യമൻ: ഗസ്സയിലെ യുദ്ധം അവസാനിപ്പിക്കാൻ ഇസ്റാഈലിന് മേൽ സമ്മർദ്ദം ചെലുത്താനുള്ള ശ്രമത്തിന്റെ ഭാഗമായി ചെങ്കടലിൽ യമനിലെ ഹൂതി വിമതർ നടത്തിയ ആക്രമണത്തിൽ ഗ്രീക്ക് നിയന്ത്രണത്തിലുള്ള ലൈബീരിയൻ എറ്റേണിറ്റി സി എന്ന ചരക്ക് കപ്പൽ മുങ്ങി. ആക്രമണത്തിൽ നാല് നാവികർ കൊല്ലപ്പെടുകയും 11 പേരെ കാണാതാവുകയും ചെയ്തു. ഇതിൽ ആറ് പേർ ഹൂതികളുടെ കസ്റ്റഡിയിലാണെന്ന് സംശയിക്കുന്നു.  പിന്നാലെ ഹൂതികൾ ഇസ്റാഈലിലെ ബെൻ ഗുരിയോൺ വിമാനത്താവളം ലക്ഷ്യമിട്ട് ബാലിസ്റ്റിക് മിസൈൽ ആക്രമണം നടത്തിയതായും വിമത സൈനിക വക്താവ് യഹ്‌യ സാരി അറിയിച്ചു.

യൂറോപ്യൻ യൂണിയൻ നാവിക സേനയായ ആസ്പൈഡ്‌സ് ടാസ്‌ക് ഫോഴ്‌സിന്റെ റിപ്പോർട്ട് പ്രകാരം, എറ്റേണിറ്റി സി കപ്പലിൽ 25 ജീവനക്കാരാണ് ഉണ്ടായിരുന്നത്. തിങ്കളാഴ്ച ഹൂതികൾ ആളില്ലാ ബോട്ടുകളും മിസൈലുകളും ഉപയോഗിച്ച് നടത്തിയ ആക്രമണത്തിൽ കപ്പൽ ഗുരുതരമായി തകർന്ന് ശേഷം ചൊവ്വാഴ്ച മുങ്ങി. 10 ജീവനക്കാരെ കടലിൽ നിന്ന് ജീവനോടെ രക്ഷപ്പെടുത്തിയെങ്കിലും 11 പേരെ ഇപ്പോഴും കണ്ടെത്താനായിട്ടില്ല. ആറ് പേർ ഹൂതികളുടെ കൈവശമാണെന്നാണ്  സുരക്ഷാ വൃത്തങ്ങൾ റോയിട്ടേഴ്‌സിനോട് വെളിപ്പെടുത്തിയത്.

കപ്പലിലെ നിരവധി ജീവനക്കാരെ രക്ഷപ്പെടുത്തി, വൈദ്യസഹായം നൽകി, സുരക്ഷിത സ്ഥലത്തേക്ക് മാറ്റിയിട്ടുണ്ട്,” ഹൂതി വക്താവ് യഹ്‌യ സാരി ഇന്നലെ പറഞ്ഞു. എന്നാൽ, യമനിലെ അമേരിക്കൻ എംബസി ഇതിനെ ശക്തമായി എതിർത്തു. “ഹൂതികൾ കപ്പലിലെ ജീവനക്കാരെ കൊല്ലുകയും കപ്പൽ മുങ്ങുകയും രക്ഷാപ്രവർത്തനങ്ങൾ തടസ്സപ്പെടുത്തുകയും ചെയ്ത ശേഷം ക്രൂ അംഗങ്ങളെ തട്ടിക്കൊണ്ടുപോയി,” എന്നാണ് എംബസി ആരോപിച്ചത്.

ALSO READ: വളർത്തുപൂച്ച മാന്തിയതിനെ തുടർന്ന് ചികിത്സയിലായിരുന്ന വിദ്യാർഥിനി മരിച്ചു 

ഹൂതികളുടെ തുടർച്ചയായ ആക്രമണങ്ങൾ

കഴിഞ്ഞ ദിവസം ഹൂതികൾ മാജിക് സീസ് എന്ന മറ്റൊരു കപ്പൽ ആക്രമിച്ച് മുക്കിയിരുന്നു. 2023 നവംബർ മുതൽ ചെങ്കടലിൽ 100-ലധികം കപ്പലുകൾക്ക് നേരെ ഹൂതികൾ ആക്രമണം നടത്തിയിട്ടുണ്ട്. മാജിക് സീസ് കപ്പലിലെ എല്ലാ ജീവനക്കാരെയും രക്ഷപ്പെടുത്തിയിരുന്നു. “ഇസ്റാഈലുമായി ബന്ധമുള്ള കപ്പലുകൾ നിയമപരമായ ലക്ഷ്യമാണ്. ഗസ്സയിലെ ആക്രമണവും ഉപരോധവും അവസാനിപ്പിക്കുന്നതുവരെ ചെങ്കടലിലും അറേബ്യൻ കടലിലും ഇസ്റാഈൽ നാവിഗേഷൻ തടയും,” ഹൂതികൾ പ്രഖ്യാപിച്ചു.

ഞായറാഴ്ച വൈകുന്നേരം, യമനിലെ ഹൂതി നിയന്ത്രണത്തിലുള്ള ഹൊദൈദ, റാസ് ഇസ, അസ്-സാലിഫ് തുറമുഖങ്ങളിലും റാസ് ഖന്തിബ് വൈദ്യുത നിലയത്തിലും ഇസ്റാഈൽ വ്യോമാക്രമണം നടത്തി. 2023 അവസാനം ഹൂതികൾ പിടിച്ചെടുത്ത ഗാലക്‌സി ലീഡർ കപ്പലിന്റെ റഡാർ സംവിധാനവും ആക്രമിക്കപ്പെട്ടതായി ഇസ്റാഈൽ അവകാശപ്പെട്ടു. ഗാലക്‌സി ലീഡറിലെ 25 ജീവനക്കാരെ 430 ദിവസം തടവിൽ വച്ച ശേഷം ഈ വർഷം ജനുവരിയിൽ ഹൂതികൾ മോചിപ്പിച്ചിരുന്നു.

എറ്റേണിറ്റി സി കപ്പലിന് നേരെയുള്ള ആക്രമണം ചിത്രീകരിച്ചതായി അവകാശപ്പെടുന്ന ഒരു വീഡിയോ ഹൂതികൾ പുറത്തുവിട്ടു. കപ്പലിലെ ജീവനക്കാരോട് ഒഴിഞ്ഞുമാറാൻ ആവശ്യപ്പെടുന്നതും കപ്പൽ മുങ്ങുന്നതിന് മുമ്പുള്ള സ്ഫോടനങ്ങളുടെ ദൃശ്യങ്ങളും വീഡിയോയിൽ ഉൾപ്പെട്ടിട്ടുണ്ട്. ഇസ്റാഈലിനെ ലക്ഷ്യമാക്കി നീങ്ങിയിരുന്ന കപ്പലിലെ ജീവനക്കാരെ രക്ഷിക്കാൻ ഞങ്ങൾ ശ്രമിച്ചു,” യഹ്‌യ സാരി വ്യക്തമാക്കി.

അന്താരാഷ്ട്ര പ്രതികരണം

യമനിലെ യുഎസ് മിഷൻ, ഹൂതികൾ തട്ടിക്കൊണ്ടുപോയ ജീവനക്കാരെ ഉടൻ മോചിപ്പിക്കണമെന്ന് ആവശ്യപ്പെട്ടു. ബ്രിട്ടീഷ് നാവിക സേനയുടെ യുകെഎംടിഒ സെന്റർ, കപ്പലിന് “ഗുരുതരമായ കേടുപാടുകൾ” സംഭവിച്ചതായും “പ്രൊപ്പൽഷൻ പൂർണമായും നഷ്ടപ്പെട്ടതായും” റിപ്പോർട്ട് ചെയ്തു. ഹൊദൈദയ്ക്ക് സമീപം കപ്പൽ മുങ്ങിയതായി സുരക്ഷാ ഏജൻസിയായ ആംബ്രി എഎഫ്‌പിയോട് സ്ഥിരീകരിച്ചു. ഗസ്സയിലെ ഫലസ്തീനികളോടുള്ള ഐക്യദാർഢ്യം പ്രകടിപ്പിച്ച് 2023 നവംബർ മുതൽ ഹൂതികൾ ചെങ്കടലിൽ ആക്രമണം ശക്തമാക്കിയിരുന്നു. മാസങ്ങൾ നീണ്ട ശാന്തതയ്ക്ക് ശേഷം, ഗസ്സ യുദ്ധവുമായി ബന്ധപ്പെട്ട് ഹൂതികളുടെ പ്രചാരണം വീണ്ടും സജീവമായത് ഈ ആക്രമണങ്ങൾ സൂചിപ്പിക്കുന്നു. ഇസ്റാഈലിന്റെ പ്രത്യാക്രമണവും ഹൂതികളുടെ മിസൈൽ ആക്രമണവും കാരണം മേഖല രൂക്ഷമാക്കിയിരിക്കുകയാണ്.

Following a deadly attack on the Eternity C ship in the Red Sea, where four sailors were killed and six reportedly taken hostage, Yemen's Houthi rebels launched a ballistic missile at Israel's Ben Gurion Airport. The assault, part of their campaign to pressure Israel over the Gaza conflict, was intercepted, but tensions escalate as the Houthis vow to target Israeli-linked vessels