റിയാദ്: നീണ്ട ഇരുപത് വർഷക്കാലം കോമയിൽകിടന്ന് കഴിഞ്ഞ ദിവസം അന്തരിച്ച സഊദി രാജ കുടുംബാംഗം രാജകുമാരൻ അൽവലീദ് ബിൻ ഖാലിദ് ബിൻ തലാൽ ബിൻ അബ്ദുൽ അസീസ് രാജകുമാരന്റെ മയ്യത്ത് വൻ ജനാവലിയുടെ സാന്നിധ്യത്തിൽ റിയാദിൽ ഖബറടക്കി. 36 വയസു കാരനായിരുന്ന ഇദ്ദേഹം ഉറങ്ങുന്ന രാജകുമാരൻ എന്നായിരുന്നു അറിയപ്പെട്ടിരുന്നത്.

അറബ് ലോകത്തെ ധനികനും ശതകോടീശ്വരനുമായ ഖാലിദ് ബിന്‍ ത്വലാല്‍ രാജകുമാരന്റെ മകനായ അല്‍വലീദ് രാജകുമാരൻ 2005-ൽ ഒരു വാഹനാപകടത്തെത്തുടർന്നാണ് ഗുരുതരമായി പറിക്കേറ്റ് കോമയിൽ ആയത്. 

തുടർന്ന് റിയാദ് കിംഗ് അബ്ദുല്‍ അസീസ് മെഡിക്കല്‍ സിറ്റിയില്‍ ലൈഫ് സപ്പോര്‍ട്ടിലാണ് ജീവൻ നിലനിര്‍ത്തിയിരുന്നത്. സഊദി അറേബ്യയുടെ ഉറങ്ങുന്ന രാജകുമാരന്‍ എന്നാണ് ലോക മാധ്യമങ്ങള്‍ അല്‍വലീദ് രാജകുമാരനെ വിശേഷിപ്പിച്ചിരുന്നത്. 2005 ല്‍ ബ്രിട്ടനിലെ സൈനിക കോളേജില്‍ പഠിക്കുമ്പോഴാണ് ദാരുണ അപകടം നടന്നത്. തലച്ചോറിന് പരിക്കേറ്റതിനെ തുടര്‍ന്ന് അബോധാവസ്ഥയിലാവുകയായിരുന്നു.

നിരന്തരമായ വൈദ്യ പരിചരണത്തില്‍ കഴിഞ്ഞിരുന്ന അല്‍വലീദ് രാജകുമാരന് ഫീഡിംഗ് ട്യൂബ് വഴിയാണ് പോഷകാഹാരം നല്‍കിയിരുന്നത്. ആധുനിക സഊദി അറേബ്യയുടെ ശില്‍പിയായ അബ്ദുല്‍ അസീസ് രാജാവിന്റെ കൊച്ചുമകനായ അല്‍വലീദ് രാജകുമാരന്‍ മിഡില്‍ ഈസ്റ്റിലെ ദീര്‍ഘകാല കോമ കേസുകളില്‍ ഒരാളായിരുന്നു. 

റിയാദിലെ ഇമാം തുർക്കി ബിൻ അബ്ദുല്ല പള്ളിയിൽ ഇന്ന് അസർ നമസ്കാരത്തിന് ശേഷം നടന്ന മയ്യത്ത് നിസ്കാരത്തിൽ റിയാദ് മേഖല ഡെപ്യൂട്ടി ഗവർണർ മുഹമ്മദ് ബിൻ അബ്ദുൾറഹ്മാൻ ബിൻ അബ്ദുൽ അസീസ്, പ്രിൻസ് മൻസൂർ ബിൻ സഊദ് ബിൻ അബ്ദുൽ അസീസ്, പ്രിൻസ് സഊദ് ബിൻ സാദ് ബിൻ അബ്ദുൽ അസീസ്, പ്രിൻസ് അബ്ദുൽ റഹ്മാൻ ബിൻ സൗദ് അൽ കബീർ, മിതേബ് ബിൻ അബ്ദുല്ല ബിൻ അബ്ദുൽ അസീസ്, സൽമാൻ രാജാവിന്റെ ഉപദേഷ്ടാവ് പ്രിൻസ് ഫൈസൽ ബിൻ ഖാലിദ് ബിൻ അബ്ദുൽ അസീസ്, റോയൽ കോർട്ടിലെ ഉപദേഷ്ടാവ്, പ്രിൻസ് അബ്ദുൽ അസീസ് ബിൻ അബ്ദുല്ല ബിൻ അബ്ദുൽ റഹ്മാൻ, റോയൽ ലെഫ്റ്റനന്റ് ജനറൽ തുർക്കി ബിൻ ബന്ദർ ബിൻ അബ്ദുൽ അസീസ്, സഊദി വ്യോമസേന കമാൻഡർ പ്രിൻസ് മിഷാൽ ബിൻ മുഹമ്മദ് ബിൻ സഊദ് ബിൻ അബ്ദുൽ അസീസ് ഉൾപ്പെടെ നിരവധി ഭരണ പ്രമുഖർ, നിരവധി രാജകുമാരന്മാർ, ഉദ്യോഗസ്ഥർ, പൗരന്മാർ എന്നിവർ സംബന്ധിച്ചു.