കൊച്ചി; വടുതലയില്‍ അയല്‍വാസി പെട്രോള്‍ ഒഴിച്ചു തീ കൊളുത്തി കൊല്ലാന്‍ ശ്രമിച്ച ക്രിസ്റ്റഫറിന്റെ നില അതീവഗുരുതരാവസ്ഥയില്‍. അമ്പതു ശതമാനം പൊള്ളലേറ്റ ക്രിസ്റ്റഫര്‍ വെന്റിലേറ്ററിലാണ്. പൊള്ളലേറ്റ ഭാര്യയും ചികിത്സയിലാണ്. ദമ്പതികളെ പെട്രോളൊഴിച്ച് തീ കൊളുത്തിയ ശേഷം ആത്മഹത്യ ചെയ്ത അയല്‍വാസി വില്യംസിന്റെ പോസ്റ്റുമോര്‍ട്ടവും ഇന്നു നടക്കും.

 ദീര്‍ഘകാലമായി ക്രിസ്റ്റഫറും വില്യംസുമായുള്ള തര്‍ക്കം നിലനിന്നിരുന്നു. ക്രിസ്റ്റഫറിന്റെ വീട്ടിലേക്ക് വില്യം മാലിന്യം എറിയുന്നത് തര്‍ക്കം രൂക്ഷമാക്കിയിരുന്നു. അതിനുശേഷം ക്രിസ്റ്റഫര്‍ കാമറ വയ്ക്കുകയും പൊലിസ് പരാതി നല്‍കുകയും ചെയ്തിരുന്നു.ഇതും വില്യംസിന്റെ പക ഇരട്ടിക്കാന്‍ കാരണമായി. മാലിന്യം എറിഞ്ഞ സംഭവത്തില്‍ വാര്‍ഡ് കൗണ്‍സിലര്‍ ഇടപെടുകയും പ്രശ്‌നം പരിഹരിക്കാന്‍ ശ്രമിക്കുകയും ചെയ്തിരുന്നു. ഇനി അങ്ങനെ ഒന്നും ഉണ്ടാവില്ലെന്നു വില്യംസ് പറയുകയും ചെയ്തതോടെ പ്രശ്‌നങ്ങള്‍ അവസാനിച്ചിരിക്കുമെന്നാണ് കരുതിയത്.

എന്നാല്‍  പക വീട്ടാനായി വില്യംസ് കാത്തിരിക്കുകയായിരുന്നു. അതിനിടെയാണ് കഴിഞ്ഞദിവസം പള്ളിപ്പെരുന്നാല്‍ കണ്ടു മടങ്ങിവരുകയായിരുന്നു ക്രിസ്റ്റഫറിന്റെയും ഭാര്യ മേരിയുടെയും ദേഹത്തേക്ക് പെട്രോളൊഴിച്ച് തീ കൊളുത്തുന്നത്.
വില്യമിന്റെ സഹോദരങ്ങളും നേരത്തേ പരിസര പ്രദേശത്തു തന്നെയാണ് താമസിച്ചിരുന്നതെന്നും എന്നാല്‍ ഇവരും വില്യംസിനെ സഹിക്കവയ്യാതെ നാടുവിടുകയായിരുന്നുവെന്നും സൂചനയുണ്ട്. സഹോദരന്റെ മകന്റെ തലയില്‍ ചുറ്റിക കൊണ്ട് അടിച്ച കേസും വില്യംസിനെതിരെയുണ്ട്. അതില്‍ നിയമനടപടി ഇപ്പോഴും തുടരുകയാണ്. ഇന്നലെ വൈകുന്നേരമാണ് സംഭവം. എറണാകുളം നോര്‍ത്ത് പൊലിസ് സ്ഥലത്തെത്തി നടപടികള്‍ സ്വീകരിച്ചു. അയല്‍വാസികളും പറയുന്നത് ഇയാള്‍ ശല്യക്കാരനാണെന്നായിരുന്നു.