ഇടുക്കി: തൊടുപുഴയിൽ നടത്തിയ വിദ്വേഷ പ്രസംഗത്തിൽ ബിജെപി നേതാവ് പി.സി ജോർജിനെതിരെ കേസെടുക്കാൻ നിർദേശിച്ച് കോടതി. തൊടുപുഴ ഫസ്റ്റ് ക്ലാസ് മജിസ്‌ട്രേറ്റ് കോടതിയാണ് തൊടുപുഴ പൊലിസിന് നിർദ്ദേശം നൽകിയത്. അടിയന്തരാവസ്ഥയുടെ വാർഷികവുമായി ബന്ധപ്പെട്ട് നടത്തിയ പരിപാടിക്കിടെയാണ് മുൻ എംഎൽഎയായ പി.സി ജോർജ് വിദ്വേഷ പ്രസംഗം നടത്തിയത്. സംഭവത്തിൽ ഏറെ വിമർശനം ഉയർന്നിരുന്നെങ്കിലും പൊലിസ് കേസെടുത്തിരുന്നില്ല.

വർഗീയ പരാമർശം നടത്തിയതിൽ പൊലിസ് പി.സി ജോർജിനെതിരെ കേസെടുക്കണമെന്ന് ആവശ്യപ്പെട്ട് യൂത്ത് കോൺഗ്രസ് ഡിജിപിയ്ക്ക് പരാതി നൽകിയിരുന്നു. ‘മീനച്ചിൽ താലൂക്കിൽ മാത്രം 400 പെൺകുട്ടികൾ നമുക്ക് നഷ്ടമായി’ എന്ന രീതിയിലുള്ള പ്രസംഗമാണ് ലൗ ജിഹാദുമായി ബന്ധപ്പെട്ട് പി.സി ജോർജ് നടത്തിയത്. കേരളത്തിൽ ഒരു കേസ് പോലും ലൗ ജിഹാദിന്റെ പേരിൽ രജിസ്റ്റർ ചെയ്യാത്തിടത്താണ് പി.സി. ജോർജ് വർഗീയ പരാമർശം നടത്തുന്നതെന്ന് യൂത്ത് കോൺഗ്രസ് ആരോപിച്ചു. യൂത്ത് കോൺഗ്രസ് തൊടുപുഴ നിയോജക മണ്ഡലം പ്രസിഡന്‍റ് ബിലാൽ സമദാണ് വിദ്വേഷ പ്രസംഗത്തിൽ പരാതി നൽകിയത്.

ALSO READ: പിണങ്ങിപ്പോയ ഭാര്യ തിരിച്ചുവരുന്നില്ല; കാരണക്കാരിയായ അമ്മായിയമ്മയെ തലക്കടിച്ച് കൊലപ്പെടുത്തി മരുമകൻ

''400ഓളം കുഞ്ഞുങ്ങളെയാണ് മീനച്ചിൽ താലൂക്കിൽ മാത്രം ലൗ ജിഹാദിൽ നമുക്ക് നഷ്ടമായത്. 41 എണ്ണത്തിനെ മാത്രമാണ് തിരിച്ചുകിട്ടിയത്. ഇന്നലെയും 25 വയസുള്ള ഒരു കൊച്ചിനെ കാണാതായി. 25 വയസു വരെ ആ പെൺകുട്ടിയെ കെട്ടിച്ചുവിടാത്ത അപ്പനിട്ടാണ് അടികൊടുക്കേണ്ടത്. ചർച്ച ചെയ്യേണ്ട വിഷയമാണിത്." പി.സി ജോർജ് പ്രസംഗത്തിൽ പറഞ്ഞു.

സമാന പരാമർശങ്ങൾ മുൻപും പി.സി ജോർജ് നടത്തിയിരുന്നു. ഇതിൽ പൊലിസ് കേസെടുത്തിരുന്നു. ഇത്തരം രണ്ട് കേസുകളിൽ കോടതി അലക്ഷ്യം നേരിടുന്നതിനിടെയാണ് പി.സി ജോർജ് വീണ്ടും വിവാദ പരാമർശവുമായി എത്തിയത്. കൃത്യമായ ശിക്ഷ നൽകാത്തത് കൊണ്ടാണ് പി.സി ജോർജ് തുടർച്ചയായി ഇത്തരം പരാമർശങ്ങൾ നടത്തുന്നത് എന്ന യൂത്ത് കോൺഗ്രസ് നൽകിയ പരാതിയിൽ സൂചിപ്പിച്ചിരുന്നു.

Thodupuzha First Class Magistrate Court has directed the police to register a case against former MLA P.C. George over an alleged hate speech. The directive comes in connection with a controversial statement he made during an event held to mark the anniversary of the Emergency.