ന്യൂഡല്‍ഹി: ഡല്‍ഹിയില്‍ വിദ്യാഭ്യാസ സ്ഥാപനങ്ങളില്‍ ഇ മെയില്‍ വഴി ബോംബ് ഭീഷണി. ഡല്‍ഹി സെന്റ് സ്റ്റീഫന്‍സ് കോളജിലും സ്‌കൂളുകളിലുമാണ് ഇ മെയില്‍ വഴി ഭീഷണി സന്ദേശമെത്തിയത്. ദ്വാരക സെന്റ് തോമസ് സ്‌കൂളിനും ഭീഷണി സന്ദേശം ലഭിച്ചിട്ടുണ്ട്. സ്ഥലത്ത് ബോംബ് സ്‌കോഡ് പരിശോധന നടത്തുകയാണ്. പഞ്ചാബിലെ സുവര്‍ണ ക്ഷേത്രത്തിന് നേരെയും ബോംബ് ഭീഷണിയുണ്ടായി. 

സുവര്‍ണ ക്ഷേത്രം തകര്‍ക്കുമെന്നാണ് ഭീഷണി സന്ദേശം. ശിരോമണി ഗുരുദ്വാര പ്രബന്ധക് കമ്മിറ്റിയുടെ പരാതിയില്‍ പൊലിസ് കേസെടുത്തു. അന്വേഷണം ആരംഭിച്ചതായി അമൃത്സര്‍ പോലിസ് കമ്മീഷണര്‍ ഗുര്‍പ്രീത് സിംഗ് ഭുള്ളര്‍ അറിയിച്ചു. സുവര്‍ണ ക്ഷേത്ര സമുച്ചയത്തിലെ ലങ്കാര്‍ ഹാള്‍ (കമ്മ്യൂണിറ്റി കിച്ചണ്‍ ഹാള്‍) പൊട്ടിത്തെറിക്കുമെന്ന് ഭീഷണിപ്പെടുത്തിയുള്ള ഒരു ഇമെയില്‍ കമ്മിറ്റിക്ക് ലഭിച്ചതായി ശിരോമണി ഗുരുദ്വാര പ്രബന്ധക് കമ്മിറ്റി (എസ്ജിപിസി) സംസ്ഥാന പൊലിസിന് നല്‍കിയ പരാതിയില്‍ പറയുന്നു.

സംസ്ഥാന സൈബര്‍ കുറ്റകൃത്യങ്ങളുടെയും മറ്റ് ഏജന്‍സികളുടെയും സഹായം ഇതിനായി തേടുമെന്നും അന്വേഷണം ആരംഭിച്ചതിനാല്‍ കേസ് ഉടന്‍ പരിഹരിക്കുമെന്നും കമ്മീഷണര്‍ വ്യക്തമാക്കി. അനിഷ്ട സംഭവങ്ങള്‍ തടയാന്‍ ബോംബ് ഡിസ്‌പോസല്‍ സ്‌ക്വാഡും ആന്റിസാബോട്ടേജ് ടീമും വിന്യസിച്ചിട്ടുണ്ടെന്നും കമ്മീഷണര്‍ അറിയിച്ചു.