റിയാദ്: നീണ്ട ഇരുപത് വർഷക്കാലം കോമയിൽ കഴിഞ്ഞിരുന്ന സഊദി രാജ കുടുംബാംഗം രാജകുമാരൻ അല്‍വലീദ് ബിൻ ത്വലാൽ അന്തരിച്ചു. 36 വയസായിരുന്നു. അറബ് ലോകത്തെ ഏറ്റവും ധനികനും ശതകോടീശ്വരനുമായ ഖാലിദ് ബിന്‍ ത്വലാല്‍ രാജകുമാരന്റെ മകനായ അല്‍വലീദ് രാജകുമാരൻ 2005-ൽ ഒരു വാഹനാപകടത്തെത്തുടർന്നാണ് ഗുരുതരമായി പറിക്കേറ്റ് കോമയിൽ ആയത്. 

തുടർന്ന് റിയാദ് കിംഗ് അബ്ദുല്‍ അസീസ് മെഡിക്കല്‍ സിറ്റിയില്‍ ലൈഫ് സപ്പോര്‍ട്ടിലാണ് ജീവൻ നിലനിര്‍ത്തിയിരുന്നത്. സഊദി അറേബ്യയുടെ ഉറങ്ങുന്ന രാജകുമാരന്‍ എന്നാണ് ലോക മാധ്യമങ്ങള്‍ അല്‍വലീദ് രാജകുമാരനെ വിശേഷിപ്പിച്ചിരുന്നത്. 2005 ല്‍ ബ്രിട്ടനിലെ സൈനിക കോളേജില്‍ പഠിക്കുമ്പോഴാണ് ദാരുണ അപകടം നടന്നത്. തലച്ചോറിന് പരിക്കേറ്റതിനെ തുടര്‍ന്ന് അബോധാവസ്ഥയിലാവുകയായിരുന്നു.

ഇക്കാലത്തിനിടക്ക് 2019 ല്‍ വിരലുകള്‍ ഉയര്‍ത്തുകയോ തല ചെറുതായി ചലിപ്പിക്കുകയോ ചെയ്യുന്നതായി കാണിക്കുന്ന വീഡിയോ പുറത്തുവന്നത് മാത്രമാണ് ആകെയുണ്ടായ ആരോഗ്യ പുരോഗതി. അതിനുശേഷം കൂടുതല്‍ വൈദ്യശാസ്ത്ര പുരോഗതി റിപ്പോര്‍ട്ട് ചെയ്തിരുന്നില്ല. 2025 ഏപ്രില്‍ 18 ന് 36 വയസ്സ് തികഞ്ഞ അല്‍വലീദ് രാജകുമാരന്‍ ഇത്തവണത്തെ ജന്മദിനത്തിന് ശേഷം ബോധം വീണ്ടെടുത്തതായും കുടുംബാംഗങ്ങള്‍ അദ്ദേഹത്തെ ആലിംഗനം ചെയ്തതായും വ്യാജ വാർത്തകൾ പുറത്ത് വന്നിരുന്നു.

നിരന്തരമായ വൈദ്യ പരിചരണത്തില്‍ കഴിഞ്ഞിരുന്ന അല്‍വലീദ് രാജകുമാരന് ഫീഡിംഗ് ട്യൂബ് വഴിയാണ് പോഷകാഹാരം നല്‍കിയിരുന്നത്. ആധുനിക സഊദി അറേബ്യയുടെ ശില്‍പിയായ അബ്ദുല്‍ അസീസ് രാജാവിന്റെ കൊച്ചുമകനായ അല്‍വലീദ് രാജകുമാരന്‍ മിഡില്‍ ഈസ്റ്റിലെ ദീര്‍ഘകാല കോമ കേസുകളില്‍ ഒരാളായിരുന്നു.