ഷാർജ: ഷാർജയിൽ മരിച്ച നിലയിൽ കണ്ടെത്തിയ മലയാളി യുവതി അതുല്യയുടെ ഭർത്താവ് സതീഷിനെ കമ്പനി ജോലിയിൽ നിന്ന് പിരിച്ചുവിട്ടു. ദുബൈ ആസ്ഥാനമായി പ്രവർത്തിക്കുന്ന കെട്ടിട കരാർ കമ്പനിയാണ് ഇയാളെ ജോലിയിൽനിന്ന് പിരിച്ചുവിട്ടത്.

ALSO READ: ദുബൈ മെട്രോ ബ്ലൂ ലൈൻ, ഇത്തിഹാദ് റെയിൽ നിർമ്മാണ പ്രവർത്തനങ്ങൾ; യുഎഇയിൽ റോഡുകൾ അടച്ചിടും

സൈറ്റ് എൻജിനീയറായ സതീഷിനെ ഇയാളുടെ ഭാര്യ അതുല്യ ശേഖറിന്റെ മരണവുമായി ബന്ധപ്പെട്ട മാധ്യമ റിപ്പോർട്ടുകളും അദ്ദേഹത്തിന്റെ അക്രമാസക്തവും അധിക്ഷേപകരവുമായ പെരുമാറ്റം വെളിപ്പെടുത്തുന്ന വീഡിയോകളുടെയും അടിസ്ഥാനത്തിലാണ് പിരിച്ചുവിട്ടതെന്ന് കമ്പനിയുടെ സീനിയർ എച്ച്ആർ മാനേജർ ഗൾഫ് ന്യൂസിനോട് വെളിപ്പെടുത്തി.

"2025 ജൂലൈ 19-ന് ഷാർജയിൽ ആത്മഹത്യ ചെയ്ത നിങ്ങളുടെ ഭാര്യയുടെ മരണത്തിൽ നിങ്ങളുടെ പങ്കാളിത്തം, യുഎഇയിൽ ശാരീരികവും മാനസികവുമായ പീഡനമായി കണക്കാക്കപ്പെടുന്നു. മാധ്യമ റിപ്പോർട്ടുകളിലെ ക്ലിപ്പിംഗുകളും സാഹചര്യ തെളിവുകളും അടിസ്ഥാനമാക്കി, നിങ്ങളെ ജോലിയിൽ നിന്ന് പിരിച്ചുവിടുന്നു." സതീഷിന് കമ്പനി അയച്ച കത്തിൽ പറയുന്നു.

"അതുല്യ പങ്കുവെച്ച വീഡിയോകളിൽ സതീഷ് അവളെ ശാരീരികമായും മാനസികമായും പീഡിപ്പിക്കുന്നത് കണ്ട് ഞങ്ങൾ ഞെട്ടി," മാനേജർ പറഞ്ഞു. ഒരു വർഷം മുമ്പാണ് സതീഷ് കമ്പനിയിൽ ചേർന്നതെന്നും അദ്ദേഹം വ്യക്തമാക്കി. ഇത്തരം പെരുമാറ്റത്തെക്കുറിച്ച് മുമ്പ് വിവരമില്ലാത്തതിനാൽ കമ്പനി ഇക്കാര്യങ്ങളിൽ ഇടപെട്ടിരുന്നില്ല. എന്നാൽ, ഇത്തരം ജീവനക്കാർക്ക് യാതൊരു വിട്ടുവീഴ്ചയും നൽകില്ലെന്നും മാനേജർ കൂട്ടിച്ചേർത്തു.

അതുല്യയുടെ മാതാപിതാക്കൾ സതീഷിനെതിരെ കേരളത്തിൽ പരാതി നൽകിയിരുന്നു. ദി ന്യൂ ഇന്ത്യൻ എക്‌സ്പ്രസിന്റെ റിപ്പോർട്ട് അനുസരിച്ച്, ഭാരതീയ ന്യായ സംഹിത (ബിഎൻഎസ്) പ്രകാരം സെക്ഷൻ 85 (ആത്മഹത്യാ പ്രേരണ), സെക്ഷൻ 115(2) (അപകടകരമായ ആയുധം ഉപയോഗിച്ച് ഗുരുതര പരിക്കേൽപ്പിക്കൽ), സെക്ഷൻ 118(1) (തടങ്കൽ വയ്ക്കൽ), സെക്ഷൻ 103(1) (ഭർത്താവിന്റെ ക്രൂരത) എന്നിവയും സ്ത്രീധന നിരോധന നിയമത്തിലെ സെക്ഷൻ 3, 4 (സ്ത്രീധനം ആവശ്യപ്പെടൽ) എന്നീ വകുപ്പുകളും സതീഷിനെതിരെ ചുമത്തിയിട്ടുണ്ട്.

അതുല്യയുടെ ഷാർജയിലെ സഹോദരിയും സഹോദരീ ഭർത്താവും യുഎഇയിൽ സതീഷിനെതിരെ കേസ് ഫയൽ ചെയ്യുമെന്ന് ഗൾഫ് ന്യൂസിനോട് വ്യക്തമാക്കി. ശനിയാഴ്ച പുലർച്ചെ, അതുല്യയുടെ 30-ാം ജന്മദിനത്തിൽ, ഷാർജയിലെ ഒരു മാളിൽ പുതിയ ജോലിയിൽ പ്രവേശിക്കേണ്ട ദിവസമാണ് അതുല്യയെ മരിച്ച നിലയിൽ കണ്ടെത്തിയത്.

ALSO READ: സാമ്പത്തിക തട്ടിപ്പ് കേസ്; മുന്‍ മാനേജര്‍ക്ക് പത്ത് ലക്ഷത്തിലധികം ദിര്‍ഹം പിഴ ചുമത്തി ദുബൈ കോടതി

ഞായറാഴ്ച യുഎഇയിലെ മലയാള മാധ്യമങ്ങളോട് സംസാരിക്കവെ, അതുല്യയുടെ മരണത്തിൽ തനിക്ക് പങ്കില്ലെന്ന് സതീഷ് ആവർത്തിച്ചു. എന്നാൽ, മുമ്പ് ഭാര്യയെ ശാരീരികമായി പീഡിപ്പിച്ചിട്ടുണ്ടെന്ന് സതീഷ് സമ്മതിച്ചു. സംഭവസമയത്ത് താൻ വീട്ടിലുണ്ടായിരുന്നില്ലെന്നും, അതുല്യ  കഴിഞ്ഞ വർഷം നവംബറിൽ തന്റെ സമ്മതമില്ലാതെ ഗർഭഛിദ്രം നടത്തിയെന്നും ഇയാൾ ആരോപിച്ചു.

‌