ന്യൂഡല്‍ഹി: പ്രധാനമന്ത്രി നരേന്ദ്രമോദിയെ 75 വയസ്സ് പ്രായപരിധി ഓര്‍മിപ്പിച്ചും സ്ഥാനമൊഴിയാന്‍ ആവശ്യപ്പെട്ടുമുള്ള ആര്‍.എസ്.എസ് മേധാവി മോഹന്‍ ഭാഗവതിന്റെ പ്രസംഗത്തിന് പിന്നാലെ, പ്രായപരിധി സംബന്ധിച്ച ചര്‍ച്ച സംഘ്പരിവാരില്‍ ചൂടുപിടിക്കുന്നു. സര്‍സംഘ്ചാലകിന്റെ നിര്‍ദേശങ്ങള്‍ സംഘം കേഡര്‍മാര്‍ തള്ളാറില്ലെന്നതിനാലാണ്, ഭാഗവതിന്റെ പ്രസ്താവന സംഘകുടുംബത്തില്‍ ചൂടുപിടിച്ച ചര്‍ച്ചയ്ക്ക് വഴിവച്ചത്. ഭഗവതിന്റെ വിരമിക്കല്‍ നിര്‍ദേശം ആര്‍.എസ്.എസ്സുകാരനായ മോദിക്ക് ധിക്കരിക്കാന്‍ കഴിയില്ലെന്ന് ചൂണ്ടിക്കാണിക്കപ്പെടുന്നു. 

75 വയസ്സ് തികഞ്ഞ് ഷാള്‍ നല്‍കി ആദരിക്കുകയാണെങ്കില്‍, അതിനര്‍ഥം നിങ്ങള്‍ക്ക് വയസ്സായിട്ടുണ്ടെന്നും മറ്റുള്ളവര്‍ക്കായി വഴിയൊരുക്കുക എന്നുമാണെന്ന ആര്‍.എസ്.എസ് നേതാവായിരുന്ന മോറോപന്ത് പിംഗ്ലെയുടെ വാക്ക് ഓര്‍മിപ്പിച്ചുകൊണ്ടായിരുന്നു കഴിഞ്ഞദിവസം മോദിക്കെതിരായ ഭാഗവതിന്റെ ഒളിയമ്പ്. ഈ സാഹചര്യത്തില്‍ സെപ്റ്റംബര്‍ 17ന് 75 വയസ്സ് തികയുന്ന ദിവസം പിംഗ്ലെയുടെ സന്ദേശം മോദി അനുസരിക്കുമോ എന്നതാണ് സംഘകുടുംബത്തിലെ ചോദ്യം.

ALSO READ: എയര്‍ ഇന്ത്യ അപകടം; പ്രാഥമിക റിപ്പോര്‍ട്ട് തള്ളി പൈലറ്റ് അസോസിയേഷന്‍; പിഴവ് പൈലറ്റിന്റെ തലയില്‍ കെട്ടിവെക്കാനുള്ള ശ്രമമെന്ന് ആരോപണം

ഭാഗവതിന്റെ പ്രസ്താവന മോദിയെയും അദ്ദേഹത്തെ അനുകൂലിക്കുന്ന സംഘ്പരിവാര്‍ നേതാക്കളെയും അസ്വസ്ഥതരാക്കിയിട്ടുണ്ടെന്നുള്ളത് നേരാണ്. മോദിയും ഭാഗവതും തമ്മില്‍ ആറുദിവസത്തെ പ്രായവ്യത്യാസം മാത്രമാണുള്ളത്. 1950 സെപ്റ്റംബര്‍ 11ന് ഭാഗവതും 17ന് മോദിയും ജനിച്ചു. 75 തികയുന്നതോടെ സര്‍സംഘ് ചാലക് പദവി ഒഴിഞ്ഞ് ഭാഗവത്, മോദിക്കുമേല്‍ സമ്മര്‍ദ്ദം സൃഷ്ടിക്കാനിടയുണ്ടെന്ന സൂചനയും ശക്തമാണ്. അടുത്ത വര്‍ഷത്തെ ദസറയില്‍ ആര്‍.എസ്.എസ് ശതാബ്ദി വാര്‍ഷികാഘോഷങ്ങളുടെ സമാപനത്തിലോ അതിന് മുമ്പോ അദ്ദേഹം പദവിയൊഴിയുമെന്നും സംസാരമുണ്ട്. ഈ വര്‍ഷം ഒക്ടോബര്‍ രണ്ടിന് ദസറ ആഘോഷിക്കുമ്പോഴും ഭാഗവതില്‍നിന്ന് സര്‍പ്രൈസ് പ്രഖ്യാപനമുണ്ടായേക്കാമെന്നും റിപ്പോര്‍ട്ടുണ്ട്.
75 വയസ്സ് തികയുമ്പോള്‍ സംഘടനാ, പൊതു സ്ഥാനങ്ങളില്‍ നിന്ന് രാജിവയ്ക്കണമെന്ന് ബി.ജെ.പിയുടെ ഭരണഘടനയില്‍ ഇല്ലെന്നാണ്, പാര്‍ട്ടിയിലെ വിരമിക്കല്‍ പ്രായത്തെ എതിര്‍ക്കുന്നവരുടെ വാദം. 2019 ല്‍ കര്‍ണാടക മുഖ്യമന്ത്രിയാകുമ്പോള്‍ ബി.എസ് യെദ്യൂരപ്പയുടെ പ്രായം 76 ആയിരുന്നു. പിന്നീട് രണ്ടുവര്‍ഷം കൂടി അദ്ദേഹം അധികാരത്തില്‍ തുടരുകയുംചെയ്ത കാര്യവും ഇവര്‍ ചൂണ്ടിക്കാട്ടുന്നു.
2014ല്‍ മോദി പ്രധാനമന്ത്രിയാകുമ്പോള്‍, ആ സമയത്തെ മുതിര്‍ന്ന നേതാക്കളായ എല്‍.കെ അഡ്വാനിയെയും മുരളീമനോഹര്‍ ജോഷിയെയും ഒതുക്കാനായി കൊണ്ടുവന്നതാണ് 75 വയസ്സ് പ്രായപരിധിയെന്ന അനൗദ്യോഗിക നിയമം. എന്നാല്‍ മോദിക്ക് 75 തികയാന്‍ രണ്ട് മാസം മാത്രമുള്ളപ്പോള്‍, പഴയ അഡ്വാനി അനുകൂലികള്‍ മോഹന്‍ ഭാഗവതിലൂടെ തിരിച്ചടിക്കുകയാണെന്നാണ് റിപ്പോര്‍ട്ട്.
സംഘ്പരിവാര്‍ വൃത്തത്തിന് പുറത്തും മോദിക്കുള്ള സ്വീകാര്യത ആര്‍.എസ്.എസ് അംഗീകരിക്കുന്നുണ്ടെങ്കിലും, തങ്ങളുടെ നിയന്ത്രണത്തില്‍നിന്ന് പുറത്തുപോയി മോദിയും ബി.ജെ.പിയും 'സ്വയംഭരണ പ്രസ്ഥാന'മായി മാറിയെന്ന പരാതി ആര്‍.എസ്.എസിനുണ്ട്. 2024ലെ ലോക്‌സഭാ തെരഞ്ഞെടുപ്പ് സമയത്ത് ഈയൊരു ശീതസമരം പ്രകടമാകുകയുംചെയ്തു. ഇതു പരസ്യമാക്കുന്നവിധത്തില്‍ മോഹന്‍ ഭാഗവതില്‍നിന്നും അന്നത്തെ ബി.ജെ.പി അധ്യക്ഷനായിരുന്ന ജെ.പി നദ്ദയില്‍നിന്നും പ്രസ്താവനകളും ഉണ്ടായി.

Mohan Bhagwat's speech, which reminded Prime Minister Narendra Modi of his 75th year, has heated up the debate on age limit in the Sangh Parivar. Bhagwat's statement sparked a heated debate within the Sangh family, as Sangh cadres do not reject the instructions of the Sarsanghchalak. It is pointed out that Modi, an RSS member, cannot defy the retirement order from the Sarsanghchalak.