പന്തളം: വളർത്തുപൂച്ച മാന്തിയതിനെ തുടർന്ന് ചികിത്സയിലായിരുന്ന ആറാം ക്ലാസ് വിദ്യാർഥിനി മരിച്ചു. പന്തളത്തെ കടക്കാട്, മണ്ണിൽ തെക്കേതിൽ അഷ്റഫ് റാവുത്തർ-സജിന ദമ്പതികളുടെ മകൾ ഹന്ന ഫാത്തിമ (11) ആണ് മരിച്ചത്. തോന്നല്ലൂർ ഗവ. യു.പി. സ്കൂളിലെ വിദ്യാർഥിനിയായിരുന്നു ഹന്ന.

ജൂലൈ 2-ന് വീട്ടിലെ വളർത്തുപൂച്ച ഹന്നയെ മാന്തിയതിനെ തുടർന്ന് പന്തളത്തെ കുടുംബാരോഗ്യ കേന്ദ്രത്തിൽ എത്തി പ്രാഥമിക ചികിത്സ നൽകിയിരുന്നു. തുടർന്ന് പ്രതിരോധ കുത്തിവെപ്പിനായി അടൂർ താലൂക്ക് ആശുപത്രിയിലേക്ക് റഫർ ചെയ്തു. അവിടെനിന്ന് ആദ്യ ഘട്ട വാക്സിൻ സ്വീകരിച്ചു. രണ്ടാം ഘട്ട കുത്തിവെപ്പിനായി തിങ്കളാഴ്ച പന്തളം കുടുംബാരോഗ്യ കേന്ദ്രത്തിൽ വീണ്ടും എത്തിയ ഹന്ന, വാക്സിനേഷന് ശേഷം അസ്വസ്ഥത പ്രകടിപ്പിക്കുകയായിരുന്നു.

വീട്ടിലെത്തിയ ശേഷവും ശാരീരിക അസ്വസ്ഥത വർധിച്ചതോടെ ബന്ധുക്കൾ വീണ്ടും കുടുംബാരോഗ്യ കേന്ദ്രത്തിൽ എത്തിച്ചു. തുടർന്ന് പത്തനംതിട്ട ജില്ലാ ആശുപത്രിയിലേക്കും പിന്നീട് വിദഗ്ധ ചികിത്സയ്ക്കായി കോട്ടയം മെഡിക്കൽ കോളജ് ആശുപത്രിയിലേക്കും മാറ്റി. എന്നാൽ, ഇന്ന് രാവിലെ ചികിത്സയ്ക്കിടെ ഹന്ന മരണപ്പെടുകയായിരുന്നു.

ALSO READ: ചെങ്കടലിൽ കപ്പൽ ആക്രമണത്തിന് പിന്നാലെ ഹൂതികൾ;  ഇസ്റാഈൽ വിമാനത്താവളം ലക്ഷ്യമിട്ട് മിസൈൽ ആക്രമണം

മരണം പൂച്ചയുടെ മാന്തലിന്റെ ഫലമല്ലെന്നാണ് ആശുപത്രി അധികൃതരുടെ പ്രാഥമിക നിഗമനം. കുട്ടിക്ക് ഡെങ്കി അല്ലെങ്കിൽ നിപ വൈറസ് ബാധയുണ്ടോ എന്ന് സംശയിക്കുന്നതായി ആരോഗ്യ വകുപ്പ് അറിയിച്ചു. മരണകാരണം കണ്ടെത്താൻ സാംപിളുകൾ വിദഗ്ധ പരിശോധനയ്ക്ക് അയച്ചിട്ടുണ്ട്. മരണവുമായി ബന്ധപ്പെട്ട് ബന്ധുക്കൾ പരാതി നൽകിയിട്ടില്ല. ഹന്ന ഫാത്തിമയുടെ കബറടക്കം വെള്ളിയാഴ്ച കടക്കാട് മുസ് ലിം ജുമാ മസ്ജിദ് കബർസ്ഥാനിൽ നടക്കും.

In Pandalam, Kerala, 11-year-old Hanna Fathima, a sixth-grade student, died while undergoing treatment after being scratched by a pet cat on July 2. She received initial care and vaccinations at local hospitals, but her condition worsened after a second vaccine dose. Transferred to Kottayam Medical College Hospital, she passed away on Thursday. Authorities have ruled out the cat scratch as the cause of death, with samples sent for testing to check for dengue or Nipah virus. Her funeral is scheduled for Friday