റിയാദ്: ഉറങ്ങുന്ന രാജകുമാരന്റെ കഥ അദ്ദേഹത്തിന്റെ പിതാവ് ഖാലിദ് ബിന്‍ തലാലിന്റെ പ്രതീക്ഷയുടെ കൂടി കഥയാണ്. തന്റെ മകന്‍ ഒരിക്കല്‍ ഉണരുമെന്ന് അദ്ദേഹം ഉറച്ചുവിശ്വസിച്ചിരുന്നു. എല്ലാ ആഘോഷദിനങ്ങളിലും അദ്ദേഹം തന്റെ മകന്റെ അടുത്തേക്ക് ഓടിയെത്തി. പെരുന്നാള്‍ ദിനങ്ങളില്‍ രാജകുമാരന്റെ മുറി അലങ്കരിച്ചിരുന്നു. 

ALSO READ: ഇരുപതു വര്‍ഷമായി അബോധാവസ്ഥയില്‍ ചികിത്സയിൽ കഴിഞ്ഞ സഊദി രാജകുമാരൻ അല്‍വലീദ് ബിൻ ത്വലാൽ അന്തരിച്ചു

രണ്ട് പതിറ്റാണ്ടോളം കോമയിൽ കഴിഞ്ഞ സഊദി രാജകുമാരൻ അൽവലീദ് ബിൻ ഖാലിദ് ബിൻ തലാൽ ബിൻ അബ്ദുൽ അസീസ് അൽ സൗദ് (36) ശനിയാഴ്ചയാണ് അന്തരിച്ചത്. 2005-ൽ ഉണ്ടായ വാഹനാപകടത്തെ തുടർന്ന് കോമയിലായ രാജകുമാരൻ, റിയാദിലെ കിംഗ് ഫൈസൽ സ്പെഷ്യലിസ്റ്റ് ഹോസ്പിറ്റൽ & റിസർച്ച് സെന്ററിൽ 20 വർഷം ചികിത്സയിലായിരുന്നു. ‘ഉറങ്ങുന്ന രാജകുമാരൻ’ എന്ന് വിശേഷിപ്പിക്കപ്പെട്ട അദ്ദേഹത്തിന്റെ ജീവിതം പ്രതീക്ഷയുടെയും സഹനത്തിന്റെയും കഥയായിരുന്നു.

1990 ഏപ്രിലിൽ റിയാദിൽ ജനിച്ച അൽവലീദ്, സഊദി രാജകുടുംബാംഗവും പ്രശസ്ത വ്യവസായിയുമായ പ്രിൻസ് അൽവലീദ് ബിൻ തലാലിന്റെ സഹോദരനായ പ്രിൻസ് ഖാലിദ് ബിൻ തലാലിന്റെ മൂത്ത മകനാണ്. 15-ാം വയസ്സിൽ സൈനിക പഠനത്തിനിടെ ഉണ്ടായ വാഹനാപകടം തലച്ചോറിൽ രക്തസ്രാവമുണ്ടാക്കി. ഇത് പിന്നീട് അദ്ദേ​ഹത്തെ കോമയിലേക്ക് തള്ളിയിടുകയായിരുന്നു.

ALSO READ: നൊമ്പരമായി സഊദിയിലെ 'ഉറങ്ങുന്ന രാജകുമാരൻ': വൻ ജനാവലിയുടെ സാന്നിധ്യത്തിൽ റിയാദിൽ അന്ത്യനിദ്ര, പങ്കെടുത്തത് രാജ കുടുംബാഗങ്ങൾ ഉൾപ്പെടെ വൻ ജനാവലി

വിദേശ വിദഗ്ധരുടെ ഇടപെടൽ ഉൾപ്പെടെയുള്ള തീവ്ര വൈദ്യശ്രമങ്ങൾ നടത്തിയെങ്കിലും അൽവലീദിന് ബോധം വീണ്ടെടുക്കാനായില്ല. വർഷങ്ങളായി, അദ്ദേഹത്തിന്റെ ശരീരത്തിലെ ചെറിയ ചലനങ്ങൾ പോലും വാർത്തകളിൽ നിറഞ്ഞുനിന്നു. മെഡിക്കൽ റിപ്പോർട്ടുകൾ പ്രതീക്ഷ നൽകുന്നതിന് വിപരീതമാണെങ്കിലും, പലരും അദ്ദേഹം അത്ഭുതകരമായി സുഖം പ്രാപിക്കുമെന്ന് പ്രത്യാശിച്ചു.

രാജകുമാരന്റെ പിതാവ് പ്രിൻസ് ഖാലിദ്, മകന്റെ സുഖപ്രാപ്തിയിൽ ഒരിക്കലും പ്രതീക്ഷ കൈവിട്ടില്ല. എല്ലാ അവസരങ്ങളിലും മകന്റെ കിടക്കയ്ക്കരികിൽ പ്രാർത്ഥനയോടെ ഖുർആൻ പാരായണം ചെയ്ത അദ്ദേഹം, ഒരു അത്ഭുതത്തിനായി കാത്തിരുന്നു. എന്നാല്‍ പ്രതീക്ഷകള്‍ ബാക്കിയാക്കി ഉറങ്ങുന്ന രാജകുമാരന്‍ ശനിയാഴ്ച വിടവാങ്ങുകയായിരുന്നു.