ജീവനുള്ള അമ്മയ്ക്ക് ശവപ്പെട്ടി വാങ്ങി നല്‍കി മകന്‍. നമുക്ക് ചിന്തിക്കാന്‍ പോലും കഴിയുമോ..? ജീവിച്ചിരിക്കുന്നവര്‍ക്ക് ശവപ്പെട്ടി വാങ്ങിക്കുക എന്നത്. ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുകയാണ് ഈ സംഭവം. ചൈനയിലാണ് ജീവിച്ചിരിക്കുന്ന അമ്മയ്ക്കു വേണ്ടി യുവാവ് ശവപ്പെട്ടി വാങ്ങിയിരിക്കുന്നത്. 

ഈ യുവാവ് ചെയ്തത് അതുമാത്രമല്ല, വാങ്ങിയ ശവപ്പെട്ടിയില്‍ 70 കാരിയായ അമ്മയെ കടയില്‍ നിന്ന് വീട്ടിലേക്ക് ചുമക്കാന്‍ 16 പേരെയുമാണ് ചുമതലപ്പെടുത്തിയത്. തെക്കന്‍ ചൈനയിലെ ഹുനാന്‍ പ്രവിശ്യയിലെ ചാങ്‌ഡെയിലെ തായോയുവാന്‍ കൗണ്ടിയിലെ ഷുവാഹ്‌സിക്കോ ടൗണിലാണ് ഈ യുവാവിന്റെ താമസം. ഇയാളുടെ പേര് വെളിപ്പെടുത്തിയിട്ടില്ല. 

കാരണം എന്താണെന്നല്ലേ..? 

ഇങ്ങനെ ശവപ്പെട്ടിയില്‍ കിടത്തി തന്റെ അമ്മയെ കൊണ്ടുവരുന്നത് അമ്മയുടെ ദീര്‍ഘായുസ് വര്‍ധിപ്പിക്കുമെന്നാണ് യുവാവ് വിശ്വസിക്കുന്നത്. അതുകൊണ്ടാണത്രേ മകന്‍ ഇത് ചെയ്തത്. ചൈനീസ് സോഷ്യല്‍ മീഡിയ പ്ലാറ്റ്‌ഫോമായ ഡൗയിനിലാണ് ഇതിന്റെ വിഡിയോ പ്രചരിക്കുന്നത്. ശവപ്പെട്ടിക്കുള്ളില്‍ വൃദ്ധയായ സ്ത്രീ ഒരു വിശറിയും പിടിച്ചിരിക്കുന്നതും ആളുകള്‍ ശവപ്പെട്ടി ചുമന്നു ഘോഷയാത്ര പോലെ പോകുന്നതും വിഡിയോയിലുണ്ട്. സൗത്ത്‌ചൈന മോണിങും പോസ്റ്റ് റിപോര്‍ട്ട് ചെയ്തിട്ടുണ്ട്. വാദ്യമേളങ്ങളുടെ അകമ്പടിയോടെയാണ് വൃദ്ധയെ ശവപ്പെട്ടിയില്‍ കൊണ്ടു പോകുന്നത്. 

വീട്ടിലെത്തിയ ശേഷം ശവപ്പെട്ടി ഇറക്കി പഴങ്ങളും ധൂപങ്ങളും വച്ച് വേറെ ചടങ്ങുകളും നടത്തുന്നുണ്ട്. ഇത് പരമ്പരാഗത രീതിയാണെന്നും ഇങ്ങനെ ചെയ്താല്‍ ആയുസ് കൂടുമെന്നുമാണ് കരുതുന്നതെന്ന് പ്രദേശവാസികളും പറയുന്നു. എന്നാല്‍  ഇപ്പോള്‍ ഇത്തരം ചടങ്ങുകളൊന്നും നടത്താറില്ലെന്നും ഇവര്‍ പറഞ്ഞു. മാത്രമല്ല ഇതിന്റെ ചിലവ് ഏകദേശം 2800 ഡോളര്‍, 2.4 ലക്ഷം രൂപ ചെലവും വരും.