കരാമയിൽ നടന്ന ആക്രമണത്തിൽ മാത്രം നാല് പേർ മരിച്ചതായി അൽ-ഷിഫ ആശുപത്രി വൃത്തങ്ങൾ അൽ ജസീറയോട് വെളിപ്പെടുത്തി. റഫയിൽ സഹായ കേന്ദ്രത്തിന് സമീപം മൂന്ന് പേരും, ഗസ്സ സിറ്റിയിലെ അൽ-സഹ്‌റ സ്‌കൂളിന് സമീപം രണ്ട് പേരും കൊല്ലപ്പെട്ടവരിൽ ഉൾപ്പെടുന്നു. ഈ സ്‌കൂൾ യുദ്ധത്തിൽ കുടിയിറക്കപ്പെട്ട ഫലസ്തീനികൾക്ക് താമസസൗകര്യം നൽകുന്ന കോമ്പൗണ്ടായാണ് ഇപ്പോൾ പ്രവർത്തിക്കുന്നത്.

വെസ്റ്റ് ബാങ്കിലെ ജെനിനിന് പടിഞ്ഞാറുള്ള റുമ്മാന ഗ്രാമത്തിൽ ഇസ്റാഈലി സൈനികൻ ആക്രമിക്കാൻ ശ്രമിച്ചപ്പോൾ തിരിച്ച് കത്തികൊണ്ട് ആക്രമിച്ച സംഭവത്തിൽ ഫലസ്തീനി യുവാവ് കൊല്ലപ്പെട്ടു.  അഹമ്മദ് അലി അമുർ (55) എന്നയാളാണ് കൊല്ലപ്പെട്ടത് എന്ന് തിരിച്ചറിഞ്ഞതായി ഹമാസ് പ്രസ്താവനയിൽ അറിയിച്ചു. "വെസ്റ്റ് ബാങ്കിലെ പ്രതിരോധത്തിന്റെ ജ്വാലകൾ കെടുത്താനുള്ള അധിനിവേശത്തിന്റെ ശ്രമങ്ങൾ പരാജയപ്പെടുമെന്നും" ഹമാസ് പ്രസ്താവനയിൽ വ്യക്തമാക്കി.

The psychological trauma from Gaza's conflict led Israeli soldier Daniel Edri, 24, to take his own life by setting his car on fire near Safed. Haunted by war's horrors, including the smell and sight of corpses, he struggled with severe mental health issues. Despite his family's request, the Israeli army denied him a military funeral