ന്യൂഡല്‍ഹി: നിയമസഭാ, ലോക്‌സഭാ തെരഞ്ഞെടുപ്പുകള്‍ ഏകീകരിക്കുന്ന കേന്ദ്രസര്‍ക്കാരിന്റെ പദ്ധതിയായ 'ഒരു രാജ്യം ഒരു തെരഞ്ഞെടുപ്പ്' പദ്ധതിയോട് വിയോജിപ്പ് അറിയിച്ച് സുപ്രിംകോടതിയുടെ വിരമിച്ച നാലു ചീഫ്ജസ്റ്റിസുമാര്‍. വിഷയത്തില്‍ രൂപീകരിച്ച സംയുക്ത പാര്‍ലമെന്ററി കമ്മിറ്റിയുടെ (ജെ.പി.സി) മുമ്പാകെയാണ് മുന്‍ ചീഫ്ജസ്റ്റിസുമാരായ ഡി.വൈ ചന്ദ്രചൂഡ്, ജസ്റ്റിസ് ജെ.എസ് ഖെഹാര്‍, ജസ്റ്റിസ് രഞ്ജന്‍ ഗൊഗോയ്, ജസ്റ്റിസ് യു.യു ലളിത് എന്നിവര്‍ തെരഞ്ഞെടുപ്പുകള്‍ ഏകീകരിക്കുന്നതിനെതിരായ അഭിപ്രായം രേഖപ്പെടുത്തിയത്.

ഇതുസംബന്ധിച്ച ബില്ലില്‍ തെരഞ്ഞെടുപ്പ് കമ്മിഷന് പരിധിയില്ലാത്തതും അനിയന്ത്രിതവുമായ അധികാരങ്ങള്‍ നല്‍കുന്നുണ്ടെന്ന് അവര്‍ ആശങ്ക പ്രകടിപ്പിച്ചു. ഇക്കാരണത്താല്‍ ഭാവിയില്‍ ഭരണഘടനാ സന്തുലിതാവസ്ഥ തകരാറിലായേക്കാമെന്ന ആശങ്ക പങ്കുവച്ച മുന്‍ ചീഫ്ജസ്റ്റിസുമാര്‍, ഇത്തരമൊരു സാഹചര്യം ഉണ്ടായാലുള്ള അര്‍ത്ഥം ഊഹിക്കാവുന്നതേയുള്ളൂവെന്നും അഭിപ്രായപ്പെട്ടു. കഴിഞ്ഞയാഴ്ചയാണ് ഡി.വൈ ചന്ദ്രചൂഡും ജെ.എസ് ഖെഹാറും ജെ.പി.സിക്ക് മുമ്പിലെത്തി നിലപാട് വ്യക്തമാക്കിയത്. എന്നാല്‍ മാര്‍ച്ചിലാണ് നിലവില്‍ രാജ്യസഭാംഗംകൂടിയായ രഞ്ജന്‍ ഗൊഗോയിയും യു.യു ലളിതും തങ്ങളുടെ വീക്ഷണങ്ങള്‍ പങ്കുവച്ചത്.

ഒരേസമയം തെരഞ്ഞെടുപ്പ് നടത്തുന്നതിനായി ഒരു സംസ്ഥാനത്തെ തെരഞ്ഞെടുപ്പ് വൈകിപ്പിക്കാന്‍ കഴിയുമോ എന്ന് തീരുമാനിക്കാനുള്ള തെരഞ്ഞെടുപ്പ് കമ്മിഷന്റെ അധികാരം ഭരണഘടനാപരമായി അനുവദനീയമാണോ എന്ന് ജെ.എസ് ഖെഹാറും ഡി.വൈ ചന്ദ്രചൂഡും സംശയം പ്രകടിപ്പിച്ചു. എങ്കിലും ഒന്നിച്ച് തെരഞ്ഞെടുപ്പ് നടത്തുന്നത് ഭരണഘടനക്ക് വിരുദ്ധമല്ലെന്ന് ഇരുവരും അറിയിച്ചു. എന്നാല്‍ ഇത്തരമൊരു സാഹചര്യത്തില്‍ തെരഞ്ഞെടുപ്പ് കമ്മിഷന്റെ അധികാരങ്ങള്‍ക്ക് ഭരണഘടനാപരമായ ബലഹീനതകള്‍ ഉണ്ടാകാമെന്ന് ജസ്റ്റിസ് ചന്ദ്രചൂഡ് ചൂണ്ടിക്കാട്ടി. നിര്‍ദ്ദിഷ്ട ബില്‍ ഭരണഘടനയുടെ അടിസ്ഥാന ഘടനയ്ക്ക് എതിരല്ല. എന്നാല്‍ അതിന്റെ ചില ഭാഗങ്ങള്‍ നിയമപരമായി ദുര്‍ബലമാണ്. പ്രത്യേകിച്ചും, എന്തെങ്കിലും കാരണവശാല്‍ ഒരു സംസ്ഥാനത്ത് തിരഞ്ഞെടുപ്പ് മാറ്റിവയ്ക്കാന്‍ കമ്മീഷന് അധികാരം നല്‍കുന്ന ആര്‍ട്ടിക്കിള്‍ 82എ(5) വകുപ്പിനോട് ബില്ല് യോജിക്കുന്നതല്ല. നിയമം വ്യക്തമല്ലാത്ത ഈയൊരു സാഹചര്യത്തെ 'ഭരണഘടനാപരമായ നിശബ്ദത' എന്നാണ് ജസ്റ്റിസ് ചന്ദ്രചൂഡ് വിശേഷിപ്പിച്ചത്. 

ALSO READ: 75ല്‍ വിരമിച്ച് മോഹന്‍ ഭാഗവത് മോദിക്ക് മേല്‍ സമ്മര്‍ദ്ദം ചെലുത്തുമോ?; പ്രായപരിധി സംബന്ധിച്ച് സംഘ്പരിവാരില്‍ ചൂടുപിടിച്ച ചര്‍ച്ച | Narendra Modi Retirement

ഒരേസമയം തെരഞ്ഞെടുപ്പുകള്‍ നടത്തുന്നതിനുള്ള ഷെഡ്യൂള്‍ തീരുമാനിക്കാന്‍ കമ്മിഷന് അനിയന്ത്രിതമായ അധികാരങ്ങള്‍ ബില്ലില്‍ നല്‍കിയിട്ടുണ്ടെന്ന് രഞ്ജന്‍ ഗൊഗോയിയും യു.യു ലളിതും ചൂണ്ടിക്കാട്ടി. കമ്മിഷന്റെ അധികാരം ഉള്‍പ്പെടെ വിവിധ വശങ്ങളെക്കുറിച്ച് ചില നിര്‍ദ്ദേശങ്ങളും ഇരുവരും നല്‍കി.
പാര്‍ലമെന്ററി മേല്‍നോട്ടമില്ലാതെ കമ്മിഷന് ശക്തമായ അധികാരം നല്‍കുന്നത് ജനാധിപത്യത്തിന്റെ ആത്മാവിന് എതിരാണെന്ന അഭിപ്രായം നാലു മുന്‍ ചീഫ്ജസ്റ്റിസുമാരും പങ്കുവച്ചതായും മാധ്യമങ്ങള്‍ റിപ്പോര്‍ട്ട്‌ചെയ്തു. ഇത്തരം ക്രമീകരണങ്ങള്‍ ഭാവിയില്‍ നിയമപരമായ തര്‍ക്കങ്ങള്‍ക്ക് കാരണമാകുമെന്ന് ജെ.പി.സിയിലെ വിവിധ അംഗങ്ങളും സമ്മതിച്ചു.

അതേസമയം, എല്ലാ വിദഗ്ധരുടെയും അഭിപ്രായത്തെ സമിതി മാനിക്കുന്നുവെന്നും ബില്‍ പാസാക്കുക മാത്രമല്ല, ഭരണഘടനാപരവും പ്രായോഗികവുമാക്കുകയുമാണ് ലക്ഷ്യമെന്നും ജെ.പി.സി ചെയര്‍മാന്‍ പി.പി ചൗധരി പറഞ്ഞു. 

Appearing before the Joint Committee of Parliament on ‘One Nation, One Election’Bill, four former Chief Justices of India have red-flagged the vast powers that the Election Commission holds in the proposed law for holding simultaneous polls. Former CJIs JS Khehar and DY Chandrachud expressed doubts whether the power of EC to decide if simultaneous polls can be delayed for a state is constitutionally permissible.